ବିଶ୍ବ ହୃତପିଣ୍ଡ ଦିବସରେ ସଚେତନତା ।

ଆଠଗଡ,୨୯/୦୯: ଆଠଗଡ ବ୍ଲକର ବ୍ରହ୍ମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିନ ଯୋରନ୍ଦା ସେକ୍ଟରର ଗାଁ କଲ୍ଯାଣ ସମିତି ସମୁହ ଆନୁକୂଲ୍ୟରେ ରବିବାର ବିଶ୍ବ ହୃତପିଣ୍ଡ ଦିବସ ପାଳିତ ହୋଇଯାଇଛି । ବରିଷ୍ଠ ବହୁମୁଖୀ ସ୍ଵାସ୍ଥ୍ଯ ପରିଦର୍ଶକ ମହମ୍ମଦ ଅସଲମଙ୍କ ସଂଯୋଜନାରେ ଅନୁଷ୍ଠିତ କାର୍ଯ୍ୟକ୍ରମରେ ଡାକ୍ତର ସିଦ୍ଧାର୍ଥ ବେହେରା ଯୋଗଦେଇ ହୃତପିଣ୍ଡ ଆମ ଶରୀରର ଏକ ଗୁରୁତ୍ୱପୂର୍ଣ୍ଣ ଅଙ୍ଗ ହୋଇଥିବାରୁ ଏହା ଉପରେ ଜୀବନ ନିର୍ଭରଶୀଳ ବୋଲି କହିବା ସହ ଏହାର କିପରି ଯତ୍ନ ନିଆଯାଇପାରିବ ସେ ସମ୍ପର୍କରେ ବୁଝାଇଥିଲେ । ସ୍ଵାସ୍ଥ୍ଯ ପରିଦର୍ଶକ ଶ୍ରୀ ଅସଲମ୍ ୩୦ ବର୍ଷ ହେବା ପରେ ପରେ ସମସ୍ତେ ନିଜ ହୃଦୟର ସ୍ଥିତି ଜାଣିବା ଲାଗି ଡାକ୍ତରଙ୍କୁ ପରାମର୍ଶ କରିବା ଏବଂ ନିୟମିତ ରକ୍ତ ଶର୍କରା, ରକ୍ତଚାପ ଓ କୋଲେଷ୍ଟରଲ ମାତ୍ରା ଜାଣିବା ପାଇଁ ପରୀକ୍ଷା କରାଇବା, ମାଦକ ଦ୍ରବ୍ଯ ସେବନରୁ ବିରତ ରହିବା ଦରକାର ବୋଲି ମତବ୍ୟକ୍ତ କରିଥିଲେ । ବ୍ରହ୍ମପୁର ସିଏଚସି ଅଧିକ୍ଷକ ଡାକ୍ତର ଦିଲ୍ଲୀପ ଦାସଙ୍କ ନିର୍ଦ୍ଦେଶରେ ସେଠାରେ ଏକ ହୃଦୟ ପରୀକ୍ଷା ଶିବିର ଆୟୋଜନ କରାଯାଇଥିଲେ । ସେଥିରେ ବହୁ ଲୋକ ବିଶେଷକରି ବରିଷ୍ଠ ନାଗରିକଙ୍କର ହୃଦୟର ସ୍ଥିତି ଜାଣିବା ଲାଗି ବିଭିନ୍ନ ପରୀକ୍ଷା କରିଯିବା ସହ ପରାମର୍ଶ ଦିଆଯାଇଥିଲା । ସ୍ଵାସ୍ଥ୍ଯ ପରିଦର୍ଶିକା ବିଚିତ୍ରପ୍ରଭା ଦେଇଙ୍କ ଏବଂ ସମସ୍ତ ଅଙ୍ଗନୱାଡି ଓ ଆଶାକର୍ମୀଙ୍କ ସମେତ ଗାଁ କଲ୍ଯାଣ ସମିତିର ସଦସ୍ଯମାନେ ଯୋଗଦେଇ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ । ଶେଷରେ ଏକ ସଚେତନତା ଶୋଭାଯାତ୍ରା ଯୋରନ୍ଦା ଗ୍ରାମ ପରିକ୍ରମା କରିଥିଲା ।