ବ୍ୟବହୃତ ଜଳ ପରିଚାଳନା ଉପରେ ବୈଷୟିକ ସମ୍ମିଳନୀ ।
ଭୁବନେଶ୍ୱର, ୨୪/୦୮(ପିପିଟି):ଓଡ଼ିଶା ଅର୍ବାନ କନକ୍ଲେଭ୍ ୨୦୨୬ ଅଂଶବିଶେଷ ଭାବେ ବ୍ୟବହୃତ ଜଳ ପରିଚାଳନା ଉପରେ ଆୟୋଜିତ ବୈଷୟିକ ସମ୍ମିଳନୀ ଗତକାଲି ଭୁବନେଶ୍ୱରସ୍ଥିତ ଲୋକସେବା ଭବନର ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି । ଏହି ସମ୍ମିଳନୀରେ ବରିଷ୍ଠ ସରକାରୀ ଅଧିକାରୀ, ଯନ୍ତ୍ରୀ, ନୀତି ନିର୍ଦ୍ଧାରକ, ଶିକ୍ଷାବିତ୍, ପ୍ରଯୁକ୍ତିବିତ୍ ଏବଂ ଶିଳ୍ପ ପ୍ରତିନିଧିମାନେ ଯୋଗଦେଇ ବର୍ଜ୍ୟଜଳ ବିଶୋଧନ, ପୁନଃବ୍ୟବହାର ଏବଂ ସମ୍ପଦ ପୁନରୁଦ୍ଧାର ପାଇଁ ସ୍ଥାୟୀ, ନିରାପଦ ତଥା ଆର୍ଥିକ ଦୃଷ୍ଟିକୋଣରୁ ସୁଲଭ ଉପାୟ ଉପରେ ଆଲୋଚନା କରିଥିଲେ ।
ମାନ୍ୟବର ଗୃହନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ଡଃ କୃଷ୍ଣଚନ୍ଦ୍ର ମହାପାତ୍ର ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ଦ୍ରୁତ ସହରୀକରଣ ପରିପ୍ରେକ୍ଷୀରେ ପ୍ରଭାବଶାଳୀ ବ୍ୟବହୃତ ଜଳ ପରିଚାଳନାର ବର୍ଦ୍ଧିତ ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ । ଏହି ଅବସରରେ ମାନ୍ୟବର ମନ୍ତ୍ରୀ ସ୍ଥାୟୀ ପ୍ରଯୁକ୍ତିବିଦ୍ୟା ମାଧ୍ୟମରେ ବିଶୋଧିତ ବର୍ଜ୍ୟଜଳ ଏବଂ ସ୍ଲଜ୍ (କାଦୁଅ/ଅବଶେଷ)ର ନିରାପଦ ଓ ମିତବ୍ୟୟୀ ପରିଚାଳନା ଉପରେ ଜୋର ଦେଇଥିଲେ । ଏଥିସହ ବର୍ଜ୍ୟଜଳକୁ ଆବର୍ଜନା ପରିବର୍ତ୍ତେ ଏକ ମୂଲ୍ୟବାନ ସମ୍ପଦରେ ପରିଣତ କରିପାରୁଥିବା ସମାଧାନ ଉପରେ ଅଧିକ ଧ୍ୟାନ ଦେବାକୁ ସେ ଆହ୍ୱାନ ଜଣାଇଥିଲେ ।
