ଡ଼୍ରାଇଭରର ଆଖି ଲାଗିଯିବାରୁ ଓଲଟିଲା ସ୍ନାକ୍ସ ବୋଝେଇ ଟ୍ରକ୍ ।

ବେଲଗୁଣ୍ଠା,୧୬/୧୨(ପିପିଟି) : ଡ଼୍ରାଇଭରର ଆଖି ଲାଗିଯିବାରୁ ଏକ ସ୍ନାକ୍ସ ବୋଝେଇ ଟ୍ରକ୍ ରାସ୍ତା ପାର୍ଶ୍ଵ ଜମିକୁ ଓଲଟି ପଡିଛି । ସୂଚନା ପ୍ରକାରେ ଏକ ଟ୍ରକ୍ ମହାରାଷ୍ଟ୍ରର ନାଗପୁରରୁ ହଳଦୀରାମ୍ କମ୍ପାନିର ସ୍ନାକ୍ସ ଧରି ରବିବାର ରାତିରେ ବ୍ରହ୍ମପୁର ଅଭିମୁଖେ ଯାଉଥିଲା । ରାତି 10 ଟା ସମୟରେ ଗାଙ୍ଗପୁର ନିକଟସ୍ଥ ଖଇରପୁଟି ହନୁମାନ ମନ୍ଦିର ଠାରୁ 200 ମିଟର ଆଗକୁ ଯିବା ପରେ ଗାଡ଼ି ଚାଳକର ଆଖି ଲାଖିଯିବାରୁ ଟ୍ରକ୍ ଟି ରାସ୍ତା ପାର୍ଶ୍ୱକୁ ଚାଲିଯାଇଥିଲା । ଗାଡ଼ିଟିକୁ ମୁଖ୍ୟ ରାସ୍ତାକୁ ଆଣିବା ପାଇଁ ଚାଳକଙ୍କ ଚେଷ୍ଟା ସତ୍ତ୍ୱେ ଗାଡ଼ିଟି ଭାରସାମ୍ୟ ହରାଇ ରାସ୍ତା ପାର୍ଶ୍ଵସ୍ଥ ଖାଲୁଆ ଜମିକୁ ଓଲଟି ପଡ଼ିଥିଲା । ଏହି ଦୁର୍ଘଟଣାରେ କୌଣସି ବ୍ୟକ୍ତି ମୃତାହତ ହୋଇନଥିବା ବେଳେ ଗାଙ୍ଗପୁର ପୋଲିସ୍ ଘଟଣା ସ୍ଥଳରେ ପହଞ୍ଚି ପ୍ରାଥମିକ ତଦନ୍ତ କରିଥିବା ଜଣା ପଡିଛି ।

ରିପୋର୍ଟ- ସୁଶାନ୍ତ କୁମାର ବେହେରା