ମାଲକାନଗିରି,୨୬/୦୫(ପିପିଟି):ଶିଶୁ ସୁରକ୍ଷା, କଲ୍ୟାଣ ଏବଂ ଥଇଥାନ କ୍ଷେତ୍ରରେ ମାଲକାନଗିରି ଜିଲ୍ଲା ପ୍ରଶାସନ ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରାଯାଇଛି। ମାଲକାନଗିରି ଜିଲ୍ଲାପାଳ ଓ ଜିଲ୍ଲା ମାଜିଷ୍ଟ୍ରେଟ୍ ଙ୍କ ଅଦାଲତରେ ଏକ ଆନ୍ତଃରାଜ୍ୟ ପୋଷ୍ୟ ସନ୍ତାନ ଗ୍ରହଣ ପ୍ରକ୍ରିୟା ଆଜି ବିଧିବଦ୍ଧ ଭାବେ ଚୂଡ଼ାନ୍ତ ସମ୍ପନ୍ନ ହୋଇଛି । ନୂଆଦିଲ୍ଲୀସ୍ଥିତ କେନ୍ଦ୍ରୀୟ ପୋଷ୍ୟ ସନ୍ତାନ ସମ୍ପଦ ପ୍ରାଧିକରଣ ଦ୍ୱାରା ପୂର୍ବରୁ ଅନୁମୋଦିତ ଏହି ମାମଲାରେ ଜିଲ୍ଲାପାଳଙ୍କ ଦ୍ୱାରା ଚୂଡାନ୍ତ ପୋଷ୍ୟ ସନ୍ତାନ ଆଦେଶ ଜାରି କରାଯାଇଛି। ଏହା ସହିତ ଝାଡ଼ଖଣ୍ଡର ଆଶାୟୀ ଦମ୍ପତିଙ୍କୁ ଏହି ଶିଶୁର ସମ୍ପୂର୍ଣ୍ଣ ଆଇନଗତ ଅଭିଭାବକତ୍ୱ ପ୍ରଦାନ କରାଯାଇଛି।
ସୂଚନାଯୋଗ୍ୟ ଯେ, କେନ୍ଦ୍ରୀୟ ପୋଷ୍ୟ ସନ୍ତାନ ସମ୍ପଦ ପ୍ରାଧିକରଣ ର ନିୟମାନୁସାରେ ସମ୍ପୃକ୍ତ ଶିଶୁଟିକୁ ପୂର୍ବରୁ ଝାଡ଼ଖଣ୍ଡର ଆଶାୟୀ ପିତାମାତାଙ୍କୁ ପ୍ରାକ୍-ପୋଷ୍ୟ ସନ୍ତାନ ପାଳନ ଅଧୀନରେ ହସ୍ତାନ୍ତର କରାଯାଇଥିଲା। ଫୋଷ୍ଟର କେୟାର ଅବଧି ମଧ୍ୟରେ ସମସ୍ତ ନିୟମାବଳୀର ସଫଳ ଅନୁପାଳନ ଏବଂ ଯାଞ୍ଚ ପରେ, ଆଜି ଜିଲ୍ଲାପାଳଙ୍କ କୋର୍ଟରେ ଏହି ଆଇନଗତ ପ୍ରକ୍ରିୟାର ସଫଳ ଅନ୍ତ ଘଟିଛି। ଏହି ଚୂଡ଼ାନ୍ତ ଆଦେଶ ବଳରେ ଶିଶୁଟି ବର୍ତ୍ତମାନ ତାର ନୂତନ ପରିବାରର ଏକ ବୈଧ ସଦସ୍ୟ ଭାବେ ମାନ୍ୟତା ପାଇଛି । ଏହି ଅବସରରେ ଜିଲ୍ଲାପାଳ ପ୍ରଥମେଶ ଅରବିନ୍ଦ ରାଜଶିର୍କେ ନିଜର ଖୁସି ବ୍ୟକ୍ତ କରି କହିଛନ୍ତି ଯେ ପ୍ରତ୍ୟେକ ଶିଶୁର ଏକ ସୁରକ୍ଷିତ ପରିବେଶ ମଧ୍ୟରେ ବଢ଼ିବାର ଏବଂ ନିଜର ଭବିଷ୍ୟତ ଗଢ଼ିବାର ମୌଳିକ ଅଧିକାର ରହିଛି। ଆଜି ଏହି ଆଇନଗତ ପ୍ରକ୍ରିୟାକୁ ସଫଳତାର ସହ ଶେଷ କରି ଶିଶୁଟିକୁ ତାର ସ୍ଥାୟୀ ପରିବାର ନିକଟରେ ହସ୍ତାନ୍ତର କରି ଜିଲ୍ଲା ପ୍ରଶାସନ ଅତ୍ୟନ୍ତ ଆନନ୍ଦିତ। ଝାଡ଼ଖଣ୍ଡରୁ ଆସିଥିବା ଏହି ନୂତନ ଦମ୍ପତିଙ୍କୁ ଜିଲ୍ଲାପାଳ ଶୁଭେଚ୍ଛା ଜଣାଇଛନ୍ତି ଏବଂ ଶିଶୁଟିର ଉଜ୍ଜ୍ୱଳ ତଥା ସୁଖମୟ ଜୀବନ କାମନା କରିଛନ୍ତି। ଏହି ସମଗ୍ର ପ୍ରକ୍ରିୟାକୁ ସ୍ୱଚ୍ଛ ଓ ସୁରୁଖୁରୁରେ ସମ୍ପାଦନ କରିଥିବାରୁ ଜିଲ୍ଲା ଶିଶୁ ସୁରକ୍ଷା ୟୁନିଟ୍ ଏବଂ ସମ୍ପୃକ୍ତ ସ୍ପେଶାଲାଇଜ୍ଡ ଆଡପସନ୍ ଏଜେନ୍ସି ର ସମସ୍ତ କର୍ମଚାରୀଙ୍କୁ ମଧ୍ୟ ଜିଲ୍ଲାପାଳ ଧନ୍ୟବାଦ ଜଣାଇଛନ୍ତି।
ଏହି ସଫଳ ଆଇନଗତ ପ୍ରକ୍ରିୟାର ସଂଯୋଜନା ସମ୍ପର୍କରେ ସୂଚନା ଦେଇ ଜିଲ୍ଲା ଶିଶୁ ସୁରକ୍ଷା ଅଧିକାରୀ ନାରାୟଣ ଦାସ କହିଛନ୍ତି ଯେ, ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଶିଶୁଟିର ଆଇନଗତ ସୁରକ୍ଷା ଏବଂ ସମସ୍ତ ଦିଗକୁ ଅତି ସତର୍କତାର ସହ ଅନୁଧ୍ୟାନ କରାଯାଇଛି।
ଏହି ଚୂଡ଼ାନ୍ତ ଆଦେଶନାମା ଜାରି ହେବା ପରେ
କେନ୍ଦ୍ରୀୟ ପୋଷ୍ୟ ସନ୍ତାନ ସମ୍ପଦ ପ୍ରାଧିକରଣ ଡାଟାବେସରେ ଶିଶୁର ସ୍ଥିତି ଅପଡେଟ୍ କରାଯିବ । ସରକାରୀ ନିୟମାବଳୀ ଅନୁଯାୟୀ, ଶିଶୁଟିର ସାମଗ୍ରିକ ବିକାଶ ଏବଂ ସୁରକ୍ଷା ଉପରେ ନଜର ରଖିବା ପାଇଁ ଆଗାମୀ ଦୁଇ ବର୍ଷ ପର୍ଯ୍ୟନ୍ତ ପ୍ରତି ୬ ମାସରେ ଥରେ ବାଧ୍ୟତାମୂଳକ ପୋଷ୍ଟ-ଆଡପସନ୍ ଫଲୋ-ଅପ୍ ରିପୋର୍ଟ ପ୍ରଶାସନ ନିକଟରେ ଦାଖଲ କରାଯିବ।
(ରିପୋର୍ଟ: ବରିଷ୍ଠ ସାମ୍ବାଦିକ କେଶବ ଚନ୍ଦ୍ର ନାୟକ)