ଅବସରପ୍ରାପ୍ତ ପ୍ରଧାନ ଶିକ୍ଷକଙ୍କ ପରଲୋକ ।

ବେଲଗୁଣ୍ଠା, ୨୪/୦୮(ପିପିଟି): ବେଲଗୁଣ୍ଠା ବ୍ଳକ୍ ବଙ୍କା ପଂଚାୟତ ଗିରିସୋଲା ଗ୍ରାମର ଅବସରପ୍ରାପ୍ତ ପ୍ରଧାନ ଶିକ୍ଷକ ଧୋବା ମହାରଣା (୮୧) ଙ୍କ ଆଜି ଦିନ ଏକ ଘଣ୍ଟା ତିରିଶି ମିନଟ୍ ସମୟରେ ପରଲୋକ ଘଟିଛି । ସେ କିଛି ଦିନ ହେବ ବାର୍ଦ୍ଧକ୍ୟ ଜନିତ ବ୍ୟାଧିରେ ପୀଡ଼ିତ ହୋଇ ବେଲଗୁଣ୍ଠାରେ ରହୁଥିବା ସାନପୁଅ ସାମ୍ବାଦିକ ମନୋରଞ୍ଜନ ମହାରଣାଙ୍କ ନିକଟରେ ରହି ଆସୁଥିଲେ । ସ୍ବର୍ଗତ ଧୋବାଙ୍କ ବଡ଼ପୁଅ ମଧୁସୂଦନ ଦୁଇଦିନ ତଳେ ଆସି ଅଧିକ ଚିକିତ୍ସା ପାଇଁ ନିଜ କର୍ମସ୍ଥଳୀ କୋଣାର୍କକୁ ନେଇଯାଇଥିଲେ । ସେଠାରେ ଆଜି ଧୋବାଙ୍କର ପରଲୋକ ଘଟିଥିଲା । ସ୍ଵର୍ଗତ ଧୋବାଙ୍କ ମର ଶରୀରକୁ କୋଣାର୍କରୁ ପୁରୀ ସ୍ଵର୍ଗଦ୍ଵାରକୁ ନେଇ ସେଠାରେ ଅନ୍ତିମ ସଂସ୍କାର କରାଯାଇଥିଲା । ସ୍ଵର୍ଗଦ୍ଵାର ଠାରେ ସ୍ୱର୍ଗତ ମହାରଣାଙ୍କ ବଡ଼ପୁଅ ମଧୁସୂଦନ,ମଝିଆ ପୁଅ କିଶୋର ଚନ୍ଦ୍ର ଏବଂ ସାନପୁଅ ମନୋରଞ୍ଜନଙ୍କ ସହ ସ୍ତ୍ରୀ ତିଳୋତ୍ତମା,ଝିଅ ସୁଦେଷ୍ଣା, ଜ୍ଵାଇଁ, ନାତି ନାତୁଣୀ,ବୋହୂ ଏବଂ ପରିବାରର ଅନ୍ୟ ସଦସ୍ୟ ମାନେ ଉପସ୍ଥିତ ଥିଲେ । ସ୍ୱର୍ଗତ ମହାରଣା ଜଣେ ମେଳାପୀ ଏବଂ ଅମାୟିକ ବ୍ୟକ୍ତିତ୍ୱ ହୋଇଥିବା ବେଳେ ଜଣେ ଛାତ୍ର ବତ୍ସଳ ଶିକ୍ଷକ ଭାବେ ବେଶ୍ ପରିଚିତ ଥିଲେ । ସେ ପ୍ରଧାନ ଶିକ୍ଷକ ଭାବେ ବଙ୍କା ଉଚ୍ଚ ପ୍ରାଥମିକ ବିଦ୍ୟାଳୟରୁ ଅବସର ଗ୍ରହଣ କରିଥିଲେ । ତାଙ୍କ ମୃତ୍ୟୁ ଖବର ପାଇ ବଙ୍କାର ପୂର୍ବତନ ସରପଞ୍ଚ ରୋହିତ ଲେଙ୍କା, ପୂର୍ବତନ ସମିତିସଭ୍ୟ ନାରାୟଣ ସ୍ଵାଇଁ, ସରପଞ୍ଚ ଶୁଭଶ୍ରୀ ପରିଡ଼ା,ବେଲଗୁଣ୍ଠା ପ୍ରେସକ୍ଲବ ସଭାପତି ପ୍ରଦ୍ୟୁମ୍ନ ପାତ୍ର ପ୍ରମୁଖ ଗଭୀର ଶୋକ ବ୍ୟକ୍ତ କରିବା ସହିତ ତାଙ୍କ ପରିବାରକୁ ସମବେଦନା ଜଣାଇଛନ୍ତି ।

ରିପୋର୍ଟ- ସୁଶାନ୍ତ କୁମାର ବେହେରା