ବେଲଗୁଣ୍ଠା,୨୮/୦୯(ପିପିଟି): କରୋନା କଟକଣା ମଧ୍ୟରେ ପିଲା ମାନଙ୍କର ଶିକ୍ଷା ବ୍ୟବସ୍ଥା ଭୁଶୁଡି ପଡ଼ିଥିବା ବେଳେ ବିଦ୍ୟାଳୟ ଗୁଡିକର ଶ୍ରୀ ମଧ୍ୟ ହଜିଯାଇଛି । ଏହାରି ଭିତରେ ବହୁ ପ୍ରାଥମିକ ବିଦ୍ୟାଳୟରେ ପାଚେରୀ ନଥିବା ବେଳେ କୌଣସି ପ୍ରାଥମିକ ବିଦ୍ୟାଳୟ ପାଇଁ ରାତ୍ରି ଜଗୁଆଳର କୌଣସି ବ୍ୟବସ୍ଥା ନଥିବାରୁ ଦିନକୁ ଦିନ ପ୍ରାଥମିକ ବିଦ୍ୟାଳୟ ଗୁଡିକରୁ ଚୋରି ରାହାଜାନି ମଧ୍ଯ ବୃଦ୍ଧି ପାଇଛି । ସେହିପରି ଏକ ଘଟଣା ଘଟିଛି ବେଲଗୁଣ୍ଠା ବ୍ଳକ୍ ନେଟଙ୍ଗା ଗ୍ରାମର ଉଚ୍ଚ ପ୍ରାଥମିକ ବିଦ୍ୟାଳୟରେ । ବିଦ୍ୟାଳୟ ବନ୍ଦ ହେବା ପରେ ବିଳମ୍ବିତ ରାତିରେ ଏହି ବିଦ୍ୟାଳୟରୁ ଚୋର ମାନେ ତାଲା ଭାଙ୍ଗି ପଣି ମୋଟର, ଫ୍ୟାନ୍ ଏବଂ ଗ୍ୟାସ୍ ସିଲିଣ୍ଡର ଚୋରି କରି ନେଇଥିବା ବିଦ୍ୟାଳୟର ପ୍ରଧାନ ଶିକ୍ଷକ ଗାଙ୍ଗପୁର ଥାନାରେ ଅଭିଯୋଗ କରିଥିଲେ । ଏହି ଅଭିଯୋଗକୁ ଆଧାର କରି ଗାଙ୍ଗପୁର ପୋଲିସ୍ ତଦନ୍ତ କରିବା ସହିତ ଚୋର ଦଳକୁ ଧରି ଚୋରି ଜିନିଷ ଠାବ କରିବାରେ ସକ୍ଷମ ହୋଇଛି । ଗିରଫ ହୋଇଥିବା ତିନି ବ୍ୟକ୍ତି ହେଲେ ନେଟଙ୍ଗା ଗ୍ରାମର ପ୍ରମୋଦ ନାୟକ, ଅମର ନାୟକ ଏବଂ ଅନୀଲ୍ ନାୟକ । ପୋଲିସ୍ ଅଭିଯୁ୍କ୍ତ ମାନଙ୍କ ଠାରୁ ଚୋରି ହୋଇଥିବା ଫ୍ୟାନ୍, ମୋଟର ଏବଂ ଗ୍ୟାସ୍ ସିଲିଣ୍ଡର ଜବତ କରିବା ସହିତ ସେମାନଙ୍କୁ କୋର୍ଟଚାଲାଣ କରିଥିବା ସୂଚନା ମିଳିଛି ।
(ରିପୋର୍ଟ- ସୁଶାନ୍ତ କୁମାର ବେହେରା। )