ମାଲକାନଗିରି,୧୮/୦୮(ପିପିଟି):ମାଲକାନଗିରି ତହସିଲ ଅନ୍ତର୍ଗତ ଝରାପାଲି ସର୍କଲ, ରାଜସ୍ବ ନୀରିକ୍ଷକ ଅନୁସୂଚିତ ଜାତି ପ୍ରମାଣପତ୍ର ପ୍ରଦାନ ପାଇଁ ଯାଞ୍ଚ ରିପୋର୍ଟ ଦାଖଲ କରିବାକୁ ଆବେଦନକାରୀଙ୍କ ଠାରୁ ୮,୦୦୦ / – ଟଙ୍କା ଲାଞ୍ଚ ନେଇଥିଲା ବେଳେ ଓଡିଶା ଭିଜିଲାନ୍ସ ଦ୍ୱାରା ଧରାପଡିଛି।
ଆବେଦନକାରୀ ଉପରୋକ୍ତ ଉଦ୍ଦେଶ୍ୟରେ ଆର ଏଣ୍ଡ ଡିଏମ ବିଭାଗରେ ସରକାର ଧାର୍ଯ୍ୟ କରିଥିବା ନିୟମ ଅନୁଯାୟୀ ଅନଲାଇନରେ ଆବେଦନ କରିଥିଲେ ଏବଂ ଆବଶ୍ୟକ ଫି ମଧ୍ୟ ଜମା କରିଥିଲେ। ତେବେ ଅଭିଯୁକ୍ତ ଆର.ଆଇ ବାଲା ଅନାବଶ୍ୟକ ପ୍ରକ୍ରିୟାକୁ ବିଳମ୍ବ କରୁଥିଲେ ଏବଂ ଏହା ବଦଳରେ ଆବେଦନକାରୀ (ଅଭିଯୋଗକାରୀ) ଙ୍କ ଠାରୁ ୧୦,୦୦୦ / – ଟଙ୍କା ଲାଞ୍ଚ ମାଗିଥିଲେ। ଅଭିଯୋଗକାରୀଙ୍କୁ ୮,୦୦୦ / – ଟଙ୍କା ବର୍ତ୍ତମାନ ଦେବାକୁ କହିଥିଲା ବେଳେ କାର୍ଯ୍ୟ ଶେଷ ହେବା ପରେ ବଳକା ୨ ହଜାର ଟଙ୍କା ଦେବାକୁ ଧାର୍ଯ୍ୟ କରିଥିଲେ।
ଏ ସମ୍ପର୍କରେ ଲାଞ୍ଚ ତଥା ନିର୍ଯ୍ୟାତନା ଅଭିଯୋଗରେ ଅସନ୍ତୋଷ ପ୍ରକାଶ କରି ସେ ଭିଜିଲାନ୍ସ କର୍ତ୍ତୃପକ୍ଷଙ୍କୁ ଜଣାଇଥିଲେ। ଏହା ଉପରେ ଆଜି ଓଡ଼ିଶା ଭିଜିଲାନ୍ସର ଏକ ଟିମ୍ ଅଭିଯୁକ୍ତ ବାଲାଙ୍କ ଦପ୍ତରରୁ ୮,୦୦୦ / – ଟଙ୍କା ସମ୍ପୂର୍ଣ୍ଣ ଲାଞ୍ଚ ଟଙ୍କା ଉଦ୍ଧାର କରାଯାଇ ଜବତ କରାଯାଇଛି। ଏହା ପରେ ବାଲାଙ୍କ ଦୁଇଟି ସ୍ଥାନରେ ଏକକାଳୀନ ଚଢ଼ଉ ଚାଲିଛି। ଏହି ପରିପ୍ରେକ୍ଷୀରେ ଆର ଆଇ ବାଲାଙ୍କ ନାମରେ କୋରାପୁଟ ଭିଜିଲାନ୍ସ କେସ୍ ନମ୍ବର ୧୯/୨୦୨୬, ୟୁ/ ଏସ ୭ପିସି (ସଂଶୋଧନ) ଅଧିନିୟମ, ୨୦୧୮ ଅନୁସାରେ ମାମଲା ପଞ୍ଜିକୃତ ହୋଇଛି ।ଏହାପୂର୍ବରୁ ସୁରଜ ବାଲା, ମୋଟୁରେ ଆର ଆଇ ଥିବା ବେଳେ ଅନ୍ୟ ଏକ ଟ୍ରାପ ମାମଲାରେ କୋରାପୁଟ ଭିଜିଲାନ୍ସ କେସ୍ ନମ୍ବର ୩୩/୨୦୨୩ ମାମଲା ରୁଜୁ ହୋଇଛି,ଯେଉଁଥିରେ ସେ ଏକ ଇସି ମାମଲାରେ ବିଜ୍ଞପ୍ତି ପ୍ରଦାନ ପାଇଁ ୧୫,୦୦୦/ – ଟଙ୍କା ଲାଞ୍ଚ ନେଇ ଧଳା ପଡି ଥିଲେ। ଉକ୍ତ ମାମଲା ବର୍ତ୍ତମାନ ବିଚାରଧୀନ ରହିଛି।
(ରିପୋର୍ଟ: ବରିଷ୍ଠ ସାମ୍ବାଦିକ କେଶବ ଚନ୍ଦ୍ର ନାୟକ)