ଭୁବନେଶ୍ୱର,୨୪/୧୧ : ରାଜ୍ୟରେ ବିଜେପି କ୍ଷମତାକୁ ଆସିବାର ପାଞ୍ଚ ମାସ ପୁରିଯାଇଥିଲା ବେଳେ, ରାଜ୍ୟର ଆଇନ ଶୃଙ୍ଖଳା କେବଳ ବିପର୍ଯ୍ୟସ୍ତ ହୋଇନି, ରାଜ୍ୟ ପୁଲିସ ବାହିନୀକୁ ସରକାରୀ ଗୁଣ୍ଡା ଭାବେ ବ୍ୟବହାର କରାଯାଉଛି ବୋଲି ବିଜୁ ଜନତା ଦଳ ତରଫରୁ ଅଭିଯୋଗ କରାଯାଇଛି। ଶଙ୍ଖ ଭବନ ଠାରେ ଆଜି ଆୟୋଜିତ ସାମ୍ୱାଦିକ ସମ୍ମିଳନୀରେ ବିଜୁ ଜନତା ଦଳର ମୁଖ୍ୟ ସଚେତକ ତଥା ପୂର୍ବତନ ବାଚସ୍ପତି ପ୍ରମିଳା ମଲ୍ଲିକ ଓ ପୂର୍ବତନ ମନ୍ତ୍ରୀ ସଞ୍ଜୟ ଦାସବର୍ମା ବିଜେପି ସରକାରଙ୍କ ଶାସନ କାଳରେ ଘଟିଥିବା ପ୍ରମୁଖ ଅପରାଧିକ ଘଟଣା ଗୁଡିକର ଏକ ଲମ୍ୱା ତାଲିକା ଗଣମାଧ୍ୟମ ସମ୍ମୁଖରେ ରଖିଥିଲେ। ଆସନ୍ତାକାଲି ବିଜେଡିର ଏକ ପ୍ରତିନିଧି ମଣ୍ଡଳୀ ରାଜ୍ୟ ପୁଲିସ ଡିଜିପିଙ୍କୁ ଭେଟି ବିପର୍ଯ୍ୟସ୍ତ ଆଇନ ଶୃଙ୍ଖଳା ଓ ପୁଲିସର ବିବାଦୀୟ ଭୂମିକା ଉପରେ ଏକ ସ୍ମାରକପତ୍ର ପ୍ରଦାନ କରାଯିବ ଓ ଯଦି ତା ପରେ ମଧ୍ୟ ସ୍ଥିତିରେ ସୁଧାର ନଆସେ, ତାହେଲେ ବିଜେଡି ରାଜ୍ୟବ୍ୟାପୀ ଆନ୍ଦୋଳନ କରିବ ବୋଲି ଦୁଇ ବରିଷ୍ଠ ନେତା ସୂଚନା ଦେଇଥିଲେ।
ପ୍ରମିଳା ମଲ୍ଲିକ କହିଥିଲେ,ରାଜ୍ୟରେ ବିଜେପି କ୍ଷମତାକୁ ଆସୁ ଆସୁ ବାଲେଶ୍ୱର, ଭଦ୍ରକ ଓ ଖୋର୍ଦ୍ଧାରେ ଦଙ୍ଗା ଉପୁଜିଥିଲା । ତାପରେ ନିୟମିତ ଭାବରେ, କୁଚିଣ୍ଡାରେ ଦଳିତ ନାବାଳିକାକୁ ଗଣଦୁଷ୍କର୍ମ,ବାଲାଙ୍ଗିରର ବଙ୍ଗୋମୁଣ୍ଡାରେ ଆଦିବାସୀ ଯୁବତୀଙ୍କୁ ବଳାକ୍ରାର ଉଦ୍ୟମ ଓ ତା ମୁହଁରେ ଜୋର ଜବରଦସ୍ତ ବିଷ୍ଠା ପୁରାଇଦେବା ଭଳି ଅମାନବୀୟ ଘଟଣା, ନୀଳଗିରିରେ ଆଦିବାସୀ ଯୁବତୀକୁ ବଳାକ୍ରାର ଓ ହତ୍ୟା, କଟକରେ ଦଳିତ ଯୁବତୀକୁ ଗଣଦୁଷ୍କର୍ମ ଇତ୍ୟାଦି ଘଟଣା ରାଜ୍ୟରେ ଅପରାଧିକ ଘଟଣାର ଚିନ୍ତାଜନକ ଭାବେ ବୃଦ୍ଧି ଘଟି ଚାଲିଛି । ସେହିପରି, ଗଞ୍ଜାମର ତାରା ତାରିଣୀ ମନ୍ଦିରରୁ ଚୋରି ଭଳି ଅନେକ ଘଟଣା ରାଜ୍ୟବାସୀଙ୍କୁ ବ୍ୟଥିତ କରିଛି। ଅନେକ ଘଟଣାରେ ପୁଲିସର ଭୂମିକା ମଧ୍ୟ ଚିନ୍ତାଜନକ ରହିଛି। ଯାଜପୁରରେ ଧର୍ମଶାଳା ବିଧାୟକ ହିମାଂଶୁ ସାହୁଙ୍କ ଉପରେ ଆକ୍ରମଣର ଅଭିଯୋଗ ଉପରେ ପୁଲିସର କାର୍ଯ୍ୟାନୁଷ୍ଠାନ ଏକତରଫା ରହିଛି ବୋଲି ସେ କହିଥିଲେ।ସଞ୍ଜୟ ଦାସବର୍ମା କହିଥିଲେ, ବିରଜା ପ୍ରସଙ୍ଗରେ ଯାଜପୁର ଜନସାଧାରଣଙ୍କ ଦ୍ୱାରା ରାସ୍ତାରୋକ ଆନ୍ଦୋଳନ ଚାଲିଥିବା ବେଳେ ଧର୍ମଶାଳା ବିଧାୟକ ହିମାଂଶୁ ସାହୁ ଓ ତାଙ୍କର କିଛି ସମର୍ଥକ ସେହି ରାସ୍ତା ଅତିକ୍ରମ କରିବାକୁ ପ୍ରୟାସ କରିବା ବେଳେ ଦୁଇ ଗୋଷ୍ଠୀ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା। କିନ୍ତୁ, ସମଗ୍ର ଘଟଣାକୁ ଓ ଶ୍ରୀ ସାହୁଙ୍କ ଦ୍ୱାରା ଦିଆଯାଇଥିବା ଭିନ୍ନ ଭିନ୍ନ ମନ୍ତବ୍ୟକୁ ଅନୁଧ୍ୟାନ କଲେ ଏହି ଘଟଣାରେ ବିଧାୟକ ଶ୍ରୀ ସାହୁଙ୍କ ଭୂମିକା ସନ୍ଦେହ ଘେରରେ ରହଛି। ଏହି ଘଟଣାରେ ବିଧାୟକ ଶ୍ରୀ ସାହୁ ଓ ତାଙ୍କର ସମର୍ଥକଙ୍କ ଭିଡିଓ ଗଣମାଧ୍ୟମ ଆଗରେ ପ୍ରସ୍ତୁତ କରାଯାଇଥିଲା।
ବିଧାୟକ ଶ୍ରୀ ସାହୁ ଡିଡିଏମଙ୍କ ଅଫିସ ଯାଉଥିଲେ ବୋଲି ତାଙ୍କ ମନ୍ତବ୍ୟରେ କହିଛନ୍ତି। କିନ୍ତୁ ଏଠାରେ ପ୍ରଶ୍ନ ଉଠୁଛି, କେଉଁ କାମ ପାଇଁ ବିଧାୟକ ରାତି ପ୍ରାୟ ସାତଟା ପଇଁଚାଳିଶ ମିନିଟରେ ଡିଡିଏମ ଅଫିସକୁ ଯାଉଥିଲେ ? ସେ ଚାନ୍ଦା ଆଣିବାକୁ ଅଥବା ଦେବାକୁ ଯାଉଥିଲେ, ବିଧାୟକ ଶ୍ରୀ ସାହୁ ସ୍ପଷ୍ଟ କରିବା ଦରକାର ବୋଲି ଶ୍ରୀମତୀ ମଲ୍ଲିକ କହିଥିଲେ । ଘଟଣାସ୍ଥଳର ଭିଡିଓ ବିଭିନ୍ନ ଗଣମାଧ୍ୟମରେ ଘୁରି ବୁଲୁଥିବା ବେଳେ, ବିଧାୟକ ଶ୍ରୀ ସାହୁଙ୍କୁ ଆନ୍ଦୋଳନରତ ଜନସାଧାରଣ ମରଣାତ୍ମକ ଆକ୍ରମଣ କରିଛନ୍ତି ବୋଲି ବିଧାୟକଙ୍କ ଅଭିଯୋଗର କୌଣସି ଭିଜୁଆଲ ଦେଖିବକୁ ମିଳି ନାହିଁ। ତେଣୁ ବିଧାୟକଙ୍କ ଉପରେ ଆକ୍ରମଣ ଅଭିଯୋଗର ସତ୍ୟାସତ୍ୟକୁ ନେଇ ସନ୍ଦେହ ରହିଛି। ଅପରପକ୍ଷରେ, ଧର୍ମଶାଳାର କିଛି ବିଧାୟକଙ୍କ ସମର୍ଥକ ଠେଙ୍ଗା ଓ ଅନ୍ୟାନ୍ୟ ମାରଣାସ୍ତ୍ର ଧରି ଘଟଣାସ୍ଥଳରେ ବୁଲୁଥିବାର ଭିଡିଓ ଦେଖିବାକୁ ମିଳିଛି।