ଚାକିରୀ ଦେବା ନାଁରେ ଠକେଇ,ଦୁଇ ଗିରଫ ।

ମାଲକାନଗିରି,୧୩/୦୯(ପିପିଟି):ମାଲକାନଗିରି ଜିଲ୍ଲାର ବିଭିନ୍ନ ସରକାରୀ କାର୍ଯ୍ୟାଳୟରେ ଚାକିରୀରେ ନିଯୁକ୍ତି ହେବା ବାହାନା କରି ଚାକିରୀ ଖୋଜୁଥିବା ବେକାର ଯୁବକଙ୍କ ଠାରୁ ମୋଟାଅଙ୍କର ଅର୍ଥ ନେଇ ଏବଂ ଜାଲ ନିଯୁକ୍ତିପତ୍ର ଦେବା ଅଭିଯୋଗରେ ମାଲକାନଗିରି ପୋଲିସ ୨ ଜଣଙ୍କୁ ଗିରଫ କରିବାରେ ସଫଳ ହୋଇଛି । ଏହି ଘଟଣାରେ କୋରାପୁଟର ମାଛକୁଣ୍ଡର ହନୁମାଲ ଗାଁର ସଦନ ପାଙ୍ଗି (୨୯) ଏବଂ ରାୟଗଡାର ନେହେରୁ ନାଗରର ସୁଧୀର କୁମାର ପାଣି(୩୦) ଙ୍କୁ ଗିରଫ କରାଯାଇଛି।
ଗତ ୯ ଓ ୧୦ ତାରିଖ ଦିନ ତିନିଜଣ ଯୁବକ ମାଲକାନଗିରି ପୋଲିସ ନିକଟରେ ଅଭିଯୋଗ କରିଥିଲେ ଯେ ସଦନ ପାଙ୍ଗି ନାମକ ଜଣେ ବ୍ୟକ୍ତି ସରକାରୀ କାର୍ଯ୍ୟାଳୟରେ ଚାକିରୀ ଦେବାର ପ୍ରତିଶୃତି ଦେଇ ସେମାନଙ୍କ ଠାରୁ ଲକ୍ଷ ଲକ୍ଷ ଟଙ୍କା ଠକି ନେଇଥିଲେ ।ଅନୁସନ୍ଧାନରୁ ଜଣାପଡିଛି ଯେ ଚାକିରୀ ଠକେଇର ରାକେଟ୍ ନବରଙ୍ଗପୁର, କୋରାପୁଟ, ରାୟଗଡା ଜିଲ୍ଲାରେ ଚାଲିଛି ଏବଂ ଭୁବନେଶ୍ୱରର ସମୀର ପଟ୍ଟନାୟକ ନାମକ ଜଣେ ବ୍ୟକ୍ତି ବିଭିନ୍ନ ସରକାରୀ କାର୍ଯ୍ୟାଳୟରେ ଚାକିରୀ ଖାଲି ରହିଛି ବୋଲି ବିଜ୍ଞାପନକୁ ରାୟଗଡାର ସୁଧୀର କୁମାର ପାଣିଙ୍କ ନିକଟକୁ ପଠାଉଥିଲେ।ଏହା ପରେ ସୁଧୀର କୋରାପୁଟର ସଦାନ ପାଙ୍ଗି ସମେତ ଅନ୍ୟ ତିନୋଟି ଜିଲ୍ଲାର ସହାୟକମାନଙ୍କ ପାଇଁ ବିଜ୍ଞାପନ ପଠାନ୍ତି, ଯାହା ଫଳରେ ସେମାନଙ୍କୁ ଚାକିରୀ ଯୋଗାଇବାର ବାହାନାରେ ଯୁବକମାନଙ୍କ ଠାରୁ ମୋଟା ଅଙ୍କର ଟଙ୍କା ସଂଗ୍ରହ କରନ୍ତି। ଏହା ପରେ ସେମାନେ ଚାକିରୀ ଆଶାୟୀମାନଙ୍କୁ ନକଲି ନିଯୁକ୍ତି ପତ୍ର ପ୍ରଦାନ କରି