ଚିଲିକା,୨୦/୧୨:ବ୍ରହ୍ମପୁରରୁ ଯାତ୍ରୀମାନଙ୍କୁ ନେଇ ଭୁବନେଶ୍ୱର ଅଭିମୁଖେ ଯାଉଥିବା ‘ବୃନ୍ଦାବନ’ ନାମକ ଯାତ୍ରୀବାହୀ ବସ ୧୬ ନମ୍ବର ଜାତୀୟ ରାଜପଥର ନୂଆଗଡ ଛକ ନିକଟରେ ଦୁର୍ଘଟଣାଗ୍ରସ୍ତ ହୋଇଛି । ପୁଲିସ ଓ ଅଗ୍ନିଶମ ବିଭାଗର ତ୍ୱରୀତ୍ କାର୍ଯ୍ୟାନୃଷ୍ଠାନ ଫଳରେ ସମସ୍ତ ଯାତ୍ରୀ ସୁରକ୍ଷିତ ଥିବାବେଳେ ୧୦ଜଣ ଯାତ୍ରୀ ସାମାନ୍ୟ ଆହତ ହୋଇଛନ୍ତି । ବସ ଚାଳକ ଓ ସହାୟକ ଫେରାର ହୋଇଯାଇଥିବା ବେଳେ ପୁଲିସ ଘଟଣାର ତଦନ୍ତ ଚଳାଇଛି । ଓଡି୦୨ବିକେ ୫୧୨୭ ନମ୍ବର ବିଶିଷ୍ଟ ବୃନ୍ଦାବନ ଯାତ୍ରୀବାହୀ ବସଟି ଶୁକ୍ରବାର ମଧ୍ୟାହ୍ନରେ ବ୍ରହ୍ମପୁରରୁ ଯାତ୍ରୀଙ୍କୁ ନେଇ ଭୁବନେଶ୍ୱର ଅଭିମୁଖେ ଯାତ୍ରା କରିଥିଲା । ମାତ୍ର ପ୍ରାୟ ସାଢେ ଦୁଇଟାରେ ଖୋର୍ଦ୍ଧା ଜିଲ୍ଲା ଆଇଏନଏସ ଚିଲିକା କେନ୍ଦ୍ର ନିକଟସ୍ଥ ୧୬ନମ୍ବର ଜାତୀୟ ରାଜପଥର ନୂଆଗଡ ଚକ ନିକଟରେ ଭାରସାମ୍ୟ ହରାଇ ରାସ୍ତା ପାଶ୍ୱର୍କୁ ଖସିପଡିଥିଲା । ଘଟଣା ସମ୍ପର୍କରେ ଖବର ପାଇ ବାଲୁଗାଁ ପୁଲିସ ଘଟଣାସ୍ଥଳରେ ପହଞ୍ଚି ଅଗ୍ନିଶମ ବିଭାଗକୁ ସୂଚନା ଦେଇଥିଲେ । ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ବସରୁ ଯାତ୍ରୀ ମାନଙ୍କୁ ସୁରକ୍ଷିତ ଭାବେ ଉଦ୍ଧାର କରିଥିଲେ । ତେବେ ଦଶଜଣ ଯାତ୍ରୀ ସାମାନ୍ୟ ଆହତ ହୋଇଥିଲେ । ଦୁର୍ଘଟଣା ପରେ ପରେ ବସ ଚାଳକ, ସହକାରୀ ଓ କଣ୍ଡକ୍ଟର ଘଟଣାସ୍ଥଳରୁ ଫେରାର ହୋଇଯାଇଥିଲେ । ତେବେ ଲଘୁଚାପ ପ୍ରଭାବରେ ଗୁରୁବାର ରାତିରୁ ଶୁକ୍ରବାର ଦିନ ତମାମ ବାଲୁଗାଁ ଓ ଏହାର ଆଖପାଖ ଅଞ୍ଚଳରେ ବର୍ଷା ଲାଗିରହିଛି । ଫଳରେ ଦୁର୍ଘଟଣାଗ୍ରସ୍ତା ଯାତ୍ରୀମାନେ ବର୍ଷାରେ ଭିଜି ନାହିଁ ନଥିବା ଅସୁବିଧାର ସମ୍ମୁଖିନ ହୋଇଛନ୍ତି ।