ଦାବି ପୂରଣ ନ ହେଲେ ଭୋଟ ବର୍ଜନ ।
ମାଲକାନଗିରି,୨୮/୦୩(ପିପିଟି) : ଜଙ୍ଗଲ ଜମି ପଟ୍ଟାକୁ ସେଟେଲମେଣ୍ଟ ପଟ୍ଟା ମାନ୍ୟତା, ପଟ୍ଟାକୁ ଆଧାର କରି ଘରଡିହ ପଟ୍ଟା ପ୍ରଦାନ, ବନ୍ଦ ହୋଇଥିବା ସ୍କୁଲକୁ ପୁର୍ନବାର ଖୋଲାଯିବା, ସ୍କୁଲରେ ଶିକ୍ଷକ ନିଯୁକ୍ତି, ସରକାରୀ ସ୍ବାସ୍ଥ୍ୟ କେନ୍ଦ୍ରରେ ବିଶେଷଜ୍ଞ ଡାକ୍ତର ନିଯୁକ୍ତି, ଚାଷୀଙ୍କୁ ଠିକ ସମୟରେ ବିହନ, ସାର, ଋଣ ପ୍ରଦାନ ସହ ଚାଷ ସମୟରେ କୃଷି ଜମିକୁ ଜଳସେଚନ ଆଦି ୫ ଦଫା ଦାବିକୁ ନେଇ କୋୟା ସମାଜ ପକ୍ଷରୁ ଆଜି ଏକ ସାମ୍ବାଦିକ ସମ୍ମିଳନୀ କରାଯାଇଛି। ଦାବିଗୁଡ଼ିକ ପୂରଣ ନହେଲେ ଚଳିତ ନିର୍ବାଚନରେ ଭୋଟ ବର୍ଜନ କରଯିବ ବୋଲି କାଲିମେଳା ଏବଂ ପଡିଆ ବ୍ଲକ କୋୟା ସମାଜ ପକ୍ଷରୁ ଚେତାବନୀ ଦିଆଯାଇଛି।
କାଲିମେଳା ଆମ୍ବାଗୁଡା ସହିଦ ତାମ୍ମା ଦୋରା କ୍ଲବ ପରିସରରେ ଆଜି ଆୟୋଜିତ ଏହି ସମ୍ମିଳନୀରେ ଜିଲ୍ଲା କୋୟା ସମାଜର
ବ୍ଳକ ସଭାପତି ବାଗା ମାଡକାମୀ କହିଛନ୍ତି ଯେ,୨୦୦୬ରେ ଆଦିବାସୀଙ୍କ ପାଇଁ ଏକ ସ୍ବତନ୍ତ୍ର ଜଙ୍ଗଲ ଜମି ଆଇନ ପାରିତ ହୋଇଥିଲା।କିନ୍ତୁ ରାଜ୍ୟ ସରକାର ମାତ୍ର ୧୦ ପ୍ରତିଶତ
ଜମିପଟ୍ଟା ଦେଇ ବଳକା ୯୦ ପ୍ରତିଶତ ଜମିକୁ ଆଜି ଯାଏଁ ବଣ୍ଟନ କରି ନାହାନ୍ତି। ତୁରନ୍ତ ସେଟେଲମେଣ୍ଟ ପଟ୍ଟା ପ୍ରଦାନ କରାଯାଉ।ଏହା ବ୍ୟତୀତ ଜେଜେବାପାଙ୍କ ନାମରେ ଥିବା ଜମି ପଟ୍ଟାଗୁଡ଼ିକୁ ବର୍ତ୍ତମାନ ପିଢ଼ିଙ୍କ ନାମରେ ପରିବର୍ତ୍ତନ କରାଯାଉ। ନିଜ ନାଁରେ ପଟ୍ଟା ହୋଇ ନଥିବାରୁ ଜାତି ପ୍ରମାଣପତ୍ର, ବାସିନ୍ଦା ପ୍ରମାଣପତ୍ର,
ବ୍ୟାଙ୍କଋଣ ସହ ମଣ୍ଡିରେ ଧାନ ବିକ୍ରି କରିବା ଓ ପିଲାଙ୍କ ପାଠ ପଢାରେ ସମସ୍ୟା ଦେଖାଦେଉଛି। ତେଣୁ ସେଟେଲମେଣ୍ଟରେ ସେଗୁଡ଼ିକୁ ଭାଗ କରାଯିବାକୁ ଦାବି ହୋଇଛି। ସେହିପରି ବନ୍ଦ ପଡ଼ିଥିବା ସ୍କୁଲଗୁଡ଼ିକୁ ତୁରନ୍ତ ଖୋଲିବା ସହ ସ୍କୁଲଗୁଡ଼ିକରେ ଖାଲିଥିବା ଶିକ୍ଷକ ପଦବିଗୁଡିକୁ ପୂରଣ କରିବା, ସ୍ବାସ୍ଥ୍ୟକେନ୍ଦ୍ରଗୁଡ଼ିକରେ ବିଶେଷଜ୍ଞ ଡାକ୍ତର ନିଯୁକ୍ତି ଦେବା, କୃଷକଙ୍କୁ ଠିକ ସମୟରେ ବିହନ, ସାର, ଯୋଗାଇବା , କୃଷି କ୍ଷେତ୍ରକୁ ଜଳସେଚନ କରିବାକୁ କୋୟା ଆଦିବାସୀ ସମାଜ ପକ୍ଷରୁ ଦାବି ହୋଇଛି। ସାବେରୀ,ପଟେରୁ, ସିଲେରୁ ନଦୀକୂଳିଆ ଗାଁଗୁଡ଼ିକରେ ଉଠାଜଳସେଚନର ସୁବିଧା କରାଯିବାକୁ ଦାବି
ହୋଇଛି। ଏହି ସମ୍ମିଳନୀରେ ଜିଲ୍ଲା କୋୟା ସମାଜ ସଂଗଠକ ତଥା କାଲିମେଳା ଲ୍ୟାମ୍ପ ଅଧ୍ଯକ୍ଷ ବୁଦୁରା କବାସୀ, ବ୍ଳକ ଉପସଭାପତି ଇର୍ମା ସୋଡି, ସମ୍ପାଦକ ଇର୍ମା କବାସୀ, ସହସମ୍ପାଦକ ରାମା ମାଡକାମୀ, ବଡ଼ିଗେଟା ସମିତି ସଭ୍ୟ
ସୋମନାଥ ପଡିଆମୀ, ସଦସ୍ୟ ବୁସା ମାଡକାମୀ, ରାମଚନ୍ଦ୍ର ମାଢି, ଜଗା ମାଡକାମୀ, ଇର୍ମା ବେଟି, ନାନ୍ଦା କୁଞ୍ଜଙ୍କ ସମେତ ସହିଦ ତାମ୍ମା ଦୋରା କ୍ଲବ ଉପସଭାପତି ଆଇତା ମାଡକାମୀ, ସମ୍ପାଦକ ଦେବା ମାଡକାମୀ ପ୍ରମୁଖ ଉପସ୍ଥିତ ଥିଲେ।
(ରିପୋର୍ଟ: ବରିଷ୍ଠ ସାମ୍ବାଦିକ କେଶବ ଚନ୍ଦ୍ର ନାୟକ, ମାଲକାନଗିରି)