ଠକୁ ଥିଲେ । ଯେତେବେଳେ ପ୍ରାର୍ଥିମାନେ ନିଯୁକ୍ତି ସ୍ଥାନରେ ପହଞ୍ଚନ୍ତି, ସେମାନେ ଚିଠିଟି ନକଲି ବୋଲି ଜାଣନ୍ତି ଏବଂ ଠକମାନଙ୍କୁ ସେମାନଙ୍କର ଟଙ୍କା ଫେରସ୍ତ କରିବାକୁ ଅନୁରୋଧ କରନ୍ତି । ତେବେ ସେମାନଙ୍କୁ ସଦନ ପାଙ୍ଗି ଟଙ୍କା ନଦେଇ ଧମକ ଦେଉଥିଲେ।ଫୋନ ପେଏ ଜରିଆରେ ପୋଲିସ ବିପୁଳ ପରିମାଣର କାରବାରର ଅନୁସନ୍ଧାନ କରିଥିଲା, ଯେଉଁଠାରେ ଅଭିଯୋଗକାରୀ ମାନେ ସଦନ ପାଙ୍ଗିଙ୍କୁ ଲକ୍ଷ ଲକ୍ଷ ଟଙ୍କା ପଠାଇଥିଲେ, ଯାହା ପରେ ସୁଧୀରଙ୍କୁ କିଛି ଟଙ୍କା ପଠାଇଥିଲେ। ଅଭିଯୁକ୍ତ ସଦନ ମଧ୍ୟ ବିଭିନ୍ନ ବ୍ୟକ୍ତିଙ୍କଠାରୁ ୧୦ ଲକ୍ଷରୁ ଅଧିକ ଟଙ୍କା ସଂଗ୍ରହ କରିଛନ୍ତି।ଏହା ବ୍ୟତୀତ ଅଭିଯୁକ୍ତ ସୁଧୀର ପାଙ୍ଗି ସମୀର ପଟ୍ଟନାୟକଙ୍କୁ ଅନଲାଇନ୍ ଟଙ୍କା ଟ୍ରାନ୍ସଫର କରୁଥିଲେ। ନକଲି ନିଯୁକ୍ତି ବିଜ୍ଞାପନ ପ୍ରକାଶ କରି ବେକାର ଯୁବକମାନଙ୍କୁ ପ୍ରଲୋଭିତ କରିବା ପାଇଁ ସୁଧୀର ଏକ ହ୍ବାଟଆପ୍ ଗ୍ରୁପ୍ (ଚାକିରୀ ଖାଲି) ଖୋଲିଥିବା ପୋଲିସ କହିଛି।ମାଲକାନଗିରି ପୋଲିସ ୩ ଗୋଟିମାମଲା ରୁଜୁ କରିଛି । (୧)ମାଲକାନଗିରି ଥାନା କେଶ ନଂ:୪୦୫ ତା୧୦.୦୯.୨୦୨୧, ୪୧୭/୪୨୦/୪୬୭/୪୬୮/୨୯୪/୫୦୬/୩୪ ଆଇ.ପି.ସି:(୨)ମାଲକାନଗିରି ଥାନା କେଶ ନଂ:୪୦୬ ତା:୧୪.୧୦.୨୦୨୧, ୪୧୭/୪୨୦/୪୬୭/୪୬୮/୨୯୪/୫୦୬/୩୪ ଆଇ.ପି.ସି:(୩)ମାଲକାନଗିରି କେଶ ନଂ:୪୦୫ ତା:୧୪.୧୦.୨୦୨୧/୪୧୭/୪୨୦/୪୬୭/୪୬୮/୫୦୬/୩୪ ଆଇ.ପି.ସି ରେ ମାମଲା ରୁଜୁ କରାଯାଇଛି ।ବର୍ତ୍ତମାନ ମାଲକାନଗିରି ପୋଲିସ ୨ଜଣ ଆସାମୀଙ୍କୁ ଗିରଫ କରି କୋର୍ଟ ଚାଲାଣ କରିଛି ।
(ରିପୋର୍ଟ:ବରିଷ୍ଠ ସାମ୍ବାଦିକ କେଶବ ଚନ୍ଦ୍ର ନାୟକ,ମାଲକାନଗିରି)