ବାଙ୍ଗିରିପୋଷି,୨୧/୧୧: ଥାନା ପରିସରରୁ ଜବତ ଟ୍ରାକ୍ଟର ଧରି ଖସି ଯାଉଥିଲେ ନାବାଳକ। ରାସ୍ତାରେ ବେପରୁଆ ଗାଡ଼ି ଚାଳନା ଦେଖି ଅଟକାଇଲେ ଲୋକ । ପୁଲିସ ପରେ ଖବର ପାଇ ଜବତ ଟ୍ରାକ୍ଟର ଥାନାକୁ ଫେରାଇ ଆଣିବା ସହ ନାବାଳକକୁ ଅଟକ ରଖି ପଚାଉଚରା ଜାରି ରଖିଛି। ଦିନ ଦ୍ବିପହରରେ ଥାନାରେ ଘଟିଥିବା ଏମିତି ଏକ ଅଭାବନୀୟ ଘଟଣା ସାଧାରଣରେ ଚର୍ଚ୍ଚା ଜୋର ଧରିଛି। ପ୍ରାପ୍ତ ସୂଚନା ମୁତାବକ, ଗତ କିଛିଦିନ ପୂର୍ବରୁ ବାଲି ଚୋରା ଚାଲାଣ ବେଳେ ଏକ ଟ୍ରାକ୍ଟର ଜବତ କରିଥିଲା ବାଙ୍ଗିରିପୋଷି ପୁଲିସ। ତେବେ ଦୀର୍ଘ ଦିନ ଧରି ଗାଡି ମାଲିକ ଗାଡିଟିକୁ ମୁକୁଲାଇ ବାରେ ବିଫଳ ହେବା ଯୋଗୁଁ ଜବତ ଗାଡ଼ିଟିକୁ ଥାନା ପରିସରରେ ରଖା ଯାଇଥିଲା। ବୁଧବାର ସାପ୍ତାହିକ ହାଟ ପାଇଁ ବଜାର ଭିଡ ରହିଥିଲା। ଏହାର ସୁଯୋଗ ନେଇ ଜଣେ ନାବାଳକ ଥାନା ପରିସରରୁ ଉକ୍ତ ଟ୍ରାକ୍ଟରଟିକୁ ଧରି ଖସି ଯାଉଥିଲେ। ତେବେ ନାବାଳକଙ୍କ ବେପରୁଆ ଗାଡ଼ି ଚାଳନା ପାଇଁ ଅଳ୍ପକେ ଦୁର୍ଘଟଣାରୁ ବର୍ତ୍ତି ଯାଇଥିଲେ କିଛି ପଥଚାରୀ। ନାବାଳକଙ୍କ ଗାଡି ଚାଳନା ଦେଖି ଲୋକଙ୍କ ସନ୍ଦେହ ହୋଇଥିଲା ଓ ସେମାନେ ଗାଡ଼ିଟି ରାସ୍ତାରେ ଅଟକାଇଥିଲେ । ଖବର ପାଇ ପୁଲିସ ତରବରିଆ ଭାବେ ପହଞ୍ଚି ଟ୍ରାକ୍ଟରଟିକୁ ଜବତ କରି ପୁଣି ଥାନାକୁ ନେବା ସହ ନାବାଳକ ଚାଳକକୁ ମଧ୍ୟ ଥାନାକୁ ନେଇଥିଲା । ତେବେ ଦିନ ଦ୍ବିପହରରେ ଥାନା ପରିସରରୁ ପୁଲିସର ଉପସ୍ଥିତିରେ ତଥା ସିସିଟିଭି ଲାଗିଥିଲେ ମଧ୍ୟ ଟ୍ରାକ୍ଟର ଧରି ଚମ୍ପଟ ମାରିବା ଘଟଣା ବାଙ୍ଗିରିପୋଷି ଅଞ୍ଚଳରେ ପ୍ରଥମ ଘଟଣା ହୋଇଥିବା ବେଳେ ବାଙ୍ଗିରିପୋଷି ପୁଲିସ ର ପରିବା ପାଣିଆ ପ୍ରତି ପ୍ରଶ୍ନବାଚୀ ସୃଷ୍ଟି ହୋଇଛି ।