ତପ୍ତପାଣି ଘାଟିରେ ଦୁଇଦୁଇଟି ଦୁର୍ଘଟଣା ଜଣେ ଆହତ ।

ବ୍ରହ୍ମପୁର,୨୯/୦୮(ପିପିଟି);ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଲକ ପାଟପୁର ଥାନା ଅନ୍ତର୍ଗତ ତପ୍ତପାଣି ଘାଟିରେ ଆଜି ଦୁଇଟି ଦୁର୍ଘଟଣା ଘଟିଥିବା ବେଳେ ଏଥିରେ ଜଣେ ଜଣ ଗୁରୁତର ଆହତ ହୋଇଥିବା ଜଣାପଡିଛି । ଖବର ଅନୁସାରେ ବ୍ରହ୍ମପୁର – ରାୟଗଡ଼ା ୩୨୬ ନମ୍ବର ଜାତୀୟ ରାଜପଥ ମଧ୍ୟରେ ରହିଥିବା ତପ୍ତପାଣି ଘାଟି ଦୁର୍ଘଟଣାର ହବ୍ ପାଲଟିଥିବା ବେଳେ ଚଳିତବର୍ଷ ଆରମ୍ଭରୁ ବର୍ତ୍ତମାନ ସୁଦ୍ଧା ଏଠାକାର ଅଙ୍କାବଙ୍କା ରାସ୍ତାରେ ବାରମ୍ବାର ଦୁର୍ଘଟଣା ଘଟୁଥିବାର ନଜର ଆସୁଛି । ଯାହାଫଳରେ ବହୁ ଲୋକ ମୃତ୍ୟୁ ବରଣ କରୁଛନ୍ତି ତ ଅନେକ ଲୋକ ଗୁରୁତର ଆହତ ହେଉଥିବା ଦେଖିବାକୁ ମିଳୁଛି । ରବିବାର ଦିନ ଏକ ପେପର ବୋଝେଇ ଟ୍ରକ ରାୟଗଡ଼ାରୁ ଭୁବନେଶ୍ୱର ଅଭିମୁଖେ ଯାଉଥିବା ବେଳେ ତପ୍ତପାଣି ଘାଟି ନିକଟସ୍ଥ ଛେଦନଇ ପୋଲ ପାଖରେ ଗାଡିର ବ୍ରେକ ଫେଲ ହେବା ଯୋଗୁଁ ଟ୍ରକଟି ରାସ୍ତା ଉପରେ ହିଁ ଓଲଟି ପଡ଼ିଥିଲା । ତେବେ ଟ୍ରକ ଚାଳକ ଓ ହେଲପର ଉଭୟ ସୁରକ୍ଷିତ ରହିଥିବା ଜଣାପଡିଛି । ସେହିପରି ଘାଟି ତଳକୁ ଲକ୍ଷ୍ମୀନାରାୟଣପୁର ରୋଡ ପାର୍ଶ୍ବରେ କେ . ନୂଆଗାଁ ଥାନା ଅଞ୍ଚଳର ଭୀମ ମଣ୍ଡଳ ନିଜ ପରିବାର ସହ ରାସ୍ତାରେ ଠିଆ ହୋଇ ରହିଥିବା ବେଳେ ଏକ ବୋଲର ଦ୍ରୁତ ଗତିରେ ଆସି ଭୀମଙ୍କୁ ଧକ୍କା ଦେଇ ଚାଲି ଯାଇଥିଲା । ଯାହାଫଳରେ ଭୀମଙ୍କ ଦୁର୍ଘଟଣାରେ ଗୋଡ଼ ଭାଙ୍ଗିଯାଇଥିବା ଜଣାପଡିଛି । ଖବରପାଇ ପାଟପୁର ପୋଲିସ ଓ ପୋଡ଼ାମାରି ଫାଣ୍ଡି ଅଧିକାରୀ ଘଟଣାସ୍ଥଳରେ ପହଞ୍ଚି ଆହତ ଭୀମଙ୍କୁ ଉଦ୍ଧାର କରିବା ସହ ୧୦୮ ଆମ୍ବୁଲାନ୍ସ ଯୋଗେ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇବା ସହ ଘଟଣାର ତଦନ୍ତ କରିଥିବା ଜଣାପଡ଼ିଛି ।

(ରିପୋର୍ଟ- ଆରତ କୁମାର ହୋତା। )