ପଞ୍ଚୁ ସାହୁ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଗିରଫ।

ପୋଲସରା,୦୯/୦୮(ପିପିଟି):ସୋମବାର ଦିନ ସକାଳେ ପୋଲସରା ଥାନା ଅନ୍ତର୍ଗତ ପାତାଳସିଂ ଗ୍ରାମ ରେ ଘଟିଥିବା ପଞ୍ଚୁ ସାହୁ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ସୁବଳ ସାହୁ ଓ ତାର ଜଣେ ସହଯୋଗୀ କୈଳାସ ପ୍ରଧାନକୁ ପୋଲସରା ପୋଲିସ ଗିରଫ କରିଥିବା ପ୍ରକାଶ କରିଛି। ଆଜି ପୋଲସରା ଥାନାରେ ଗଣମାଧ୍ୟମ ପ୍ରତିନିଧି ମାନଙ୍କୁ ଥାନା ଅଧିକାରୀ ଜିତେନ୍ଦ୍ର କୁମାର ମଳିକ ସୂଚନା ଦେଇଛନ୍ତି ଯେ ପଞ୍ଚୁ ସାହୁ ହତ୍ୟାକାଣ୍ଡ ର ମୂଖ୍ୟ ଅଭିଯୁକ୍ତ ସୁବଳ ସାହୁ କୁମାରୀ ଗ୍ରାମରେ ଆତ୍ମଗୋପନ କରୁଥିବା ସୂଚନା ପାଇ ପୋଲିସ ସେଠାରେ ଚଢାଉ କରି ସୁବଳ ସାହୁକୁ ଗିରଫ କରିଥିଲେ । ସେହିପରି ଏହି ହତ୍ୟାକାଣ୍ଡର ସହ ଅଭିଯୁକ୍ତ ପାତାଳସିଂ ଗ୍ରାମର କୈଳାସ ପ୍ରଧାନ କୁ ମଧ୍ୟ ପୋଲିସ ଗିରଫ କରିବାରେ ସଫଳ ହୋଇଛି। ତେବେ ଅନ୍ୟ ତିନି ଜଣ ଅଭିଯୁକ୍ତ ଏବେବି ଫେରାର ଅଛନ୍ତି। ସେମାନଙ୍କୁ ମଧ୍ୟ ଯଥାଶୀଘ୍ର ଗିରଫ କରାଯିବ ବୋଲି ଥାନା ଅଧିକାରୀ କହିଛନ୍ତି । ସେହିପରି ଗତ ୬ ତାରିଖ ଦିନ ପୋଲସରା ଥାନା ଅଧିନସ୍ଥ ଗୋଛାବାଡି ଗ୍ରାମର ଗୋପାଳ କୃଷ୍ଣ ମହାରଣା ଗୋଟିଏ ମୋପେଡ୍ ଗାଡ଼ିରେ ଆସିବା ସମୟରେ ଗମ୍ଭାରିଆ ନାଳ ପାଖରେ ଭାଲିଆମାଳ ଗ୍ରାମର ସଞ୍ଜୟ ଶବର ,ଜରା ଶବର ଓ ସୁନା ଶବର ତାଙ୍କୁ ଅଟକେଇ ଟଙ୍କା ମାଗିଥିଲେ। ତାଙ୍କ ପାଖରେ ଟଙ୍କା ନାହିଁ ବୋଲି କହିବାରୁ ସେମାନେ ବ୍ଳାଙ୍କ ପାଇର୍ କରି ତାଙ୍କର ମୋପେଡ୍ ଟିକୁ ଛଡ଼ାଇ ନେଇଥିଲେ। ଏ ସମ୍ପର୍କରେ ଗୋପାଳ ଥାନା ରେ ଏତଲା ଦେଇଥିଲେ। ପୋଲିସ ଏହି ଘଟଣାରେ ଅଭିଯୁକ୍ତ ସମସ୍ତ ତିନି ଜଣଙ୍କୁ ଗିରଫ କରିଥିବା ଗଣମାଧ୍ୟମ ପ୍ରତିନିଧି ମାନଙ୍କୁ କହିଛନ୍ତି। ଥାନା ଅଧିକାରୀ ଜିତେନ୍ଦ୍ର କୁମାର ମଳିକ ଏହି ସୂଚନା ଦେବା ସମୟରେ ଅତିରିକ୍ତ ଥାନା ଅଧିକାରୀ କୃଷ୍ଣ ସାହା ଓ ଅନ୍ୟ ମାନେ ଉପସ୍ଥିତ ଥିଲେ।
(ରିପୋର୍ଟ- ସନ୍ତୋଷ କୁମାର ପଣ୍ଡା ।)