ଘରଚଟିଆ ସେବିକା ଦୀପାଙ୍କୁ ଦିଲ୍ଲୀ ନିମନ୍ତ୍ରିତ ।

ମାଲକାନଗିରି,୨୯/୦୧(ପିପିଟି) :ଦିଲ୍ଲୀରେ ଆୟୋଜିତ ୭୬ତମ ଗଣତନ୍ତ୍ର ଦିବସ ଉତ୍ସବରେ ଜଙ୍ଗଲ ଓ ବନ୍ୟଜୀବ ସୁରକ୍ଷା ସମ୍ପର୍କିତ ସେବକସେବିକାମାନଙ୍କୁ ବିଶେଷ ଅତିଥି ଭାବରେ ଯୋଗଦେବାକୁ ନିମନ୍ତ୍ରଣ କରାଥିଲା ବେଳେ ମାଲକାନଗିରି ଜିଲ୍ଲାରୁ ଘର ଚଟିଆ ସଂରକ୍ଷଣ ଦିଗରେ ଉଲ୍ଲେଖନୀୟ ଅବଦାନ ପାଇଁ ଦୀପାରାଣୀ ନାୟକଙ୍କୁ ମଧ୍ୟ ନିମନ୍ତ୍ରଣ କରାଯାଇଥିଲା।
ଏହାର ଏକ ମାତ୍ର ଉଦ୍ଦେଶ୍ୟ ହେଲା ଜନସାଧାରଣଙ୍କ ମଧ୍ୟରେ ବନ୍ୟପ୍ରାଣୀ ସଂରକ୍ଷଣ ଦିଗରେ ଜାଗରଣ ସୃଷ୍ଟି କରିବା।
ଓଡ଼ିଶା ରାଜ୍ୟ ସରକାରଙ୍କ ମାଲକାନଗିରି ବନ ଖଣ୍ଡରୁ ଦୀପା ରାଣୀ ନାୟକଙ୍କୁ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିବା ପାଇଁ
ନିମନ୍ତ୍ରିତ କରାଯାଇଥିଲା। ସେ ଦିଲ୍ଲୀରେ ହୋଇଥିବା ପ୍ୟାରେଡ୍ ରେ ପ୍ରତ୍ୟକ୍ଷଦର୍ଶୀ ଭାବେ ଯୋଗ ଦେଇଥିଲେ। ଅନ୍ୟାନ୍ୟ ରାଜ୍ୟରୁ ମଧ୍ୟ ଉଲ୍ଲେଖନୀୟ କାର୍ଯ୍ୟ କରିଥିବା ବ୍ୟକ୍ତିବିଶେଷ ଯୋଗ ଦେବା ସହିତ ଦିଲ୍ଲୀ ଚିଡ଼ିଆ ଖାନାରେ ଆୟୋଜିତ ସମ୍ମିଳନୀରେ ଯୋଗଦେଇଥିଲେ ।
ମାଲକାନଗିରି ଜିଲ୍ଲାରେ ଦୀପାରାଣୀ ନାୟକଙ୍କ ଘର ଚଟିଆ ପୁନର୍ବାସ ଓ ଘର ଚଟିଆ ସଂରକ୍ଷଣରେ ତାଙ୍କ କାର୍ଯ୍ୟ ପ୍ରଶଂସନୀୟ । ସେ ୨୦୧୪ ମସିହାରୁ ମାଲକାନଗିରି ଜିଲ୍ଲାରେ ଘର ଚଟିଆ ପକ୍ଷୀ ସୁରକ୍ଷା ସମ୍ପର୍କିତ କାର୍ଯ୍ୟରେ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଦୀପା ରାଣୀ ନାୟକଙ୍କ ନାମ ସଞ୍ଜୟ କୁମାରଙ୍କ ଜାତୀୟ ଘର ଚଟିଆ ସଂରକ୍ଷକ ରଚିତ ପୁସ୍ତକ “ଆଓ ଗୌରେଆ”ରେ ସ୍ଥାନ ପାଇଛି। ସେ ପ୍ରକୃତି ବନ୍ଧୁ ସମ୍ମାନ -୨୦୨୩, ଚେଞ୍ଜ୍ ମେକର୍ସ ଆୱାର୍ଡ (ଆଇଡିଏଫ୍ ଓ ଆମ୍ବିସନ), ନିଷ୍ଠା ସମ୍ମାନ- ୨୦୨୨ ଭଳି ବିଭିନ୍ନ ପୁରସ୍କାରରେ ମଧ୍ୟ ସମ୍ମାନିତ ହୋଇଛନ୍ତି। ବନ୍ୟ ପ୍ରାଣୀ ସୁରକ୍ଷା କ୍ଷେତ୍ରରେ ତାଙ୍କ ଅବଦାନ ସ୍ୱତନ୍ତ୍ର ଓ ପ୍ରଶଂସନୀୟ। ଆଶା କରାଯାଏ ଯୁବ ପିଢ଼ି ଏଥିରୁ ପ୍ରେରଣା ପାଇ ଜଙ୍ଗଲ ଓ ବନ୍ୟପ୍ରାଣୀ ସୁରକ୍ଷା କ୍ଷେତ୍ରରେ ଅଗ୍ରସର ହେବେ। ଆଜି ସେ ଦିଲ୍ଲୀ ରୁ ମାଲକାନଗିରି ଅଭିମୁଖେ ଫେରୁଥିବା ଜଣାପଡିଛି ।

(ରିପୋର୍ଟ: ବରିଷ୍ଠ ସାମ୍ବାଦିକ କେଶବ ଚନ୍ଦ୍ର ନାୟକ, ମାଲକାନଗିରି)