ଘୁମୁସର ବରିଷ୍ଠ ନାଗରିକ ମଞ୍ଚର ବୈଠକ ।

ଭଞ୍ଜନଗର, ୦୯/୦୨(ପିପିଟି):ଘୁମୁସର ବରିଷ୍ଠ ନାଗରିକ ମଞ୍ଚର ଫେବୃଆରୀ ମାସ ବୈଠକ ସ୍ଥାନୀୟ ବନବିଭାଗ ଡାକ ବଙ୍ଗଳାରେ ଅନୁଷ୍ଠିତ ହୋଇଯାଇଛି।ଏଥିରେ ସଭାପତି ସୋମନାଥ ନାୟକ ଅଧ୍ୟକ୍ଷତା କରିଥିଲେ। ବୈଠକ ଆରମ୍ଭରେ ସଭ୍ୟ କେ ମୋହନାରାଓ ଙ୍କ ବିୟୋଗରେ ଦୁଇ ମିନଟ ନୀରବ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା। ସଭାପତି ଗୀତା ମାହାତ୍ମ୍ୟ ଉପରେ ପ୍ରଥମେ ଆଲୋଚନା କରିଥିଲେ। ସମ୍ପାଦକ ରବିନାରାୟଣ ସାମନ୍ତ ଗତ ସାଧାରଣ ଅଧିବେଶନ ର ବିବରଣୀ ପାଠ କରି ସର୍ବ ସମ୍ମତି କ୍ରମେ ଗୃହୀତ କରାଇ ନେଇଥିଲେ। ଘୁମୁସର ଜିଲ୍ଲା ଗଠନ ସମ୍ପର୍କରେ ଆଲୋଚନା ସହ ଏହାକୁ ତ୍ୱରାନ୍ୱିତ କରିବାପାଇଁ ସ୍ଥାନୀୟ ବିଧାୟକଙ୍କୁ ସାକ୍ଷାତ କରିବାକୁ ସ୍ଥିର ହୋଇଥିଲା। କାର୍ଯ୍ୟକାରୀ ସଭାପତି ସନ୍ତୋଷ ତିଆଡ଼ି ନୂତନ ଜିଲ୍ଲା ଗଠନ ସମ୍ପର୍କରେ ବର୍ତ୍ତମାନ ସରକାରଙ୍କ ଅଭିମୁଖ୍ୟ ସମ୍ପର୍କରେ ସୂଚନା ଦେଇଥିଲେ। ପ୍ରସ୍ତାବିତ ବ୍ଲକ ଗୁଡ଼ିକ ଗଠନ ହେବା ପରେ ନୂତନ ଜିଲ୍ଲା ଗଠନ ପ୍ରକ୍ରିୟା ଆରମ୍ଭ ହେବାର ଯଥେଷ୍ଟ ସାମ୍ବାଭନା ରହିଛି ବୋଲି ସେ ମତ ବ୍ୟକ୍ତ କରିଥିଲେ। ସୋରଡ଼ାର ବଡ଼ଗଡ଼, ଜଗନ୍ନାଥ ପ୍ରସାଦର ତିନିଛକିଆ, ବୁଗୁଡ଼ାର ବାଲିପଦରକୁ ବ୍ଲକ କରିବା ପାଇଁ ସ୍ଥାନୀୟ ଜନସାଧାରଣ ଦାବୀ କରିବାକୁ ହେଵ ବୋଲି ସଭାପତି କହିଥିଲେ। ମଞ୍ଚ ପକ୍ଷରୁ ସେଠାକାର ଜନସାଧାରଣଙ୍କୁ ଏ ଦିଗରେ ଉତ୍ସାହିତ କରିବାକୁ ହେବ ବୋଲି ସେ ପ୍ରକାଶ କରିଥିଲେ। ମଞ୍ଚର ଏକ ଫୋଟୋ ସ୍ମରଣିକା ମାର୍ଚ୍ଚ ମାସ ଶେଷ ସୁଦ୍ଧା ପ୍ରକାଶ ପାଇବ। ବରିଷ୍ଠ ନାଗରିକ ମାନେ ଥାନାକୁ ଗଲେ ଯେପରି ଉପଯୁକ୍ତ ସମ୍ମାନ ପାଇବେ ସେଥିପାଇଁ ଏସ.ପି ଙ୍କ ଦୃଷ୍ଟି ଆକର୍ଷଣ କରି ଚିଠି ଲେଖା ଯିବ ବୋଲି ମଧ୍ୟ ନିର୍ଧାରଣ ହୋଇଛି। ବୈଠକ ଶେଷରେ ମଧୁସୂଦନ ସ୍ୱାଇଁ ଧନ୍ୟବାଦ ଅର୍ପଣ କରିଥିଲେ।

ରିପୋର୍ଟ- (ଜେ.କେ ପଟ୍ଟନାୟକ)