ବ୍ରହ୍ମପୁର, ୧୧/୧୦(ପିପିଟି): ଗଞ୍ଜାମ- ଗଜପତି ସୀମାନ୍ତ ଅଞ୍ଚଳରେ ଚୋରା ଗଞ୍ଜେଇ କାରବାର ବୃଦ୍ଧି ପାଉଛି। ପାଟପୁର ଥାନା ଅନ୍ତର୍ଗତ ଟି.ଗୋବିନ୍ଦପୁର ପଞ୍ଚାୟତର ମହିବିଲ ଓ ଘଷିଆମ୍ବ ଗ୍ରାମର କିଛି ବ୍ଯକ୍ତିଙ୍କ ଘରେ ଗଞ୍ଜେଇ ମହଜୁଦ ଥିବା ଖବର ଥାନା ଅଧିକାରୀ ସବ୍ଯସାଚୀ ମଲ୍ଲଙ୍କ ନିର୍ଦ୍ଦେଶରେ ଏସଆଇ ଟୁନା ପରିଡାଙ୍କ ନେତୃତ୍ବରେ ଚଢାଉ କରାଯାଇଥିଲା। ମହିବିଲ ଗ୍ରାମର ୫ଜଣଙ୍କ ଘରେ ଚଢାଉ କରାଯାଇ ୩୮୬.୪୦୦ କେଜି ଗଞ୍ଜେଇ ଜବତ କରାଯାଇଛି। ସେହିଭଳି ଘଷିଆମ୍ବ ଗ୍ରାମର ୩ ଜଣଙ୍କ ଘରେ ଚଢାଉ କରାଯାଇ ୪୧୭.୪୦୦ କେଜି ଗଞ୍ଜେଇ ଜବତ କରାଯାଇଥିବା ନେଇ ରବିବାର ଦିନ ଏକ ସାମ୍ବାଦିକ ସମ୍ମିଳନୀରେ ଆସ୍କା ଏସଡିପିଓ ଉମାଶଙ୍କର ସିଂ ସୂଚନା ଦେଇଛନ୍ତି। ଜବତ ଗଞ୍ଜେଇର ମୂଲ୍ଯ ପ୍ରାୟ ୧ କୋଟି ୨୦ ଲକ୍ଷ ଟଙ୍କା ହେବ ବୋଲି ପୁଲିସ କହିଛି। ଏହି ଘଟଣାରେ କାହାରିକୁ ଗିରଫ କରାଯାଇନଥିବା ଜଣାପଡିଛି। ସମ୍ବାଦ ସମ୍ମିଳନୀରେ ଥାନା ଅଧିକାରୀ ସବ୍ୟସାଚୀ ମଲ୍ଲ ଉପସ୍ଥିତ ଥିଲେ। ପାଟପୁର ଥାନା କେଶ ନମ୍ବର ୩୩୧/୨୦୨୧ ଓ ୩୩୨/୨୦୨୧ ଦୁଇଟି ଏନଡିପିଏସ୍ ମାମଲା ରୁଜୁ ହୋଇଛି ।