କମ୍ରେଡ ଶିବରାମ-ଶର୍ମିଷ୍ଠା ସର୍ବଭାରତୀୟ ସ୍ମୃତି ବକ୍ତୃତାମାଳା ବେଙ୍ଗାଲୁରୁର ଗାନ୍ଧୀ ଭବନରେ ସଫଳତାର ସହ ଅନୁଷ୍ଠିତ ହୋଇଯାଇଛି।

ବେଙ୍ଗାଲୁରୁ,୨୧/୦୭: ବେଙ୍ଗାଲୁରୁର ଗାନ୍ଧୀ ଭବନରେ କମ୍ରେଡ ଶିବରାମ-ଶର୍ମିଷ୍ଠା ସର୍ବଭାରତୀୟ ସ୍ମୃତି ବାର୍ଷିକୀ ବକ୍ତୃତାମାଳାର ପ୍ରଥମ ବକ୍ତୃତା ଅନୁଷ୍ଠିତ ହୋଇଯାଇଛି । ଏହାର ଶୀର୍ଷକ ଥିଲା “ଯୁଦ୍ଧ ଏବଂ ଫାସିବାଦ”। ଏହି କାର୍ଯ୍ୟକ୍ରମରେ ପ୍ରସିଦ୍ଧ ଚଳଚ୍ଚିତ୍ର ନିର୍ମାତା ଆନନ୍ଦ ପଟବର୍ଦ୍ଧନ ମୁଖ୍ୟବକ୍ତା ଭାବେ ଯୋଗ ଦେଇଥିଲେ। କାର୍ଯ୍ୟକ୍ରମର ଉଦଘାଟନୀ ଅଧିବେଶନରେ ପଲିଟବୁରୋ ସଦସ୍ୟବୃନ୍ଦ ମଞ୍ଚାସୀନ ଥିଲେ। ପଲିଟବୁରୋ ସଦସ୍ୟ କମ୍ରେଡ କବୀର ଉଦଘାଟନୀ ବକ୍ତବ୍ୟ ରଖିଥିଲେ। ସି.ପି.ଆଇ(ଏମ-ଏଲ) ରେଡଷ୍ଟାର କର୍ଣ୍ଣାଟକ ରାଜ୍ୟ ସମ୍ପାଦକ କମ୍ରେଡ ରୁଦ୍ରେୟା ସ୍ୱାଗତ ଭାଷଣ ଏବଂ ପଲିଟବୁରୋ ସଦସ୍ୟ ଆର୍ ମାନସାୟା ଏହି କାର୍ଯ୍ୟକ୍ରମରେ ଅଧ୍ୟକ୍ଷତା କରିଥିଲେ । ଆନନ୍ଦ ପଟବର୍ଦ୍ଧନଙ୍କ ନିର୍ଦ୍ଦେଶିତ ‘ବସୁଧୈବ କୁଟୁମ୍ବକମ୍’ ନାମକ ଏକ ଡକ୍ୟୁମେଣ୍ଟାରୀ ଚଳଚିତ୍ର ପ୍ରଦର୍ଶିତ ହୋଇଥିଲା।

ସଭାପତିତ୍ଵ ଅଭିଭାଷଣରେ ଆର୍ ମନସାୟା କହିଛନ୍ତି, ପ୍ରଥମ ଥର ପାଇଁ ଏହି ବକ୍ତୃତା ପ୍ରଦାନ କରାଯାଇଛି। କମ୍ରେଡ ଶିବରାମ ଏବଂ ଶର୍ମିଷ୍ଠା ପାର୍ଟିର ସର୍ବକନିଷ୍ଠ ପଲିଟବୁରୋ ସଦସ୍ୟ, ସେମାନଙ୍କ ସ୍ମୃତିରେ ଏହି କାର୍ଯ୍ୟକ୍ରମ ଆୟୋଜନ କରାଯାଉଛି। ଚଳିତ ବର୍ଷଠାରୁ ଦଳର କେନ୍ଦ୍ରୀୟ କମିଟି ପ୍ରତିବର୍ଷ ଆଦର୍ଷଗତ-ରାଜନୈତିକ ପ୍ରଶ୍ନ ଉପରେ ଏଭଳି ବକ୍ତୃତାମାଲା ଆୟୋଜନ କରିବ। ”

