ହାତରେ ହାତ ମିଶାଇ ଶାନ୍ତିଶୃଙ୍ଖଳାର ସହ ପାଳନ କରିବା ମା’ ଦୁର୍ଗାଙ୍କ ପୂଜା: ଆଇଜିପି ସତ୍ୟଜିତ ନାୟକ ।

କଟକ,୦୫/୧୦(ପିପିଟି): ଶାରଦୀୟ ଦୁର୍ଗାପୂଜାକୁ ଶାନ୍ତି, ଶୃଙ୍ଖଳା ଓ ଭାଇଚାରାର ସହ ପାଳନ କରିବା ପାଇଁ ସମସ୍ତଙ୍କୁ ଆହ୍ୱାନ ଦେଇଛନ୍ତି କେନ୍ଦ୍ରାଞ୍ଚଳ ଆଇଜିପି ଡଃ ସତ୍ୟଜିତ ନାୟକ। “ଆସନ୍ତୁ, ହାତରେ ହାତ ମିଶାଇ ମା’ ଦୁର୍ଗାଙ୍କ ପୂଜାକୁ ଆନନ୍ଦ, ଭକ୍ତି ଓ ଶାନ୍ତିର ସହ ପାଳନ କରିବା। ପୁଲିସ ସମସ୍ତ ନିୟମ ମାନି ଚଳିବା ସହ ସମାଜର ପ୍ରତ୍ୟେକ ନାଗରିକ ମଧ୍ୟ ଆଇନ ଓ ନିୟମ ପ୍ରତି ସମ୍ମାନ ରଖନ୍ତୁ,” ବୋଲି ଡଃ ନାୟକ କହିଛନ୍ତି।
ଦୁର୍ଗାପୂଜା ଅବସରରେ ସୁରକ୍ଷିତ ଓ ଶୃଙ୍ଖଳିତ ପରିବେଶ ବଜାୟ ରଖିବା ପାଇଁ ପୁଲିସ ଓ ଜନସାଧାରଣଙ୍କ ମଧ୍ୟରେ ସହଯୋଗ ଅତ୍ୟନ୍ତ ଜରୁରୀ ବୋଲି ସେ କହିଛନ୍ତି। ପୂଜା ମଣ୍ଡପ, ଭିଡ଼ ଅଞ୍ଚଳ, ରାସ୍ତାଘାଟ ଓ ବିସର୍ଜନ ଶୋଭାଯାତ୍ରା ସମୟରେ ସମସ୍ତେ ସଚେତନ ଓ ଦାୟିତ୍ୱବାନ ହୋଇ ଚଳିବାକୁ ସେ ଅନୁରୋଧ କରିଛନ୍ତି। ପୂଜା କମିଟି ଓ ସାଧାରଣ ଲୋକଙ୍କ ସହଯୋଗରେ ଉତ୍ସବକୁ ସୁରକ୍ଷିତ ଓ ସୁନ୍ଦର ଭାବେ ପାଳନ କରାଯାଇପାରିବ ବୋଲି ସେ କହିଛନ୍ତି।
ନିଶାସେବନରୁ ଦୂରେଇ ରହିବାକୁ ଆହ୍ୱାନ ଦେଇ ଆଇଜିପି କହିଛନ୍ତି ଯେ, ପୂଜା ହେଉଛି ଆନନ୍ଦ ଓ ଭକ୍ତିର ପର୍ବ। ଏହି ପବିତ୍ର ଅବସରରେ କୌଣସି ପ୍ରକାର ନିଶାଦ୍ରବ୍ୟ ସେବନ କରି ନିଜ ପାଇଁ କିମ୍ବା ଅନ୍ୟମାନଙ୍କ ପାଇଁ ବିପଦ ସୃଷ୍ଟି କରିବା ଉଚିତ ନୁହେଁ। ନିଶାସେବନ କରି ଗାଡ଼ି ଚଳାଇବାଠାରୁ ସମ୍ପୂର୍ଣ୍ଣ ଦୂରେଇ ରହିବା ସହ ଯୁବପିଢ଼ିଙ୍କୁ ମଧ୍ୟ ନିଶାମୁକ୍ତ ଉତ୍ସବ ପାଳନ ପାଇଁ ସେ ଆହ୍ୱାନ ଦେଇଛନ୍ତି।
