ଭୁବନେଶ୍ୱର, ୩୧/୦୭(ପିପିଟି):ଓଡ଼ିଶା ଅର୍ବନ୍ ଆକାଡେମୀଠାରେ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ରାଜ୍ୟର ୨୫ଟି ପୌରାଞ୍ଚଳର ପ୍ରାୟ ୬୦ ଜଣ ସିଟି ଇଞ୍ଜିନିୟର, ଟାଉନ୍ ପ୍ଲାନର ଏବଂ କନ୍ସଲଟାଣ୍ଟଙ୍କ ପାଇଁ ଏକ ଦୁଇଦିନିଆ ଦକ୍ଷତା ବୃଦ୍ଧି କାର୍ଯ୍ୟକ୍ରମ ଶୁଭାରମ୍ଭ ହୋଇଯାଇଛି। ‘ମୁଖ୍ୟମନ୍ତ୍ରୀ ସହରୀ ବିକାଶ ଯୋଜନା’ ଅଧୀନରେ ସହରୀ ଭିତ୍ତିଭୂମି ପ୍ରକଳ୍ପଗୁଡ଼ିକର ଯୋଜନା, କାର୍ଯ୍ୟାନ୍ୱୟନ ଏବଂ ଅନୁଧ୍ୟାନ ପ୍ରକ୍ରିୟାକୁ ଅଧିକ ସୁଦୃଢ଼ କରିବା, ବୈଷୟିକ ଦକ୍ଷତା ବୃଦ୍ଧି ଏବଂ ଜ୍ଞାନର ଆଦାନପ୍ରଦାନ କରିବା ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ।
ଏହି କାର୍ଯ୍ୟକ୍ରମରେ ପ୍ରକଳ୍ପ ଯୋଜନା, ଇଞ୍ଜିନିୟରିଂର ଶ୍ରେଷ୍ଠ କାର୍ଯ୍ୟପନ୍ଥା, ଗୁଣବତ୍ତା ନିଶ୍ଚିତକରଣ, ଚୁକ୍ତିନାମା ପରିଚାଳନା, ପ୍ରକଳ୍ପ ଅନୁଧ୍ୟାନ ଏବଂ ସମୟସୀମା ମଧ୍ୟରେ ସହରୀ ଭିତ୍ତିଭୂମି କାର୍ଯ୍ୟ ସମ୍ପୂର୍ଣ୍ଣ କରିବା ସମ୍ପର୍କରେ ବୈଷୟିକ ଆଲୋଚନାଚକ୍ର ସାମିଲ ରହିଛି । ବିକାଶମୂଳକ ପ୍ରକଳ୍ପଗୁଡ଼ିକର ଦକ୍ଷ କାର୍ଯ୍ୟାନ୍ୱୟନ ପାଇଁ ବୈଷୟିକ ଆଧିକାରିକମାନଙ୍କୁ ଆବଶ୍ୟକୀୟ ଜ୍ଞାନ ଓ ବ୍ୟାବହାରିକ ଦକ୍ଷତା ପ୍ରଦାନ କରିବା ସହ ପୌରାଞ୍ଚଳଗୁଡ଼ିକ ମଧ୍ୟରେ ଉତ୍ତମ ସହଯୋଗ ଓ ଅଭିଜ୍ଞତା ଆଦାନପ୍ରଦାନକୁ ଏହା ପ୍ରୋତ୍ସାହିତ କରିବ ।
ଉଦ୍ଘାଟନୀ କାର୍ଯ୍ୟକ୍ରମରେ ନଗର ଉନ୍ନୟନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଉଷା ପାଢ଼ୀଙ୍କ ଅଧ୍ୟକ୍ଷତାରେ MSBY ଅଧୀନରେ ଚାଲିଥିବା ପ୍ରକଳ୍ପଗୁଡ଼ିକର ଅଗ୍ରଗତି ନେଇ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା । ବୈଠକରେ ୨୫ଟି ପୌରାଞ୍ଚଳର ଆଧିକାରିକମାନେ ଚାଲୁରହିଥିବା କାର୍ଯ୍ୟର ଭୌତିକ ଓ ଆର୍ଥିକ ଅଗ୍ରଗତି, ସଫଳତା, କାର୍ଯ୍ୟକାରୀ କରିବାରେ ଆସୁଥିବା ଆହ୍ୱାନ ଏବଂ କାର୍ଯ୍ୟ ସମ୍ପୂର୍ଣ୍ଣ କରିବାର ସମୟସୀମା ସମ୍ପର୍କରେ ବିସ୍ତୃତ ତଥ୍ୟ ଉପସ୍ଥାପନ କରିଥିଲେ ।