ସହରାଞ୍ଚଳ ବର୍ଜ୍ୟଜଳ ପରିଚାଳନାର ଆହ୍ୱାନଗୁଡ଼ିକୁ ମୁକାବିଲା କରିବା ପାଇଁ ସରକାରୀ ସଂସ୍ଥା, ବୈଷୟିକ ପ୍ରତିଷ୍ଠାନ, କ୍ଷେତ୍ରୀୟ କାର୍ଯ୍ୟକର୍ତ୍ତା ଏବଂ ପ୍ରଯୁକ୍ତିବିଦ୍ୟା ପ୍ରଦାନକାରୀଙ୍କ ମଧ୍ୟରେ ସମନ୍ୱିତ ପ୍ରୟାସର ଆବଶ୍ୟକତାକୁ ମନ୍ତ୍ରୀ ଡଃ ମହାପାତ୍ର ଦର୍ଶାଇଥିଲେ । ଏହି ଆଲୋଚନା ଜଳ ସୁରକ୍ଷା, ପରିବେଶ ସୁରକ୍ଷା ଏବଂ ସମ୍ପଦ ପୁନରୁଦ୍ଧାର ଦିଗରେ ଓଡ଼ିଶାର ଅଭିନବ ତଥା ସ୍ଥାୟୀ ପ୍ରୟାସକୁ ପ୍ରତିଫଳିତ କରିଛି ।
ଗୃହନିର୍ମାଣ ଓ ନଗର ଉନ୍ନୟନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଉଷା ପାଢ଼ୀ କେବଳ ବର୍ଜ୍ୟଜଳ ବିଶୋଧନ ଓ ନିଷ୍କାସନ ମଧ୍ୟରେ ସୀମିତ ନ ରହି ବିଶୋଧିତ ଜଳର ଯୋଜନାବଦ୍ଧ ଏବଂ ନିରାପଦ ପୁନଃବ୍ୟବହାର ଦିଗରେ ଅଗ୍ରସର ହେବା ଉପରେ ଗୁରୁତ୍ୱ ଦେଇଥିଲେ । ବିଶୋଧିତ ଜଳର ପ୍ରଭାବଶାଳୀ ପୁନଃବ୍ୟବହାରକୁ ସହଜ କରିପାରୁଥିବା ବ୍ୟବହାରିକ, ସ୍ଥାୟୀ ତଥା ବ୍ୟାପକ ସମାଧାନ ବିକଶିତ କରିବାକୁ ସେ ପ୍ରଯୁକ୍ତିବିତ୍ ଓ ବୃତ୍ତିଧାରୀମାନଙ୍କୁ ଆହ୍ୱାନ ଦେଇଥିଲେ। ସ୍ଥାୟୀ ସହରାଞ୍ଚଳ ଜଳ ପରିଚାଳନାର ଏକ ଅବିଚ୍ଛେଦ୍ୟ ଅଙ୍ଗ ଭାବେ ବିଶୋଧିତ ବର୍ଜ୍ୟଜଳକୁ ଗ୍ରହଣ କରିବା ପାଇଁ ଅଧିକ ସୁଦୃଢ଼ ବୈଷୟିକ ଓ ପ୍ରତିଷ୍ଠାନଗତ ପଦକ୍ଷେପ ଉପରେ ସେ ଗୁରୁତ୍ୱାରୋପ କରିଥିଲେ ।
ଏହି ସମ୍ମିଳନୀ ଜାତୀୟ ଦୃଷ୍ଟିକୋଣ, ରାଜ୍ୟସ୍ତରୀୟ ଅନୁଭୂତି ଏବଂ ବୈଷୟିକ ଦକ୍ଷତାକୁ ଏକତ୍ର କରିଥିଲା ।
ସିପିଏଚଇଇଓ (CPHEEO)ର ଡଃ ଭି. କେ. ଚୌରାସିଆ ଜାତୀୟ ସ୍ତରର ଉତ୍କୃଷ୍ଟ ଅଭ୍ୟାସ, ପ୍ରଯୁକ୍ତିବିଦ୍ୟା, ନୀତିଗତ ଦୃଷ୍ଟିକୋଣ ଏବଂ ବ୍ୟବହୃତ ଜଳ ପରିଚାଳନାର ଭବିଷ୍ୟତ ଦୃଷ୍ଟିକୋଣ ଉପରେ ନିଜର ମତାମତ ଉପସ୍ଥାପନ କରିଥିଲେ ।
