ବ୍ରହ୍ମପୁର,୧୮/୦୭(ପିପିଟି):ଖୋଦ ହିଞ୍ଜିଳି ଥାନା ଠାରୁ ପ୍ରାୟ ୧୦୦ମିଟର ଦୁରତାରେ ହୋଇଛି ଚୋରି । ବସଷ୍ଟାଣ୍ଡ ଏବଂ ପୋଲିସ ଷ୍ଟେସନକୁ ସଂଯୋଗ କରୁଥିବା ଜାତୀୟ ରାଜପଥ ୫୯ ନମ୍ବର ମଧ୍ୟଭାଗ ଅଞ୍ଚଳର ଜଣାଶୁଣା ଡ୍ରେସ ଦୋକାନ ଅମ୍ବିକା ଡ୍ରେସେସ ରୁ ଗତକାଲି ଅର୍ଥାତ ୧୭/୦୭/୨୦୨୨ ମଧ୍ୟରାତ୍ରରେ ଉକ୍ତ ଡ୍ରେସ ଦୋକାନ ର ଛାତ ଉପରେ ଟିଣ ଭାଙ୍ଗି ଦୋକାନ ଗୃହ ମଧ୍ୟକୁ ପଶି ନଗଦ ୧୭ ହଜାର ଟଙ୍କା ସହ ଦୁଇଟି ମୋବାଇଲ ଚୋରି ହୋଇଥିବା ପୋଲିସକୁ ଦିଆଯାଇଥିବା ଏତଲା ରୁ ପ୍ରକାଶ । ଉକ୍ତ ସମ୍ବେଦନଶୀଳ ଘଟଣାକୁ କେନ୍ଦ୍ରକରି ହିଞ୍ଜିଳି ପୋଲିସ ଚୋରି ମକଦମା ରୁଜ୍ଜୁ କରିବା ସହ ଘଟଣାସ୍ଥଳରେ ପହଞ୍ଚି ତଦନ୍ତ କରୁଥିବା ଥାନା ଅଧିକାରୀ ଅଭିମନ୍ୟୁ ଦାସଙ୍କ ଠାରୁ ପ୍ରକାଶ । ପ୍ରକାଶ ଥାଉକି ଉକ୍ତ ଅଞ୍ଚଳ ବା ଅମ୍ବିକା ଡ୍ରେସେସ ର ପଛଭାଗ ରେ ପୌରପରିଷଦ ତରଫରୁ ମାର୍କେଟ କମ୍ପ୍ଲେକ୍ସ ନିମନ୍ତେ ଦୀର୍ଘ ଦିନ ଧରି ଏକ ବିରାଟକାୟ ଜାଗାକୁ ଖୋଳା ଯାଇଥିବାବେଳେ ପାର୍ଶ୍ଵରେ ଅନ୍ୟଏକ ମାର୍କେଟ କମ୍ପ୍ଲେକ୍ସ ଅର୍ଧନିର୍ମିତ ହୋଇ ପରିତ୍ୟକ୍ତ ଅବସ୍ଥା ରେ ପଡିରହିଛି । ଏହି ବିରାଟକାୟ ଜାଗା ଯାହା ଦୀର୍ଘଦିନ ଧରି ପରିତ୍ୟକ୍ତ ଅବସ୍ଥାରେ ପଡିରହିଥିଲା ବର୍ତ୍ତମାନ ଅର୍ଧନିର୍ମିତ ମାର୍କେଟ କମ୍ପ୍ଲେକ୍ସ ଏବଂ ଭେଣ୍ଡିଂ ଜୋନ ଅଞ୍ଚଳ ଅସାମାଜିକ ଲୋକଙ୍କ ଅଡ୍ଡାସ୍ଥଳୀ ପାଲଟିଛି । ଉକ୍ତ ପରିତ୍ୟକ୍ତ କୋଠାକୁ ଏବଂ ଜାଗା ପୂତ୍ତିଗନ୍ଧମୟ ହେତୁ ସାଧାରଣ ଲୋକଙ୍କ ସେଠାରେ ନଜର ପଡେନାହିଁ । ଏହାର ସୁଯୋଗ ଅସାମାଜିକ ବ୍ୟକ୍ତି ବିଶେଷଙ୍କ ପାଇଁ ଆଶୀର୍ବାଦ ପାଲଟିଛି । ବିଶେଷ ଭାବେ ନଜର ଆଢୁଆଳରେ ରହିଥିବା ଏହି ଜାଗାକୁ ଏବଂ ମାର୍କେଟ ଅଞ୍ଚଳକୁ ଜାତୀୟ ରାଜପଥ ମଧ୍ୟଭାଗରେ ସି.ସି.ଟିଭି କ୍ୟାମେରା ର ବ୍ୟବସ୍ଥା ଏବଂ ପୋଲିସ ପେଟ୍ରୋଲିଂ କରାଗଲେ ଏହିଭଳି ଚୋରିହାରିକୁ ରୋକା ଯିବାସହ ମାର୍କେଟ ବ୍ଯବସାୟୀ ଉପକୃତ ହେବେବୋଲି ହିଞ୍ଜିଳିକାଟୁ ବିକାଶ ମଞ୍ଚର ସଭାପତି ପ୍ରମୋଦ କୁମାର ପଣ୍ଡା ମତ ପ୍ରକାଶ କରିବାସହ ଉପଯୁକ୍ତ କାର୍ଯ୍ୟାନୁଷ୍ଠାନ ପାଇଁ ଦାବିକରିଛନ୍ତି।