ମୁଦୁଲିପଡା ଓ ଅଣ୍ଡ୍ରାହାଲର ଭୋଟରଙ୍କୁ ନେଇ ସ୍ୱତନ୍ତ୍ର ସଚେତନତା ଶିବିର  ।

ମାଲକାନଗିରି।ତା: ୦୭/୦୯(ପିପିଟି): ଭୋଟର ସଚେତନତା (ସ୍ଵିପ୍) କାର୍ଯ୍ୟକ୍ରମ ଅଧିନରେ ପିଭିଟିଜି ଯୁବଗୋଷ୍ଠୀଙ୍କୁ ସଚେତନ କରିବା ନେଇ ଖଇରପୁଟ ବ୍ଲକ ମୁଦୁଲିପଡା ଏବଂ ଅଣ୍ଡ୍ରାହାଲ ଗ୍ରାମ ପଞ୍ଚାୟତରେ ସ୍ୱତନ୍ତ୍ର ଶିବିର ଆୟୋଜନ କରାଯାଇଛି। ନିର୍ବାଚନ ପଞ୍ଜୀକରଣ ଅଧିକାରୀ ତଥା ଉପଜିଲ୍ଲାପାଳ ଡ଼ଃ ଅକ୍ଷୟ କୁମାର ଖେମୁଣ୍ଡୁ ମୁଖ୍ୟ ଅତିଥି ଭାବେ ଯୋଗ ଦେଇ ଏହି ଶିବିରକୁ ଉଦ୍ଘାଟନ କରିଥିଲେ। ଏହି ଅବସରରେ ସେ କହିଥିଲେ ଯେ ଭୋଟ ଦେବାର ମୌଳିକ ଅଧିକାର ସମସ୍ତଙ୍କର ରହିଛି । ଯାହା ଗଣତନ୍ତ୍ରକୁ ସୁଦୃଢ କରିବାରେ ସହାୟକ ହୋଇଥାଏ। ସେ ଆହୁରି ମଧ୍ୟ କହିଛନ୍ତି ଯେ ରାଜ୍ୟ ସରକାର ଆଦିମ ଜନଜାତିଙ୍କ ସର୍ବାଙ୍ଗୀନ ଉନ୍ନତି ନିମନ୍ତେ ଅନେକ ପଦକ୍ଷେପ ନେଇଛନ୍ତି। ତେଣୁ ଯେପରି ଅଧିକରୁ ଅଧିକ ପିଭିଟିଜି ଯୁବକ ଯୁବତୀ ଭୋଟର ତାଲିକାରେ ନାମ ପଞ୍ଜୀକରଣ କରିବେ ସେଥି ନିମନ୍ତେ ପ୍ରଶାସନ ପକ୍ଷରୁ ସମସ୍ତ ପଦକ୍ଷେପ ଗ୍ରହଣ କରାଯାଉଛି । ଫର୍ମ-୬ ମାଧ୍ୟମରେ ଯୋଗ, ଫର୍ମ-୭ ମାଧ୍ୟମରେ ଆବେଦନ ଓ ତୃଟି ସଂଶୋଧନ ଓ ଫର୍ମ-୮ ମାଧ୍ୟମରେ ସ୍ଥାନାନ୍ତରଣ ଓ ଭୋଟର ପରିଚୟ ପତ୍ର ସଂଶୋଧନ ନିମନ୍ତେ ଆବେଦନ କରିପାରିବେ ବୋଲି ସେ ଏଠାରେ ସୂଚନା ଦେଇଥିଲେ। ଏହି ଶିବିରରେ ଫର୍ମ-୬ ମାଧ୍ୟମରେ ୧୭୯ ଜଣ ବ୍ୟକ୍ତି ଯୋଗ ନିମନ୍ତେ ଆବେଦନ କରିଛନ୍ତି। ସେହିପରି ଫର୍ମ-୮ ରେ ୩୫ ଜଣ ସ୍ଥାନାନ୍ତରଣ ଓ ଭୋଟର ପରିଚୟ ପତ୍ର ସଂଶୋଧନ ନିମନ୍ତେ ଆବେଦନ କରିଛନ୍ତି। ସର୍ବମୋଟ ଏହି ଶିବିରରେ ୨୧୪ ଟି ଫର୍ମ ସଂଗ୍ରହ କରାଯାଇଥିଲା । ସୂଚନା ଥାଉ କି ୯ଟି ବୁଥର ଭୋଟରମାନେ ଏଥିରେ ଯୋଗ ଦେଇଥିଲେ।
ଏହି ଶିବିରରେ ଉପନିର୍ବାଚନ ପଞ୍ଜୀକରଣ ଅଧିକାରୀ ତଥା ଖଇରପୁଟ ଗୋଷ୍ଠୀ ଉନ୍ନୟନ ଅଧିକାରୀ ଉମାଶଙ୍କର କୋୟା, ମାଲକାନଗିରି ଗୋଷ୍ଠୀ ଉନ୍ନୟନ ଅଧିକାରୀ ପ୍ରଭାତୀ ଝୋଡିଆ, ସହାୟକ ଜିଲ୍ଲାପାଳ ଆଶୋକ ଚକ୍ରବର୍ତ୍ତୀ, ବଣ୍ଡା ଉନ୍ନୟନ କର୍ତ୍ତୃପକ୍ଷ (ବିଡ଼ିଏ) ସଲମାନ୍ ରାଇକା, ଜିପିଇଓ ତଥା ବ୍ଲକ ସାମାଜିକ ସୁରକ୍ଷା ଅଧିକାରୀ ଜ୍ୟୋତି ରଞ୍ଜନ ସେଠୀ, ବୁଥ୍ ଲେବେଲ୍ ଅଧିକାରୀ, ବୁଥ୍ ଲେବେଲ୍ ସୁପର ଭାଇଜର ଏବଂ ବିଡ଼ିଏ କର୍ମଚାରୀ ଉପସ୍ଥିତ ଥିଲେ।

(ରିପୋର୍ଟ: ବରିଷ୍ଠ ସାମ୍ବାଦିକ କେଶବ ଚନ୍ଦ୍ର ନାୟକ, ମାଲକାନଗିରି)