ଓଡ଼ିଶା ସରକାରଙ୍କ ପକ୍ଷରୁ ଗୃହନିର୍ମାଣ ଓ ନଗର ଉନ୍ନୟନ ବିଭାଗର ଯନ୍ତ୍ରୀ ପ୍ରଶାନ୍ତ କୁମାର ମହାପାତ୍ର ବ୍ୟବହୃତ ଜଳ ପରିଚାଳନା କ୍ଷେତ୍ରରେ ରାଜ୍ୟର ଅନୁଭୂତି ସହିତ କେତେକ ନିର୍ଦ୍ଦିଷ୍ଟ ସ୍ୱରେଜ ଟ୍ରିଟମେଣ୍ଟ ପ୍ଲାଣ୍ଟ ପ୍ରକଳ୍ପର କାର୍ଯ୍ୟାନ୍ୱୟନ ସମ୍ପର୍କରେ ତଥ୍ୟ ରଖିଥିଲେ । ଓଡ଼ିଶାରେ ବର୍ଜ୍ୟଜଳ ବିଶୋଧନ ଭିତ୍ତିଭୂମିରୁ ଉଭା ହେଉଥିବା ବ୍ୟବହାରିକ ଆହ୍ୱାନ ଏବଂ ଶିକ୍ଷା ସମ୍ପର୍କରେ ସେ ଆଲୋକପାତ କରିଥିଲେ ।
ଏହି ଅଧିବେଶନ ସ୍ଲଜ୍ ପରିଚାଳନା ଏବଂ ସମ୍ପଦ ପୁନରୁଦ୍ଧାର ଉପରେ କେନ୍ଦ୍ରୀଭୂତ ଥିଲା । ଆଇଆଇଟି ପାଲକ୍କାଡର ଡଃ ଗୁରୁପ୍ରସାଦ ତାଲେକର ଏବଂ ତାଙ୍କ ଦଳ ଏସଟିପି/ଏଫଏସଟିପି ସ୍ଲଜ୍ ପରିଚାଳନାର ଅଗ୍ରଗତି, ଅତ୍ୟାଧୁନିକ ପ୍ରଯୁକ୍ତିବିଦ୍ୟା ଏବଂ ଭାରତରେ ବାୟୋ-ସଲିଡ୍ସ ମାନକ ସମ୍ପର୍କିତ ବିକାଶ ଉପରେ ଉପସ୍ଥାପନା କରିଥିଲେ । ପାରମ୍ପରିକ ନିଷ୍କାସନ ପ୍ରକ୍ରିୟାର ପରିବେଶୀୟ ପ୍ରଭାବକୁ ହ୍ରାସ କରିବା ସହିତ ସ୍ଲଜ୍ରୁ ମୂଲ୍ୟବାନ ସମ୍ପଦ ଉଦ୍ଧାର କରିବାର ସମ୍ଭାବନାକୁ ଏହି ଅଧିବେଶନରେ ଦର୍ଶାଯାଇଥିଲା ।
ଆଇଆଇଟି ରୁରକିର ହାଇଡ୍ରୋଲୋଜି ବିଭାଗର ପ୍ରଫେସର ଭାସ୍କର ଜ୍ୟୋତି ଡେକା ପୁନଃବ୍ୟବହାର ଏବଂ ସମ୍ପଦ ପୁନରୁଦ୍ଧାର ପାଇଁ ଅଭିନବ ବର୍ଜ୍ୟଜଳ ବିଶୋଧନ ପ୍ରକ୍ରିୟା ଉପରେ ବକ୍ତବ୍ୟ ରଖିଥିଲେ । ତାଙ୍କ ଉପସ୍ଥାପନାରେ ବିଶୋଧନ ଦକ୍ଷତା ବୃଦ୍ଧି ଏବଂ ବିଶୋଧିତ ଜଳର ନିରାପଦ ପୁନଃବ୍ୟବହାର ତଥା ସମ୍ପଦ ପୁନରୁଦ୍ଧାରର ସୁଯୋଗ ସୃଷ୍ଟି କରିବା ପାଇଁ ନୂତନ ଦୃଷ୍ଟିକୋଣ ଉପରେ ଆଲୋକପାତ କରାଯାଇଥିଲା ।
