୧୨୫ କିଲୋ ଗଞ୍ଜେଇ ଜବତ,୫ ଜଣ ଗିରଫ।
ମାଲକାନଗିରି,୨୪/୦୪(ପିପିଟି): କାଲିମେଳା ଥାନା ଅନ୍ତର୍ଗତ ଏମ୍ଭି – ୬୬ ଗ୍ରାମ ନିକଟରୁ ପୁଲିସ ୧୨୫ କିଲୋ ଗଞ୍ଜେଇ ଜବତ କରିବା ସହ ୫ ଜଣଙ୍କୁ ଗିରଫ କରିଛି । ସୂଚନା ଅନୁଯାୟୀ , ଗତକାଲି ରାତିରେ କାଲିମେଳା ପୁଲିସ ପକ୍ଷରୁ ପାଟ୍ରୋଲିଂ କରାଯାଉଥିବା ବେଳେ ଏମ୍ଭି – ୬୬ ଗ୍ରାମ ନିକଟରେ ସନ୍ଦେହରେ ୩ଟି ବାଇକ୍କୁ ଅଟକାଇ ଯାଞ୍ଚ କରାଯାଇଥିଲା । ଯାଞ୍ଚ ପରେ ୩ଟି ବସ୍ତାରେ ଗଞ୍ଜେଇ ଥିବା ଜଣା ପଡ଼ିବା ପରେ ପୁଲିସ ଗଞ୍ଜେଇ ଓ ୩ଟି ବାଇକ୍ ଜବତ କରିବା ସହ ଗଞ୍ଜେଇ ଚାଲାଣ କରୁଥିବା ୫ଜଣଙ୍କୁ ଗିରଫ କରି ଥାନାକୁ ନେଇଥିଲା । ଜବତ ଗଞ୍ଜେଇ ଓଜନ କରାଯିବା ପରେ ଏହା ୧୨୫କିଲୋ ୪୦୦ ଗ୍ରାମ ବୋଲି ଜଣା ପଡ଼ିଥିଲା । ଏନେଇ ଏକ ମାମଲା ରୁଜୁ କରାଯାଇ ଗଞ୍ଜେଇ ଚାଲାଣକାରୀ ତେଲରାଇ ଗ୍ରାମର ଜଗା ମାଡ଼କାମୀ , ରାମା ମାଡ଼କାମୀ ଓ ଦେବ ମାଡ଼କାମୀ ଏବଂ ଚିତ୍ରକୋଣ୍ଡା ଅଞ୍ଚଳର ଲିମାଲ ପଲମ ଓ ରତନ ବୁଡ଼ିଆଙ୍କୁ କୋର୍ଟ ଚାଲାଣ କରାଯାଇଥିବା ଜଣା ପଡ଼ିଛି । ଜବତ ଗଞ୍ଜେଇ ଚିତ୍ରକୋଣ୍ଡା ଅଞ୍ଚଳରୁ ଆନ୍ଧ୍ରପ୍ରଦେଶର ଭଦ୍ରାଚଳମକୁ ଚାଲାଣ ହେବାର ଯୋଜନା ଥିଲା ବୋଲି ପୁଲିସ କହିଛି ।
(ରିପୋର୍ଟ:ବରିଷ୍ଠ ସାମ୍ବାଦିକ କେଶବ ଚନ୍ଦ୍ର ନାୟକ, ମାଲକାନଗିରି)