ପ୍ରକଳ୍ପଗୁଡ଼ିକର ଅଗ୍ରଗତିର ସମୀକ୍ଷା କରି ଶ୍ରୀମତୀ ପାଢ଼ୀ କାର୍ଯ୍ୟାନ୍ୱୟନରେ ଥିବା ସମସ୍ୟାଗୁଡ଼ିକୁ ଦୂର କରିବା, ପ୍ରକଳ୍ପ ଅନୁଧ୍ୟାନକୁ କଡ଼ାକଡ଼ି କରିବା, ଆନ୍ତଃ-ବିଭାଗୀୟ ସମନ୍ୱୟ ରକ୍ଷା କରିବା ଏବଂ ଗୁଣାତ୍ମକ ମାନ ବଜାୟ ରଖିବା ଉପରେ ଗୁରୁତ୍ୱାରୋପ କରିଥିଲେ । ନିର୍ଦ୍ଧାରିତ ସମୟସୀମା ମଧ୍ୟରେ ପ୍ରକଳ୍ପଗୁଡ଼ିକୁ ଶେଷ କରିବା ପାଇଁ କ୍ଷେତ୍ରସ୍ତରୀୟ ସମସ୍ୟାଗୁଡ଼ିକର ସମୟବଦ୍ଧ ସମାଧାନ କରିବାକୁ ସେ ପୌରାଞ୍ଚଳଗୁଡ଼ିକୁ ନିର୍ଦ୍ଦେଶ ଦେଇଛନ୍ତି ।ସୁଦୃଢ଼, ସଂଗ୍ରାମୀ ଏବଂ ନାଗରିକ-କେନ୍ଦ୍ରିକ ସହରୀ ଭିତ୍ତିଭୂମି ଗଠନରେ ସିଟି ଇଞ୍ଜିନିୟର, ଟାଉନ୍ ପ୍ଲାନର ଏବଂ କନ୍ସଲଟାଣ୍ଟମାନଙ୍କ ଗୁରୁତ୍ୱପୂର୍ଣ୍ଣ ଭୂମିକା ରହିଛି ବୋଲି ଅତିରିକ୍ତ ମୁଖ୍ୟ ଶାସନ ସଚିବ ନିଜ ବକ୍ତବ୍ୟରେ କହିଥିଲେ । ସ୍ଥାୟୀ ଓ ଗୁଣାତ୍ମକ ସାର୍ବଜନୀନ ସମ୍ପତ୍ତି ସୃଷ୍ଟି ପାଇଁ ସୂକ୍ଷ୍ମ ଯୋଜନା, ନିୟମିତ କ୍ଷେତ୍ର ପରିଦର୍ଶନ, ସମ୍ବଳର ସଠିକ୍ ବିନିଯୋଗ ଏବଂ ଅଭିନବ ଇଞ୍ଜିନିୟରିଂ କୌଶଳର ଆପଣାଇବା ଉପରେ ସେ ଗୁରୁତ୍ଵ ଦେଇଥିଲେ । MSBY ଅଧୀନରେ କାର୍ଯ୍ୟର ଲକ୍ଷ୍ୟସାଧନକୁ ନିୟମିତ ଭାବେ ଅନୁଧ୍ୟାନ କରିବା ସହ ଉଚ୍ଚମାନର କାର୍ଯ୍ୟାନ୍ୱୟନ ବଜାୟ ରଖିବାକୁ ସେ ସମସ୍ତ ପୌରାଞ୍ଚଳକୁ ଆହ୍ୱାନ ଜଣାଇଛନ୍ତି ।
ପୌର ପ୍ରଶାସନ ନିର୍ଦ୍ଦେଶକ ଅରିନ୍ଦମ ଡାକୁଆ ଏବଂ ନଗର ଉନ୍ନୟନ ବିଭାଗର ଅତିରିକ୍ତ ସଚିବ ରବୀନ୍ଦ୍ର କୁମାର ସାହୁ ମଧ୍ୟ ପ୍ରଶିକ୍ଷାର୍ଥୀଙ୍କ ସହ ଆଲୋଚନା କରିଥିଲେ ଏବଂ ସମୟବଦ୍ଧ କାର୍ଯ୍ୟ, ଗୁଣବତ୍ତା ନିଶ୍ଚିତକରଣ ଓ ପ୍ରଭାବୀ ପ୍ରକଳ୍ପ ପରିଚାଳନା ଉପରେ ଗୁରୁତ୍ୱ ଆରୋପ କରିଥିଲେ ।ଆସନ୍ତାକାଲି ଏହି କାର୍ଯ୍ୟକ୍ରମର ଦ୍ୱିତୀୟ ପର୍ଯ୍ୟାୟ ଅନୁଷ୍ଠିତ ହେବ, ଯେଉଁଥିରେ ଅନ୍ୟ ୨୫ଟି ପୌରାଞ୍ଚଳର ବୈଷୟିକ ଅଧିକାରୀ ମାନେ ଅଂଶ ଗ୍ରହଣ କରିବେ।