ଆଇଆଇଟି ଭୁବନେଶ୍ୱରର ପ୍ରଫେସର ରାଜେଶ ରୋଶନ ଦାଶ ନୂତନ ଏରୋବିକ୍ ଏବଂ ଅନ୍-ଏରୋବିକ୍ ବର୍ଜ୍ୟଜଳ ବିଶୋଧନ ପ୍ରକ୍ରିୟା ଏବଂ ସହରାଞ୍ଚଳ ବର୍ଜ୍ୟଜଳ ପରିଚାଳନାର ପରିବର୍ତ୍ତିତ ଆବଶ୍ୟକତା ପୂରଣ କରିବାରେ ଏହାର ପ୍ରୟୋଗ ଉପରେ ଆଲୋଚନା କରି ବୈଷୟିକ ଅଧିବେଶନକୁ ଅଧିକ ଫଳପ୍ରଦ କରିଥିଲେ ।
ବର୍ଜ୍ୟଜଳ ପୁନଃବ୍ୟବହାରର ନୀତି ଓ ଯୋଜନାଗତ ଦିଗ ଉପରେ ମଧ୍ୟ ଆଲୋଚନା ହୋଇଥିଲା । କାଉନସିଲ ଅନ୍ ଏନର୍ଜି, ଏନଭାଇରନମେଣ୍ଟ ଆଣ୍ଡ ୱାଟରର ଡଃ ନୀତିନ ବାସି ବିଶୋଧିତ ବର୍ଜ୍ୟଜଳର ପୁନଃବ୍ୟବହାର ସମ୍ପର୍କିତ ନୀତି ଉପରେ ମତ ରଖିଥିବା ବେଳେ ସେଣ୍ଟର ଫର ସାଇନ୍ସ ଆଣ୍ଡ ଏନଭାଇରନମେଣ୍ଟର ଶ୍ରୀ ସୁବ୍ରତ ଚକ୍ରବର୍ତ୍ତୀ ବିଶୋଧିତ ଜଳର ନିରାପଦ ତଥା ପ୍ରଭାବଶାଳୀ ପୁନଃବ୍ୟବହାର କ୍ଷେତ୍ରରେ ଥିବା ଯୋଜନାଗତ ଆହ୍ୱାନ ବିଷୟରେ କହିଥିଲେ ।
ଏହି ସମ୍ମିଳନୀରେ ସହରାଞ୍ଚଳ ଡ୍ରେନେଜ୍ ଏବଂ ସମନ୍ୱିତ ଜଳ ଭିତ୍ତିଭୂମି ବିଷୟ ମଧ୍ୟ ସ୍ଥାନ ପାଇଥିଲା । ଓଡ଼ିଶା ସରକାରଙ୍କ ଜଳସମ୍ପଦ ବିଭାଗର ଇଞ୍ଜିନିୟର-ଇନ୍-ଚିଫ୍ ଇଂ. ଅବିନାଶ ରାଉଳ ଅଭିନବ ସହର ଡ୍ରେନେଜ୍ ବ୍ୟବସ୍ଥା ଏବଂ ସ୍ଥାୟୀ ସହରାଞ୍ଚଳ ଜଳ ପରିଚାଳନାରେ ଏହାର ଭୂମିକା ଉପରେ ଉପସ୍ଥାପନା କରିଥିଲେ ।
ବୈଷୟିକ ଆଲୋଚନା ପରେ ଏକ ଶିଳ୍ପ ପ୍ରଦର୍ଶନୀ (ଟେକ୍ନୋଲୋଜି ପିଚ୍) ଅନୁଷ୍ଠିତ ହୋଇଥିଲା; ଯେଉଁଥିରେ ସ୍ୱଳ୍ପ ଜମି ଆବଶ୍ୟକ କରୁଥିବା ଏସଟିପି ପ୍ରଯୁକ୍ତି, ବିକେନ୍ଦ୍ରୀକୃତ ବର୍ଜ୍ୟଜଳ ବିଶୋଧନ, ବର୍ଜ୍ୟଜଳ ପରିବହନ, ଇଟିପି ଓ ଏସଟିପି ପ୍ରଯୁକ୍ତିବିଦ୍ୟା, ଏରେଟେଡ୍ ୱେଟଲ୍ୟାଣ୍ଡ, ପୋଖରୀ ଓ ନାଳର ସ୍ଥାନୀୟ ପୁନରୁଦ୍ଧାର ଏବଂ ଯାନ୍ତ୍ରିକ ସ୍ୱରେଜ୍ ଓ ସ୍ଲଜ୍ ପରିଚାଳନାର ଅଭିନବ ସମାଧାନ ପ୍ରଦର୍ଶିତ ହୋଇଥିଲା ।
ବ୍ୟବହୃତ ଜଳ ପରିଚାଳନା କ୍ଷେତ୍ରରେ ନୀତି, ପ୍ରଯୁକ୍ତିବିଦ୍ୟା, ଗବେଷଣା ଏବଂ କାର୍ଯ୍ୟାନ୍ୱୟନର ଦୃଷ୍ଟିକୋଣକୁ ଏକତ୍ର କରିବା ପାଇଁ ଏହି ସମ୍ମିଳନୀ ଏକ ଗୁରୁତ୍ୱପୂର୍ଣ୍ଣ ମଞ୍ଚ ପ୍ରଦାନ କରିଥିଲା । ସହରାଞ୍ଚଳ ଜଳ ପରିଚାଳନାର ଭବିଷ୍ୟତ କେବଳ ପ୍ରଭାବଶାଳୀ ବର୍ଜ୍ୟଜଳ ବିଶୋଧନ ଉପରେ ନୁହେଁ, ବରଂ ଏହାର ନିରାପଦ ପୁନଃବ୍ୟବହାର ଏବଂ ସମ୍ପଦ ପୁନରୁଦ୍ଧାର ଉପରେ ନିର୍ଭର କରେ ବୋଲି ଆଲୋଚନାରେ ଗୁରୁତ୍ୱ ଦିଆଯାଇଥିଲା ।
ଏହି ସମ୍ମିଳନୀର ମୁଖ୍ୟ ବାର୍ତ୍ତା ଥିଲା ଉପଯୁକ୍ତ ନୀତି, ଅଭିନବ ପ୍ରଯୁକ୍ତିବିଦ୍ୟା, ସୁଦୃଢ଼ ଯୋଜନା ଏବଂ ସରକାର, ଶିକ୍ଷାନୁଷ୍ଠାନ, ଶିଳ୍ପସଂସ୍ଥା ତଥା ପ୍ରଯୁକ୍ତିବିତ୍ମାନଙ୍କ ମିଳିତ ସହଯୋଗରେ “ବିଶୋଧନ ଏବଂ ନିଷ୍କାସନ” ପଦ୍ଧତିରୁ “ବିଶୋଧନ, ପୁନଃବ୍ୟବହାର ଏବଂ ପୁନରୁଦ୍ଧାର” ମଡେଲ ଆଡ଼କୁ ଅଗ୍ରସର ହେବା । ଏପରି ଦୃଷ୍ଟିକୋଣ ଓଡ଼ିଶାର ସହରାଞ୍ଚଳ ଜଳ ସୁରକ୍ଷା, ପରିବେଶଗତ ସ୍ଥିରତା ଏବଂ ଏକ ଚକ୍ରାକାର ଜଳ ଅର୍ଥବ୍ୟବସ୍ଥା (circular water economy) ଦିଗରେ ପରିବର୍ତ୍ତନକୁ ଯଥେଷ୍ଟ ସୁଦୃଢ଼ କରିପାରିବ ।
ଇଆଇସି (ଜନସ୍ୱାସ୍ଥ୍ୟ) ଇଂ. ବିଳାସ ବେହେରା, ୱାଟକୋ ପରିଚାଳନା ନିର୍ଦ୍ଦେଶକ ଇଂ. ଦେବବ୍ରତ ମହାନ୍ତି ଏବଂ ଇଆଇସି ଇଂ. ଭାଗ୍ୟଧର ମହାନ୍ତି ଏହି ସମ୍ମିଳନୀକୁ ପରିଚାଳନା କରିଥିଲେ।