ସୁନାମହି ଗ୍ରାମରେ ନିଶୁଳ୍କ ସ୍ୱାସ୍ଥ୍ୟ ସେବା ଶିବିର : ଶତାଧିକ ରୋଗୀ ଉପକୃତ ।
ଆସ୍କା,୧୭/୦୫(ପିପିଟି): ବିଶିଷ୍ଟ ଭେଷଜ ବିଶେଷଜ୍ଞ, ମାନବପ୍ରେମୀ ଓ ପରୋପକାରୀ ସମାଜସେବୀ ସ୍ୱର୍ଗତ ଡାକ୍ତର ମୀହିର କାନ୍ତ ପାଣିଗ୍ରାହୀ ଏବଂ ତାଙ୍କ ଧର୍ମପତ୍ନୀ କ୍ରିଷ୍ଣା ପାଣିଗ୍ରାହୀଙ୍କ ପବିତ୍ର ସ୍ମୃତିକୁ ଚିରସ୍ମରଣୀୟ କରିବା ଉଦ୍ଦେଶ୍ୟରେ “ମିହିର କ୍ରିଷ୍ଣା ଫାଉଣ୍ଡେସନ” ଓ “ଆସ୍କା ଅଫ ଦ ନାଇଣ୍ଟିସ” (ହରିହର ହାଇସ୍କୁଲ ୧୯୯୦-୯୧ ବ୍ୟାଚ) ର ମିଳିତ ସହଯୋଗରେ ଗଞ୍ଜାମ ଜିଲ୍ଲାର ସୁନାମହି ଗ୍ରାମରେ ଏକ ନିଶୁଳ୍କ ସ୍ୱାସ୍ଥ୍ୟ ସେବା, ଚିକିତ୍ସା ଓ ସଚେତନତା ଶିବିର ସଫଳତାର ସହ ଅନୁଷ୍ଠିତ ହୋଇଯାଇଛି।
ସ୍ୱର୍ଗତ ଡାକ୍ତର ମୀହିର କାନ୍ତ ପାଣିଗ୍ରାହୀଙ୍କ ୭୬ତମ ଜନ୍ମ ଜୟନ୍ତୀ ଅବସରରେ ୧୭ ମେ ୨୦୨୬ ରବିବାର ଆୟୋଜିତ ଏହି ମହତ୍ ସେବାମୂଳକ କାର୍ଯ୍ୟକ୍ରମ ଗ୍ରାମାଞ୍ଚଳର ସାଧାରଣ ଓ ଆବଶ୍ୟକତାମନ୍ଦ ଲୋକଙ୍କ ନିକଟକୁ ଉନ୍ନତ ସ୍ୱାସ୍ଥ୍ୟସେବା ପହଞ୍ଚାଇବା ସହ ସ୍ୱାସ୍ଥ୍ୟ ସଚେତନତା ସୃଷ୍ଟି କରିବାରେ ଏକ ସାର୍ଥକ ପ୍ରୟାସ ଭାବେ ପରିଗଣିତ ହୋଇଛି।
ଏହି ଶିବିରରେ ଭୁବନେଶ୍ୱର ପି.ଜି.ଆଇ.ଏମ୍.ଇ.ଆର ଓ କ୍ୟାପିଟାଲ ହସ୍ପିଟାଲର ପ୍ରଖ୍ୟାତ ଅସ୍ଥିରୋଗ ବିଶେଷଜ୍ଞ ଡାକ୍ତର ବିଶ୍ୱକେଶ ପାଣିଗ୍ରାହୀ ଏବଂ ସାଧାରଣ ଚିକିତ୍ସକ ଡାକ୍ତର ଏନ୍. ସନ୍ତୋଷ କୁମାର ଯୋଗଦେଇ ରୋଗୀମାନଙ୍କୁ ନିଶୁଳ୍କ ପରାମର୍ଶ ଓ ଚିକିତ୍ସା ସେବା ପ୍ରଦାନ କରିଥିଲେ।
ଶିବିରରେ ବି.ଏମ୍.ଡି ପରୀକ୍ଷା, ବ୍ଲଡ ସୁଗାର ଓ ନ୍ୟୁରୋପାଥି ଟେଷ୍ଟ ସହ ନିଶୁଳ୍କ ଔଷଧ ବିତରଣ କରାଯାଇଥିଲା। ପ୍ରାୟ ୧୦୦ରୁ ଅଧିକ ରୋଗୀ ଏହି ସ୍ୱାସ୍ଥ୍ୟ ଶିବିରରୁ ଉପକୃତ ହୋଇଥିବା ବେଳେ,ବିଶେଷକରି ବୃଦ୍ଧ ଓ ଆର୍ଥିକ ଭାବେ ଅସହାୟ ଲୋକମାନେ ଏପରି ସେବା ପାଇ ଗଭୀର ସନ୍ତୋଷ ଓ କୃତଜ୍ଞତା ପ୍ରକାଶ କରିଥିଲେ।
କାର୍ଯ୍ୟକ୍ରମକୁ ସୁଚାରୁ ଓ ସଫଳ ଭାବେ ସମ୍ପନ୍ନ କରିବାରେ ସୁନାମହି ଗ୍ରାମର ସଭାପତି ଅଚ୍ୟୁତାନନ୍ଦ ପ୍ରଧାନ, ଯୋଗୀନ୍ଦ୍ର ପ୍ରଧାନ, ଦୟାନିଧି ପ୍ରଧାନ, ଅନନ୍ତ ପ୍ରଧାନ, ଗ୍ରାମର ଯୁବକମାନେ ଏବଂ “ଆସ୍କା ନାଇଣ୍ଟିସ” ର ସୁରେନ୍ଦ୍ର ପାତ୍ର, ନିରଞ୍ଜନ ସାହୁ,ସଞ୍ଜୀବ ମହାରଣା, ବଦ୍ରିନାଥ ପାତ୍ର, ଭାନୁ ପ୍ରତାପ ମହାରଣା,ବିନୋଦ ମିଶ୍ର ଓ ମନୋଜ ମିଶ୍ର ପ୍ରମୁଖଙ୍କ ଅକ୍ଳାନ୍ତ ସହଯୋଗ ଉଲ୍ଲେଖନୀୟ ରହିଥିଲା।
ସମାଜର ନିମ୍ନବର୍ଗ ଓ ଆବଶ୍ୟକତାମନ୍ଦ ଲୋକଙ୍କ ପାଇଁ ଏପରି ମାନବିକ ଓ ସେବାମୂଳକ ପ୍ରୟାସ ନିଶ୍ଚୟ ଭାବେ ଏକ ପ୍ରେରଣାଦାୟକ ପଦକ୍ଷେପ। ସ୍ଥାନୀୟ ଅଞ୍ଚଳରେ ଏହି ମହତ୍ କାର୍ଯ୍ୟକ୍ରମକୁ ବ୍ୟାପକ ପ୍ରଶଂସା କରାଯାଇଥିବା ବେଳେ, ଆଗାମୀ ଦିନରେ ମଧ୍ୟ ଏପରି ଜନହିତକର ସେବାକାର୍ଯ୍ୟ ଜାରି ରହିବ ବୋଲି ଆୟୋଜକମାନେ ଆଶା ପ୍ରକାଶ କରିଛନ୍ତି।