ହୀରାକୁଦ ଜଳଭଣ୍ଡାରର ୫ଟି ଗେଟ୍ ଖୋଲା, ମହାନଦୀର ତଳମୁଣ୍ଡରେ ସତର୍କତା ଜାରି ।

ସମ୍ବଲପୁର, ୦୨/୧୧(ପିପିଟି): ଉପରମୁଣ୍ଡରେ ଲଗାତାର ବର୍ଷା ଯୋଗୁଁ ହୀରାକୁଦ ଜଳଭଣ୍ଡାରର ଜଳସ୍ତର ବୃଦ୍ଧି ପାଇବା ପରେ ଜଳ ନିଷ୍କାସନ ପାଇଁ ପାଞ୍ଚଟି ଗେଟ୍ ଖୋଲାଯାଇଛି। ବାତ୍ୟା ‘ଅର୍ଣ୍ଣବ’ର ପ୍ରଭାବରେ ଉପରମୁଣ୍ଡରେ ବର୍ଷା ଜାରି ରହିଥିବାରୁ ଜଳଭଣ୍ଡାରକୁ ଜଳପ୍ରବେଶ ବଢ଼ିଛି। ଏହାକୁ ଦୃଷ୍ଟିରେ ରଖି ଡ୍ୟାମ୍ କର୍ତ୍ତୃପକ୍ଷ ଜଳ ନିଷ୍କାସନ ନିଷ୍ପତ୍ତି ନେଇଛନ୍ତି। ଗେଟ୍ ଖୋଲାଯିବା ପରେ ମହାନଦୀର ତଳମୁଣ୍ଡରେ ଜଳପ୍ରବାହ ବୃଦ୍ଧି ପାଇବାର ଆଶଙ୍କା ରହିଛି। ତେଣୁ ନଦୀକୁ ନଯିବା ସହ ନଦୀକୂଳଠାରୁ ଦୂରେଇ ରହିବାକୁ ତଳମୁଣ୍ଡରେ ରହୁଥିବା ଲୋକଙ୍କୁ ସତର୍କ କରାଯାଇଛି।
ସୂଚନା ଅନୁସାରେ, ହୀରାକୁଦ ଜଳଭଣ୍ଡାରର ଜଳସ୍ତର ବୃଦ୍ଧି ପାଇ ୬୨୯.୯୨ ଫୁଟରେ ପହଞ୍ଚିଛି। ଅନ୍ୟପକ୍ଷରେ ପ୍ରତି ସେକେଣ୍ଡରେ ୧ ଲକ୍ଷ ୧୪ ହଜାର ୮୭୯ କ୍ୟୁସେକ୍ ଜଳ ଜଳଭଣ୍ଡାରକୁ ପ୍ରବେଶ କରୁଛି। ଜଳସ୍ତର ଓ ଜଳପ୍ରବେଶର ପରିମାଣକୁ ବିଚାରକୁ ନେଇ ପାଞ୍ଚଟି ଗେଟ୍ ଖୋଲାଯାଇଛି। ଏହି ସମୟରେ ନଦୀରେ ସ୍ନାନ କରିବା, ମାଛ ଧରିବା କିମ୍ବା ଅନ୍ୟ କାର୍ଯ୍ୟ ପାଇଁ ପ୍ରବେଶ ନକରିବାକୁ ପ୍ରଶାସନ ପକ୍ଷରୁ ସଚେତନତା ସୃଷ୍ଟି କରାଯାଉଛି।