ଘାଟି ପଲି ଗ୍ରାମରେ ସଶସ୍ତ୍ର ଡକାୟତି ।

ଭଞ୍ଜନଗର, ୦୭/୦୭(ପିପିଟି):ତାରସିଂ ଥାନା ଅନ୍ତର୍ଗତ କୁଡୁତେଇ ପଞ୍ଚାୟତ ଘାଟି ପଲି ଗ୍ରାମରେ ଗୁରୁବାର ବିଳମ୍ବିତ ରାତ୍ରିରେ ସଶସ୍ତ୍ର ଡକାୟତି ଘଟିଥିବା ଜଣାପଡିଛି। ୬ଜଣ ଡକାୟତ ଏହି ଗ୍ରାମର ଜଣେ ଚାଷୀ ନବୀନ କୁମାର ନାୟକଙ୍କ ଘରେ ପଶି ଖଣ୍ଡା, ଭୁଜାଲି ଓ ପିସ୍ତଲ ଦେଖାଇ ପରିବାର ଲୋକଙ୍କୁ ଭୟଭୀତ କରି ଗୋଟିଏ ଘରେ ପୁରାଇ ବାହାରୁ କବାଟ ବନ୍ଦ କରି ଦେଇଥିଲେ।ଏହାପରେ ଆଲମୀରାରେ ଥିବା ନଗଦ ୬ଲକ୍ଷ ୪୦ହଜାର ଟଙ୍କା ସମେତ ୧୫ଭରି ସୁନା ଗହଣା ଦୁର୍ବୁତ୍ତମାନେ ଲୁଟି ନେଇ ପଳେଇଥିଲେ।ଏସମ୍ପର୍କରେ ନବୀନ ତାରସିଂ ଥାନାରେ ଅଭିଯୋଗ କରିବା ପରେ ପୁଲିସ କେସ ନଂ ୨୨୩/୨୩ରେ ଏକ ମାମଲା ରୁଜୁ କରିଥିଲା।ଛତ୍ରପୁରରୁ ସାଇଣ୍ଟିଫିକ ଟିମ ଓ ସନ୍ଧାନୀ କୁକୁର ଆସି ଘଟଣା ସ୍ଥଳରେ ପହଞ୍ଚି ତଦନ୍ତ କରି ଫେରିଥିବା ଜଣାପଡିଛି।ଏଭଳି ଏକ ବଡ଼ ଧରଣର ଡକାୟତି ଘଟଣା ଉକ୍ତ ଅଞ୍ଚଳରେ ଘଟିଥିବାରୁ ସ୍ଥାନୀୟ ଲୋକମାନେ ଭୟଭୀତ ଅବସ୍ଥାରେ ଅଛନ୍ତି।