ହିଞ୍ଜିଳିକାଟୁ ସରସ୍ୱତୀ ଶିଶୁ ବିଦ୍ୟା ମନ୍ଦିରରେ ଜନ୍ମାଷ୍ଟମୀ ପାଳିତ ।

ହିଞ୍ଜିଳିକାଟୁ ,୦୬/୦୯(ପିପିଟି):ହିଞ୍ଜିଳିକାଟୁ ପୌର ପରିଷଦ ଆଙ୍କୋରଡ଼ା ସ୍ଥିତ ସରସ୍ୱତୀ ଶିଶୁ ବିଦ୍ୟା ମନ୍ଦିରରେ ଶ୍ରୀକୃଷ୍ଣ ଜନ୍ମାଷ୍ଟମୀ ଉତ୍ସବ ଆଡମ୍ବର ସହ ପାଳିତ ହୋଇଯାଇଛି ।ଏହି ଅବସରରେ ଛୋଟ ଛୋଟ ଶିଶୁ ମାନେ କୃଷ୍ଣ ଓ ରାଧା ବେଶରେ ସଜ୍ଜିତ ହୋଇ ଉତ୍ସବରେ ଯୋଗ ଦେଇଥିଲେ ।ପ୍ରାୟୋଜିତ କାର୍ଯ୍ୟକ୍ରମରେ ପ୍ରଥମେ ଅନୁଷ୍ଠାନର ଶିଶୁ ଓ ଭାଇ ଭଉଣୀ ମାନେ ବିଦ୍ୟା ମନ୍ଦିର ନିକଟସ୍ଥ ଚନ୍ଦ୍ର କଳ୍ପେଶ୍ୱର ମନ୍ଦିରରେ ସାମୁହିକ ପୂଜାରେ ଯୋଗ ଦେଇଥିଲେ । ପରେ ପରେ ଶିଶୁ ବିଦ୍ୟା ମନ୍ଦିର ପ୍ରାଙ୍ଗଣରେ ଆୟୋଜିତ ଜନ୍ମାଷ୍ଟମୀ ଉତ୍ସବ କାର୍ଯ୍ୟକ୍ରମରେ ଯୋଗ ଦେବା ସହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ କରାଯାଇଥିଲା । ଏହି ଆୟୋଜିତ ଜନ୍ମାଷ୍ଟମୀ ଉତ୍ସବରେ ମୁଖ୍ୟ ବକ୍ତା ଭାବେ ପ୍ରାକ୍ତନ ଶିକ୍ଷାବିତ୍ ଶ୍ରୀ ପଦ୍ମ ନାଭ ତ୍ରିପାଠୀ ଯୋଗ ଦେବା ସହ ଦୀପ ପ୍ରଜ୍ବଳନ ପୂର୍ବକ ଉତ୍ସବ କାର୍ଯ୍ୟକ୍ରମକୁ ଉଦଘାଟନ କରିଥିଲେ । ମୁଖ୍ୟ ଅତିଥି ରୂପେ ଶିକ୍ଷାବିତ୍ ଶ୍ରୀ ପ୍ରମୋଦ କୁମାର ପଣ୍ଡିତ ଯୋଗ ଦେଇଥିଲେ । ବିଦ୍ୟା ମନ୍ଦିରର ପ୍ରଧାନ ଆଚାର୍ଯ୍ୟ ଚଣ୍ଡୀ ପ୍ରସାଦ ବେହେରା ଅତିଥିମାନଙ୍କ ପରିଚୟ ପ୍ରଦାନ ସହ ପାରମ୍ଭିକ ଭାଷଣ ପ୍ରଦାନ କରିଥିଲେ । ମୁଖ୍ୟ ଅତିଥି, ମୁଖ୍ୟ ବକ୍ତାଙ୍କ ସହ ଶିଶୁ ବିଦ୍ୟା ମନ୍ଦିରର ବରିଷ୍ଠା ଗୁରୁମା ପ୍ରତିମା ପଟ୍ଟନାୟକ ଶ୍ରୀକୃଷ୍ଣଙ୍କ ଜନ୍ମ ବୃତ୍ତାନ୍ତ ବିଷୟରେ ଶିଶୁ ମାନଙ୍କୁ ଆଲୋକପାତ କରାଇଥିଲେ । କୃଷ୍ଣ ଓ ରାଧା ବେଶ ଧାରୀ ମାନଙ୍କୁ ମନ୍ଦିର ଭ୍ରମଣ ସହ ଦହି ହାଣ୍ଡି ଭଙ୍ଗା ଓ ଦୋଳିରେ ଝୁଲିବା କାର୍ଯ୍ୟକ୍ରମ କରାଯାଇଥିଲା । ମାତୃମଣ୍ଡଳୀ ଓ ଗୁରୁମା ମାନେ ଶିଶୁ ମାନଙ୍କୁ ବନ୍ଦାପନା କରିଥିଲେ । ପରିଶେଷରେ ଗୀତ ନାଚ ସହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା । ଆଜିର ଦିନଟି ବିଦ୍ୟାଳୟ ପରିସର ଆନନ୍ଦ ମୁଖର ହୋଇଥିବା ଦେଖିବାକୁ ମିଳିଥିଲା ।ସମସ୍ତ ଗୁରୁଜୀ ,ଗୁରୁମାଙ୍କ ଉତ୍ସାହ ଓ କାର୍ଯ୍ୟ ଦକ୍ଷତା ଅନୁସାରେ କାର୍ଯ୍ୟକ୍ରମକୁ ଶୃଙ୍ଖଳାର ସହ ଅତି ସୁନ୍ଦର ଭାବେ ସମାପନ ହୋଇଥିଲା । ପରିଶେଷରେ ବିଦ୍ୟାଳୟର ସମିତି କୋଷାଧ୍ୟକ୍ଷ ସଞ୍ଜୟ କୁମାର ପଣ୍ଡା ଦ୍ୱାରା ଧନ୍ୟବାଦ ଅର୍ପଣ ସହ ଉତ୍ସବ କାର୍ଯ୍ୟକ୍ରମ ଶେଷ କରାଯାଇଥିଲା ।

ରିପୋର୍ଟ-ଅଜିତ କୁମାର ପଟ୍ଟନାୟକ