ବାଇକ ଦୁର୍ଘଟଣା,ଜଣେ ମୃତ ଜଣେ ଗୁରୁତର ।

ଭଞ୍ଜନଗର,୨୦/୧୨(ପିପିଟି) : ଗଞ୍ଜାମ ଜିଲ୍ଲା ଭଞ୍ଜନଗର ଥାନା ଅଧୀନ ଡାଳଖାଇ ମନ୍ଦିର ନିକଟରେ ଆଜି ଅପରାହ୍ନରେ ଏକ ସଡ଼କ ଦୁର୍ଘଟଣା ଘଟି ଜଣେ କଲେଜ ଛାତ୍ରଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଗୁରୁତର ହୋଇଥିବା ଜଣାପଡିଛି। ମୃତକ ଜଣକ ହେଲେ ବାଉଁଶଲୁଣ୍ଡି ଗ୍ରାମର ପ୍ରତାପ ସ୍ବାଇଁଙ୍କ ପୁଅ ହରି ଶଙ୍କର ସ୍ବାଇଁ(୨୦)। ଏଥିସହ ହରିଙ୍କ ସହିତ ଥିବା ସୀମାଞ୍ଚଳ ଗୌଡଙ୍କ ପୁଅ ଜଗମୋହନ ଗୌଡ(୨୧) ଆହତ ହୋଇଥିବା ବେଳେ ତାଙ୍କ ଅବସ୍ଥା ସଙ୍କଟାପନ୍ନ ରହିଥିବାରୁ ତାକୁ ଡାକ୍ତର ବ୍ରହ୍ମପୁର ମେଡିକାଲ୍ ସ୍ଥାନାନ୍ତର କରିଛନ୍ତି। ସୂଚନା ଅନୁଯାୟୀ ଆଜି ଅପରାହ୍ନ ସମୟରେ ହରି ଏବଂ ଜଗମୋହନ ଗାଲେରୀ କଲେଜ୍ ରେ ପରୀକ୍ଷା ଦେଇ ଘରକୁ ଫେରୁଥିଲେ। ଏହି ସମୟରେ ମୁଜାଗଡ ଏବଂ ବ୍ରାହ୍ମଣପଦର ରାସ୍ତାର ଡାଳଖାଇ ମନ୍ଦିର ନିକଟ ଏକ ବୁଲାଣି ଠାରେ ଭାରସାମ୍ୟ ହରାଇ ରାସ୍ତାକଡରେ ଏକ ଗଛରେ ପିଟି ହୋଇଥିବା ସେହି ରାସ୍ତାଦେଇ ଆସୁଥିବା କିଛି ଲୋକ ପ୍ରକାଶ କରିଛନ୍ତି। ହରିର ମୁଣ୍ଡରେ ପ୍ରବଳ ଆଘାତ ଲାଗଥିବା ବେଳେ ଜଗମୋହନର ଛାତିରେ ମାଡ ହୋଇଥିଲା। ଏହାପରେ ସେହି ରାସ୍ତା ଦେଇ ଆସୁଥିବା କିଛି ସହପାଠୀ ସେମାନଙ୍କୁ ତୁରନ୍ତ ଭଞ୍ଜନଗର ଡାକ୍ତରଖାନା ଆଣିଥିଲେ। ସେଠାରେ ଡାକ୍ତର ହରିକୁ ମୃତ ଘୋଷଣା କରିଥିବା ବେଳେ ଜଗମୋହନର ଅବସ୍ଥା ଗୁରୁତର ରହିଥିବାରୁ ତାକୁ ବ୍ରହ୍ମପୁର ମେଡିକାଲ୍ କୁ ସ୍ଥାନାନ୍ତର କରିଥିଲେ। ଖବର ପାଇ ପୁଲିସ ପହଞ୍ଚି ତଦନ୍ତ ଆରମ୍ଭ କରିଥିବା ଜଣାପଡିଛି।
(ରିପୋର୍ଟ- ଜୟକୃଷ୍ଣ ପଟ୍ଟନାୟକ। )