ବଜ୍ରପାତରେ ପୋଡ଼ିଗଲା ବିଦ୍ୟାଳୟର ସମସ୍ତ ବୈଦ୍ୟୁତିକ ସାମଗ୍ରୀ ।

ବେଲଗୁଣ୍ଠା,୨୦/୦୬(ପିପିଟି): ଆଜି ଅପରାହ୍ନରେ ହୋଇଥିବା ବଜ୍ରପାତରେ ଗାଙ୍ଗପୁର ଥାନା ଅନ୍ତର୍ଗତ ଝାଡ଼ବନ୍ଧ ଶ୍ରୀ ଶ୍ରୀ ଗରୂଡେଶ୍ୱର ଉଚ୍ଚ ବିଦ୍ୟାଳୟ ଏବଂ ବେଲଗୁଣ୍ଠା ବ୍ଳକ୍ ର କୁମୁଣ୍ଡି ପ୍ରାଥମିକ ବିଦ୍ୟାଳୟର ସମସ୍ତ ବୈଦ୍ୟୁତିକ ସାମଗ୍ରୀ ପୋଡ଼ି ନଷ୍ଟ ହୋଇଯାଇଛି । ସୂଚନା ପ୍ରକାରେ ଆଜି ଅପରାହ୍ନରେ ପ୍ରବଳ ବର୍ଷା ସହ ଭୟଙ୍କର ବଜ୍ରପାତ ମଧ୍ୟ ହୋଇଥିଲା । ଝାଡ଼ବନ୍ଧ ଶ୍ରୀଶ୍ରୀ ଗରୂଡେଶ୍ୱର ଉଚ୍ଚ ବିଦ୍ୟାଳୟରେ ସ୍ମାର୍ଟ୍ ସ୍କୁଲ୍ କାର୍ଯ୍ୟ ନିର୍ମାଣାଧୀନ ଥିବା ବେଳେ ଆଜିର ବଜ୍ରପାତରେ ବିଦ୍ୟାଳୟର ୧୬ ଟି ପଙ୍ଖା, ସ୍ମାର୍ଟ୍ ଶ୍ରେଣୀ ଗୃହର ସମସ୍ତ ଲାଇଟ୍ ମେଇନ ସ୍ଵିଚ୍ ଏବଂ ମିଟର୍ ପୋଡ଼ିଯାଇଥିଲା । ସେହିପରି କୁମୁଣ୍ଡି ପ୍ରାଥମିକ ବିଦ୍ୟାଳୟର ଶ୍ରେଣୀ ଗୃହ ଗୁଡ଼ିକରେ ଲାଗିଥିବା ପାଞ୍ଚୋଟି ପଙ୍ଖା ସମେତ ଚାରୋଟି ଟ୍ୟୁବ୍ ଲାଇଟ୍ ପୋଡ଼ି ନଷ୍ଟ ହୋଇଯାଇଛି । ବଜ୍ରପାତର ଶବ୍ଦ ଏତେ ଭୟଙ୍କର ଥିଲା ଯେ ବିଦ୍ୟାଳୟରେ ଥିବା ଛାତ୍ର ଛାତ୍ରୀ ମାନେ ଥରିବାକୁ ଲାଗିଥିଲେ । ଏହି ବଜ୍ରପାତରେ ବିଦ୍ୟାଳୟରେ ଥିବା ଇନଭର୍ଟର୍, ଆକ୍ୱାଗାର୍ଡ଼ ଏବଂ ପାଣି ପମ୍ପ୍ ମଧ୍ୟ କ୍ଷତିଗ୍ରସ୍ତ ହୋଇଥିବା ଆଶଙ୍କା କରାଯାଉଛି । ସେହିପରି ବଜ୍ରପାତ ଯୋଗୁଁ ଆଉ କିଛି ସ୍ଥାନରେ ମଧ୍ୟ ବୈଦ୍ୟୁତିକ ସାମଗ୍ରୀ ନଷ୍ଟ ହୋଇଥିବା ଅନୁମାନ କରାଯାଉଛି । ସନ୍ଧ୍ୟା ପର୍ଯ୍ୟନ୍ତ ବିଦ୍ୟୁତ୍ ସରବରାହ ସ୍ଵାଭାବିକ୍ ହୋଇନଥିବାରୁ ଏହାର ସ୍ପଷ୍ଟ ଛିତ୍ର ଜଣା ପଡିନି ।

(ରିପୋର୍ଟ- ସୁଶାନ୍ତ କୁମାର ବେହେରା। )