ଦୁର୍ଘଟଣା ଘଟାଇ ଫେରାର ମାରୁଥିବା ସମୟରେ କାରରେ ଲାଗିଲା ନିଆଁ ।

ସୁବର୍ଣ୍ଣପୁର ,୦୫/୧୨(ପିପିଟି) : ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର – ସୁବଳୟା ମୁଖ୍ୟ ରାସ୍ତା ବାଗବର ତାରିଣୀ ଛକ ଠାରୁ କିଛି ଦୂରରେ ଆଜି ଅପରାହ୍ନ ସମୟରେ ସାଇକେଲ ଆରୋହୀ ଙ୍କୁ ଏକ କାର ପଛପଟୁ ଧକ୍କା ଦେବାରୁ ଦୁର୍ଘଟଣା ଘଟିଥିଲା। ସେଠାରେ ସାଇକେଲ ଆରୋହୀ ଗୁରୁତର ଅବସ୍ଥାରେ ରାସ୍ତା ଉପରେ ପଡ଼ିଥିଲେ। ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ। ଏବଂ ତାଙ୍କର ଅବସ୍ଥା ସଂକଟାପନ୍ନ ହେବାରୁ ସୋନପୁର ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି। ଗୁରୂତର ସାଇକେଲ ଆରୋହୀ ଜଣକ ହେଲେ ବାଗବର ପଞ୍ଚାୟତ ଅନ୍ତର୍ଗତ କୁମୁରସିଂଙ୍ଗା ଗ୍ରାମର ଜମିଦାର କହଁର (୫୦) ବୋଲି ଜଣାଯାଇଛି। ଉକ୍ତ ସାଇକେଲ ଆରୋହୀ ଙ୍କୁ ଧଳା ରଙ୍ଗର ସୁଇଫ୍ଟ ଡିଜାୟାର ଓଡି ୨୩ ଏଲ ୬୦୩୨ କାର ଧକ୍କା ଦେଇ ମୁଖ୍ୟ ରାସ୍ତା ଛାଡ଼ି ଆନନ୍ଦପୁର ରାସ୍ତା ଅଭିମୁଖେ ଦ୍ରୃତଗତି ଫେରାର ହେଉଥିବା ସମୟରେ ଇଞ୍ଜିନିରେ ନିଆଁ ଲାଗି ଯାଇଥିଲା। କାରରେ ଥିବା ଚାରିଜଣ ବ୍ୟକ୍ତି କୈ।ଶଲ କ୍ରମେ ବାହାରକୁ ବାହାରି କପା ବିଲକୁ ଭିତରକୁ ଫେରାର ହୋଇଯାଇଥିଲେ। ସ୍ଥାନୀୟ ଲୋକେ ଅଗ୍ନିଶମ ବିଭାଗ ଓ ପୁଲିସ କୁ ଖବର ଦେଇଥିଲେ। ଘଟଣା ସ୍ଥଳରେ ଅଗ୍ନିଶମ ବାହିନୀର ପହଞ୍ଚି ନିଆଁ କୁ ଆୟତ କରିଥିବା ବେଳେ ପୁଲିସ ଦୁର୍ଘଟଣା ଘଟାଇଥିବା ଗାଡି କୁ ଜବତ କରି ଅଧିକ ତଦନ୍ତ ଜାରି ରଖିଥିବା ଜଣାଯାଇଛି।

ରିପୋର୍ଟ -ଶାନ୍ତନୁ କୁମାର କର୍ଣ୍ଣ