ସି.ପି.ଆଇ(ଏମ-ଏଲ) ରେଡଷ୍ଟାର, ସାଧାରଣ ସମ୍ପାଦକ ପି ଜେ ଜେମ୍ସ ପ୍ରାରମ୍ଭିକ ଭାଷଣ ଦେଇଥିଲେ। ଯୁଦ୍ଧ ଓ ଫାସିବାଦ ହେଉଛି ଦୁଇଟି ପରସ୍ପର ସହ ଜଡ଼ିତ ବିପଦ। ଆଜି ସମଗ୍ର ବିଶ୍ୱରେ ନବ-ଫାସିବାଦୀ ଶକ୍ତି ଉଭା ହେଉଛି, ଯାହା ବିଶ୍ୱକୁ ଏକ ଯୁଦ୍ଧଗ୍ରସ୍ତ ରାଷ୍ଟ୍ର ଆଡକୁ ନେଉଛି । ଭାରତରେ କମ୍ୟୁନିଷ୍ଟ ଆନ୍ଦୋଳନ ଏବଂ ଆର.ଏସ.ଏସ ନେତୃତ୍ୱାଧୀନ ଫାସିବାଦୀ ଆନ୍ଦୋଳନ ଉଭୟ ୧୦୦ ବର୍ଷ ପୂରଣ କରୁଛନ୍ତି। ଦୁର୍ଭାଗ୍ୟବଶତଃ କମ୍ୟୁନିଷ୍ଟ ଆନ୍ଦୋଳନ ଏକ ଗମ୍ଭୀର ସଙ୍କଟ ଦେଇ ଗତି କରୁଥିବା ବେଳେ ଆର.ଏସ.ଏସ କ୍ଷମତାସୀନ ହୋଇଛି। ରାଜନୀତି, ସଂସ୍କୃତି, ଅମଲାତନ୍ତ୍ର, ନ୍ୟାୟପାଳିକା, ଶିକ୍ଷା, ସ୍ୱାସ୍ଥ୍ୟ ଇତ୍ୟାଦି ସହିତ ରାଷ୍ଟ୍ର ଏବଂ ରାସ୍ତାର କ୍ଷମତା ଉପରେ ଏହାର ଦଖଲ ରହିଛି। ଆମର ସାଂଗଠନିକ ସୀମା ରହିଛି, କିନ୍ତୁ ଆମେ କ୍ରମାଗତ ଭାବରେ ନବ-ଫାସିବାଦ ବିରୋଧରେ ଲଢ଼େଇ କରୁଛୁ । ଏହି ସ୍ମାରକୀ ବକ୍ତୃତା ମଧ୍ୟ ଆମର ଫାସିବାଦ ବିରୋଧୀ ଅଭିଯାନର ଏକ ଅଂଶ।”

ନିଜ ଡକ୍ୟୁମେଣ୍ଟାରୀ ‘ବସୁଧୈବ କୁଟୁମ୍ବକମ୍’ର ପରିଚୟ ଦେଇ ଶ୍ରୀ ପଟବର୍ଦ୍ଧନ କହିଛନ୍ତି,ଏହି ଚଳଚ୍ଚିତ୍ରରେ ମୋ ପରିବାର ଦୃଷ୍ଟିକୋଣରୁ ସ୍ୱାଧୀନତା ସଂଗ୍ରାମ,ବିଭାଜନର ଦୁଃଖଦ ଘଟଣା, ଧର୍ମନିରପେକ୍ଷତା ଏବଂ ଗଣତନ୍ତ୍ର ଉପରେ ଆକ୍ରମଣକୁ ଉପସ୍ଥାପନ କରାଯାଇଛି। ପ୍ରଦର୍ଶନ ପରେ ଏକ ପ୍ରଶ୍ନ-ଉତ୍ତର ଅଧିବେଶନ ଅନୁଷ୍ଠିତ ହୋଇଥିଲା ଯେଉଁଥିରେ ଆର.ଏସ.ଏସ ର ସାଂସ୍କୃତିକ ଆକ୍ରମଣ, ବାମପନ୍ଥୀ-ଗଣତାନ୍ତ୍ରିକ ଶକ୍ତିର ପରାଜୟ,ସଂଘର୍ଷର ମାର୍ଗ,ସାମ୍ପ୍ରଦାୟିକ ବିଭାଜନ, ପାଲେଷ୍ଟାଇନ ପ୍ରଶ୍ନ ଇତ୍ୟାଦି ଉପରେ ଆଲୋଚନା କରାଯାଇଥିଲା ।
ଏକ ପ୍ରଶ୍ନର ଉତ୍ତରରେ ଆନନ୍ଦ ପଟବର୍ଦ୍ଧନ କହିଛନ୍ତି, ଆର.ଏସ.ଏସ ସଂସ୍କୃତିକୁ ଅସ୍ତ୍ର ଭାବେ ବ୍ୟବହାର କରୁଛି ଏବଂ ଆମେ ବାମପନ୍ଥୀ ଶକ୍ତିମାନେ ହିଁ ଏହି ସାଂସ୍କୃତିକ ସ୍ଥାନକୁ ସେମାନଙ୍କ ସମ୍ମୁଖରେ ଖାଲି ରଖିଛୁ। ଗାନ୍ଧିଜୀଙ୍କୁ ସମାଲୋଚନା କରିବାରେ ଅନେକ ତ୍ରୁଟି ରହିଛି। ଆମେ ଅନେକ ସମୟରେ ଏହାକୁ ସମ୍ପୂର୍ଣ୍ଣ ଅସ୍ୱୀକାର କରୁଛୁ। ଆମେ ମନେ ରଖିବା ଉଚିତ ଯେ ପାଲେଷ୍ଟାଇନ ଉପରେ ଗାନ୍ଧୀଙ୍କ ଆଭିମୁଖ୍ୟ ବହୁତ ଉନ୍ନତ ଥିଲା, ଯାହାକୁ ବିଶ୍ୱର କୌଣସି କମ୍ୟୁନିଷ୍ଟ ନେତୃତ୍ୱ ମଧ୍ୟ ଗ୍ରହଣ କରିନଥିଲେ। ଗାନ୍ଧିଜୀ ୧୯୪୭ ମସିହା ଅଗଷ୍ଟ ୧୫ ତାରିଖରେ ସ୍ୱାଧୀନତା ଉତ୍ସବ ପାଳନରେ ନିୟୋଜିତ ନଥିଲେ, ବରଂ ବିଭାଜନର ଯନ୍ତ୍ରଣାକୁ ଦୂର କରିବାରେ ନିୟୋଜିତ ଥିଲେ । ଆଜି ଯେତେବେଳେ ଆର.ଏସ.ଏସ କ୍ଷମତାରେ ଅଛି, ଆମକୁ ବୁଝିବାକୁ ପଡିବ ଯେ ଉଭୟ ଗାନ୍ଧୀ ଏବଂ ଆମ୍ବେଦକର ଏହାର ଶତ୍ରୁ । ସେ ଆହୁରି ମଧ୍ୟ କହିଛନ୍ତି, ଆଜିର ସମୟରେ ସାଂସ୍କୃତିକ ପ୍ରତିରୋଧର ଆବଶ୍ୟକତା ରହିଛି। ସାଂସ୍କୃତିକ ବିପ୍ଳବ ଓ ସାଂସ୍କୃତିକ ଆନ୍ଦୋଳନର ଆବଶ୍ୟକତା ନ ବୁଝିଲେ ଆମେ ଆଗକୁ ବଢ଼ିପାରିବୁ ନାହିଁ। ”

ପଲିଟବୁରୋ ସଦସ୍ୟ କମ୍ରେଡ ଶଙ୍କର ଉଦଯାପାନୀ ବକ୍ତବ୍ୟରେ କହିଛନ୍ତି, ‘ବସୁଧୈବ କୁଟୁମ୍ବକମ୍’ ସାଧାରଣତଃ ବୈଦିକ ବା ବେଦାନ୍ତ ସହିତ ଜଡ଼ିତ, କିନ୍ତୁ ଏହା ଏକ ବୌଦ୍ଧ ଧାରଣା। ବ୍ରାହ୍ମଣବାଦ ହେଉଛି ଏକ ବହିଷ୍କୃତ ଧାରଣା, ଯେଉଁଥିରେ ଶୁଦ୍ର, ବୈଶ୍ୟ ଏବଂ ପରେ ମୁସଲମାନମାନଙ୍କୁ ମଧ୍ୟ ବାଦ୍ ଦିଆଯାଇଛି। ସମସ୍ତଙ୍କୁ ବାଦ୍ ଦେଉଥିବା ଧାରଣା କିପରି ଦୁନିଆକୁ ପରିବାର ଭାବରେ ବିବେଚନା କରିପାରିବ ? ସର୍ବହରା ଆନ୍ତର୍ଜାତିକତା ପାଇଁ ଠିଆ ହୋଇଥିବା କମ୍ୟୁନିଷ୍ଟମାନେ ‘ବସୁଧୈବ କୁଟୁମ୍ବକମ୍’କୁ ଯୁଦ୍ଧ ଓ ଫାସିବାଦ ବିରୋଧରେ ସ୍ଲୋଗାନ୍ ଦେବା ଉଚିତ।”
ଏହି କାର୍ଯ୍ୟକ୍ରମକୁ ଆନୁଷ୍ଠାନିକ ଭାବେ କମ୍ରେଡ ମାନସାୟା ଶେଷ କରିଥିଲେ। କର୍ଣ୍ଣାଟକର କ୍ରାନ୍ତିକାରୀ ସାଂସ୍କୃତିକ ମଞ୍ଚ ପକ୍ଷରୁ ବିପ୍ଳବୀ ଗୀତ ପରିବେଷଣ କରାଯାଇଥିଲା।