ଭଞ୍ଜନଗର ଏନ୍ଏସି ରେ ବିଜେଡ଼ିର ବିଜୟ ଉତ୍ସବ ।

ଭଞ୍ଜନଗର,୨୭/୦୩(ପିପିଟି): ଭଞ୍ଜନଗର ବିଜ୍ଞାପିତ ଅଞ୍ଚଳ ପରିଷଦ ପାଇଁ ହୋଇଥିବା ନିର୍ବାଚନରେ ବିଧାୟକ ତଥା ମନ୍ତ୍ରୀ ବିକ୍ରମ କେଶରୀ ଆରୁଖଙ୍କ ନେତୃତ୍ୱରେ ବିଜେଡ଼ି ନଗରପାଳ ସମେତ ସମସ୍ତ ୧୫ଟି ୱାର୍ଡର କାଉନସିଲର ମାନେ ଏକପାଖିଆ ଭାବେ ବିଜୟ ଲାଭ କରିଛନ୍ତି। ଏହା ବିଜେଡ଼ି ପାଇଁ ଏକ ପ୍ରକାର ଖୁସି ଆଣିଦେଇଛି।ଯାହାକୁ ନେଇ ଉଭୟ ନେତା ଓ କର୍ମୀମାନେ ରବିବାର ଅପରାହ୍ନରେ ଏକାଠି ହୋଇ ବିଜୟ ଉତ୍ସବ ପାଳନ କରିଥିଲେ। ଏହି ପରିପ୍ରେକ୍ଷୀରେ ଏକ ଶୋଭାଯାତ୍ରା ସ୍ଥାନୀୟ
ରାମ ନାରାୟଣ ସିଂ ମାର୍କେଟ କମ୍ପ୍ଲେକ୍ସ ଠାରୁ ଆରମ୍ଭ ହୋଇ ମେନ ରୋଡ, ସେଠାରୁ ପୁରୁଣା ବଜାର ସାହି, ଡେରା ସାହି, ନାରାୟଣ ମନ୍ଦିର ସାହିର ପଲ୍ଲୀବାସୀ ପ୍ରେସ ଛକ ପର୍ଯ୍ୟନ୍ତ, ଶିବାନନ୍ଦ ସାହି, ମସଜିଦ ଛକ, ଭଞ୍ଜମାର୍ଗ, ଶ୍ରୀରାମ ମନ୍ଦିର ସାହି, ନାହାତୋଠ ସାହି, ବଡଧୋବା ସାହି, ମହାନ୍ତି ସାହି, ତହସିଲ ଅଫିସ ଛକ, ମେନ ରୋଡ, ଆର.ସି ରୋଡ, ଷ୍ଟେଟ ବ୍ୟାଙ୍କ ଛକ, ଭେଜିପୁଟ ମେନ ରୋଡ ଦେଇ ବାଇପାସ ଛକରେ ଶେଷ ହୋଇଥିଲା। ଏଥିରେ ମନ୍ତ୍ରୀ ବିକ୍ରମ କେଶରୀ ଆରୁଖ, ବିଜେଡ଼ିର ନବ ନିର୍ବାଚିତ ନଗରପାଳ ଗୋପବନ୍ଧୁ ମହାପାତ୍ର ଓ ସମସ୍ତ ୱାର୍ଡର କାଉନସିଲର ମାନେ ବିପୁଳ ପରିମାଣରେ ଭୋଟ ଦେଇ ବିଜୟୀ କରିଥିବା ଭୋଟର ମାନଙ୍କୁ କୃତଜ୍ଞତା ଜ୍ଞାପନ କରିଥିଲେ। ଅନ୍ୟ ମାନଙ୍କ ମଧ୍ୟରେ ସାଂସଦ ପ୍ରତିନିଧି ଦିବାକର ନାୟକ, ଏନଏସି ସଭାପତି ରାଜେନ୍ଦ୍ର ବିଷୋୟୀ,ପୂର୍ବତନ ନଗର ପାଳ ସୁଧୀର ରଞ୍ଜନ ବେହେରା,ଚିଦାନନ୍ଦ ସ୍ଵାଇଁଙ୍କ ସମେତ ବହୁ ଦଳୀୟ ନେତା ଓ କର୍ମୀମାନେ ଏଥିରେ ସାମିଲ ହୋଇଥିଲେ।
(ରିପୋର୍ଟ- ଜୟକୃଷ୍ଣ ପଟ୍ଟନାୟକ। )