ଏରସମାକୁ ସମ୍ପୂର୍ଣ୍ଣ ଧୋଇ ଅଞ୍ଚଳ ଘୋଷଣା ସହିତ ରିଲିଫ ଓ ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରିବା ଦାବିରେ ସିପିଆଇର ବିକ୍ଷୋଭ ।

ଏରସମା,୧୮/୦୯(ପିପିଟି): ଶନିବାର ଦିନ ଭାରତୀୟ କମ୍ମ୍ୟୁନିଷ୍ଟ ପାର୍ଟି ଏରସମା ବ୍ଲକ କମିଟି ପକ୍ଷରୁ ଏରସମାକୁ ସମ୍ପୂର୍ଣ୍ଣ ଧୋଇ ଅଞ୍ଚଳ ଘୋଷଣା ସହିତ ରିଲିଫ ଓ ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରିଵା, କ୍ଷୟକ୍ଷତିର ତୁରନ୍ତ ଆକଳନ ପୂର୍ବକ କ୍ଷତିପୂରଣ ପ୍ରଦାନ ଓ କୃଷି ଋଣ ସମେତ ସ୍ୱୟଂ ସହାୟକ ଗୋଷ୍ଠୀ ମାନଙ୍କୁ ପ୍ରଦାନ କରାଯାଇଥିବା ସମସ୍ତ ପ୍ରକାର ଋଣ ଛାଡ଼ ଦାବିରେ ଏରସମା ବ୍ଲକ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇ ଏରସମା ବିଡ଼ିଓଙ୍କ ମାଧ୍ୟମରେ ମାନ୍ୟବର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରାଯାଇଛି । ଆଜି ଦିବା ୧୧ଘଟିକା ସମୟରେ ପାର୍ଟି ଜୋନ ସମ୍ପାଦକ ସାଥି ବଇଁଶୀଧର ବେହେରା, ପିତାମ୍ବର ଦାସ,ପ୍ରଫୁଲ୍ଲ ଦାସ,ଦାମୋଦର ବେହେରା ଓ ସର୍ବେଶ୍ୱର ବେହେରାଙ୍କ ନେତୃତ୍ୱରେ ଶତାଧିକ ପାର୍ଟି ସାଥି ପାର୍ଟି କାର୍ଯ୍ୟାଳୟ ରମାକାନ୍ତ ଭବନ ରୁ ଏକ ଶୋଭାଯାତ୍ରା ରେ ବିଭିନ୍ନ ସ୍ଲୋଗାନ ଦେଇ ଏରସମା ବଜାର ପରିକ୍ରମା କରିବା ପରେ ଏରସମା ବ୍ଲକ ସମ୍ମୁଖରେ ପ୍ରତିବାଦ ବିକ୍ଷୋଭ ଅନୁଷ୍ଠିତ ହୋଇଥିଲା । ସାଥି ଦାମୋଦର ବେହେରାଙ୍କ ସଭାପତିତ୍ୱରେ ଅନୁଷ୍ଠିତ ଏହି ପ୍ରତିବାଦ ସଭାରେ ସିପିଆଇର ଜିଲ୍ଲା ସମ୍ପାଦକ ଅଭିଜିତ ସାହୁ, ବରିଷ୍ଠ ସିପିଆଇ ନେତା ତଥା କୃଷକ ସଭା ରାଜ୍ୟ ସଭାପତି ଶଶିଭୂଷଣ ସ୍ୱାଇଁ ଓ ପୂର୍ବତନ ବ୍ଲକ ଉପାଧ୍ୟକ୍ଷ ରାମଚନ୍ଦ୍ର ମୁଦୁଲି ପ୍ରମୁଖ ବକ୍ତବ୍ୟ ରଖି ଏରସମା ବ୍ଲକ ପ୍ରଶାସନ ଓ ଜଗତସିଂହପୁର ଜିଲ୍ଲା ପ୍ରଶାସନର ବିଫଳତା ଓ ଖାମଖିଆଲି ନୀତିର ତୀବ୍ର ସମାଲୋଚନା କରିଥିଲେ । ଗତ ୧୧ ତାରିଖ ଠାରୁ ଲଘୁଚାପ ଜନିତ ଲଗାଣ ବର୍ଷା ଓ ସରକାରୀ ଅଦୁରଦର୍ଶୀତା ଓ ବିଫଳତା ପାଇଁ ଏରସମା ବ୍ଲକ ପାଣିଘେରରେ । ହଜାର ହଜାର ଲୋକ ଜଳବନ୍ଦୀ ଭାବେ ଜୀବନ ବିତାଉଛନ୍ତି । ପ୍ରଶାସନିକ ସାହାର୍ଯ୍ୟ ଏପର୍ଯ୍ୟନ୍ତ ଅପହଞ୍ଚ । କିଛି ପଞ୍ଚାୟତରେ ମୁଣ୍ଡପିଛା ୧୦୦ଗ୍ରାମ ଚୁଡା,୨୦ ରୁ ୪୦ ଗ୍ରାମ ଚିନି ଓ ସମୁଦ୍ରକୁ ଶଙ୍ଖେ ଭଳି ଗୋଖାଦ୍ୟ ଦିଆଯାଇଛି । ଅପରପକ୍ଷରେ ସରକାରୀ ବିଫଳତା ଓ ଉଦାସୀନତା ପାଇଁ ହଁଶୁଆ ନଦୀ ବନ୍ଧ ଭାଙ୍ଗି ଘାଇ ହେଲାଣି ଯାହା ବନ୍ୟା ପରିସ୍ଥିତିକୁ ଆହୁରି ସାଙ୍ଘାତିକ କରିବ । ହଂସୁଆ ନଦୀ ଖନନ ଓ ପୁନଃରୁଦ୍ଧାର ବା ସଫାକରିବା ନାମରେ ୨୦-୨୧ମସିହାରେ ୧୧ଜଣ କଣ୍ଟ୍ରାକ୍ଟର, ସରକାରୀ ଅଫିସର ଓ ମନ୍ତ୍ରୀ ୭୦ ଲକ୍ଷ ଟଙ୍କା ଆତ୍ମସାତ କରିଥିବା ସିପିଆଇ ନେତା ଶ୍ରୀ ସାହୁ ଅଭିଯୋଗ କରିବା ସହିତ ତୁରନ୍ତ ଏରସମା ବିଡ଼ିଓଙ୍କ ବଦଳି ଦାବୀ କରିଛନ୍ତି । ସିପିଆଇର କଣ୍ଟ୍ରୋଲ କମିଶନ ସଭ୍ୟ ଶଶିଭୂଷଣ ସ୍ୱାଇଁ ତୁରନ୍ତ ପଞ୍ଚାୟତ ସ୍ତରୀୟ କମିଟି ଗଠନ କରି ଚାଷୀମାନଙ୍କ କ୍ଷୟକ୍ଷତିର ଆକଳନ ପୂର୍ବକଏକର ପିଛା ୨୦୦୦୦ଟଙ୍କା ଓ ଭାଙ୍ଗି ଯାଇଥିବା କଚା ଘରକୁ ପଲିଥିନ ଯୋଗାଇଦେବା ସହିତ ପ୍ରତି ଘର ପିଛା ୨୦୦୦୦ ଟଙ୍କା କ୍ଷତିପୂରଣ ପ୍ରଦାନ କରିବା ଓ କୃଷିଋଣ ସମେତ ସ୍ୱୟଂ ସହାୟକ ଗୋଷ୍ଠୀମାନଙ୍କୁ ପ୍ରଦାନ କରାଯାଇଥିବା ସମସ୍ତ ଋଣ ଛାଡ଼ ଓ ଇନ୍ସୁରାନ୍ସ ପ୍ରଦାନ କରିବାକୁ ଦାବୀ କରିଥିଲେ ନଚେତ ଅନିଦ୍ଧିଷ୍ଟ କାଳପାଇଁ ପାର୍ଟି ବ୍ଲକ କାର୍ଯ୍ୟାଳୟକୁ ଅଚଳ କରିଦେବ ବୋଲି ଚେତାବନୀ ଦେଇଥିଲେ । ଅନ୍ୟମାନଙ୍କ ମଧ୍ୟରେ ସାଥି ବାସୁଦେବ ଖଣ୍ଡୁଆଳ, ସମରେଶ ମୁଦୁଲି, ରବୀନ୍ଦ୍ର ପାଇଟାଳ, ଅଜୟ ଗାଉଁଣିଆ,ନଟବର ବାରିକ,ବିଶ୍ୱଜିତ ସାହୁ, କୈଳାଶ ଦାସ, ଦେବଦତ୍ତ ଦାସ, ବିଜୟ ବେହେରା, କାହ୍ନୁ ଚରଣ ସେନାପତି, ଶ୍ରୀକାନ୍ତ ସ୍ୱାଇଁ, ବାମର ଗୁରୁ, ଅମୁଲ୍ୟ ଦାସ, ନାରୁ ନାୟକ ସୁରେନ୍ଦ୍ର ସ୍ୱାଇଁ, ହରିପଦ ସାହୁ, ଉତ୍ତମ ପାଇଟାଳ ପ୍ରମୁଖ ଆନ୍ଦୋଳନର ନେତୃତ୍ୱ ନେଇଥିଲେ ।