ପୁଲିସ କର୍ମଚାରୀମାନେ ମଧ୍ୟ ନିଜ କର୍ତ୍ତବ୍ୟ ପାଳନ ସମୟରେ ସମସ୍ତ ବିଭାଗୀୟ ନିୟମ, ଆଚରଣବିଧି ଓ ଆଇନକୁ ଅନୁସରଣ କରିବା ସହ ଲୋକଙ୍କ ସହ ଶାଳୀନ ଓ ମାନବିକ ବ୍ୟବହାର କରିବା ଆବଶ୍ୟକ ବୋଲି ଡଃ ନାୟକ କହିଛନ୍ତି। ପୂଜା ସମୟରେ ପୁଲିସର ଦାୟିତ୍ୱ କେବଳ ଆଇନଶୃଙ୍ଖଳା ରକ୍ଷାରେ ସୀମିତ ନୁହେଁ; ଭକ୍ତ ଓ ସାଧାରଣ ଲୋକଙ୍କୁ ଆବଶ୍ୟକ ସହଯୋଗ ଯୋଗାଇବା ମଧ୍ୟ ପୁଲିସର ଦାୟିତ୍ୱ ବୋଲି ସେ ଉଲ୍ଲେଖ କରିଛନ୍ତି।
ପୂଜା ସମୟରେ ଗୁଜବ କିମ୍ବା ଉତ୍ତେଜନା ସୃଷ୍ଟି କରୁଥିବା ଖବର ଓ ସୋସିଆଲ୍ ମିଡିଆ ପୋଷ୍ଟରୁ ଦୂରେଇ ରହିବାକୁ ସେ ଲୋକଙ୍କୁ ପରାମର୍ଶ ଦେଇଛନ୍ତି। କୌଣସି ସନ୍ଦେହଜନକ ଘଟଣା କିମ୍ବା ଆଇନଶୃଙ୍ଖଳା ସମ୍ପର୍କିତ ସମସ୍ୟା ଦେଖାଦେଲେ ନିଜେ ଆଇନକୁ ହାତକୁ ନନେଇ ତୁରନ୍ତ ପୁଲିସକୁ ଜଣାଇବାକୁ ସେ କହିଛନ୍ତି। ସୋସିଆଲ୍ ମିଡିଆରେ ଅପ୍ରମାଣିତ ସୂଚନା ପ୍ରସାର ନକରିବାକୁ ମଧ୍ୟ ସେ ଅନୁରୋଧ କରିଛନ୍ତି।
“ପୂଜା ଆମ ସମସ୍ତଙ୍କର। ଏହାକୁ ସୁନ୍ଦର, ନିରାପଦ ଓ ଶାନ୍ତିପୂର୍ଣ୍ଣ କରିବା ମଧ୍ୟ ଆମ ସମସ୍ତଙ୍କର ସାମୂହିକ ଦାୟିତ୍ୱ। ପୁଲିସ ଓ ଜନସାଧାରଣ ପରସ୍ପରର ହାତ ଧରି ଚାଲିଲେ ମା’ ଦୁର୍ଗାଙ୍କ ପୂଜା ଅଧିକ ଆନନ୍ଦମୟ ଓ ଶୃଙ୍ଖଳିତ ହୋଇପାରିବ,” ବୋଲି ଡଃ ସତ୍ୟଜିତ ନାୟକ କହିଛନ୍ତି। ସେ ସମସ୍ତଙ୍କୁ ନିଶାମୁକ୍ତ, ଶାନ୍ତିପୂର୍ଣ୍ଣ ଓ ନିୟମାନୁଗତ ଭାବେ ଉତ୍ସବ ପାଳନ କରିବା ସହ ଭାଇଚାରା ଓ ସାମାଜିକ ସଦ୍ଭାବ ବଜାୟ ରଖିବାକୁ ଆହ୍ୱାନ ଦେଇଛନ୍ତି।