ପୋଲସରା,୦୨/୧୦(ପିପିଟି): ଆଜି ଅପରାହ୍ନ ପ୍ରାୟ ସାଢେ଼ ପାଞ୍ଚ ଘଣ୍ଟା ସମୟରେ ପୋଲସରା ଥାନା ଅନ୍ତର୍ଗତ ଚିରିକିପଡା ଶାସନରେ ପଡୋଶୀର ବିଅର ବୋତଲ ଆକ୍ରମଣ ରେ ଜଣେ ବୃଦ୍ଧା ପ୍ରାଣ ହରାଇଥିବା ବେଳେ ତାଙ୍କର ନାତୁଣୀ ଗୁରୁତର ଆହତ ହୋଇଛନ୍ତି। ମିଳିଥିବା ସୂଚନା ଅନୁଯାୟୀ ଚିରିକିପଡା ଶାସନ ଗ୍ରାମ ଦଧିବାମନ ସାହିର ବସନ୍ତ ସାହୁ ଓ ତାଙ୍କ ପଡୋଶୀ ବିପ୍ର ସାହୁଙ୍କ ପିଲା ମାନେ ଟିଉସନ ଯାଇଥିଲେ। ଟିଉସନ ରେ ପିଲା ମାନଙ୍କ ମଧ୍ୟରେ ଘଟିଥିବା କଳି କୁ କେନ୍ଦ୍ର କରି ବସନ୍ତ ସାହୁ ଗୋଟିଏ ବିଅର ବୋତଲ ଭାଙ୍ଗି ପଡୋଶୀ ବିପ୍ର ସାହୁଙ୍କ ସ୍ତ୍ରୀ ଜମ୍ମୁ ସାହୁଙ୍କୁ ଆକ୍ରମଣ କରିବା ଦ୍ୱାରା ତାଙ୍କର ମୃତ୍ୟୁ ହୋଇଯାଇଛି। ଜମ୍ମୁ ଙ୍କୁ ରକ୍ଷା କରିବା ପାଇଁ ଆସୁଥିବା ତାଙ୍କ ନାତୁଣୀ କସ୍ତୁରୀ କୁଣ୍ଡ ମଧ୍ୟ ଆକ୍ରମଣ ର ଶୀକାର ହୋଇଛନ୍ତି ଓ ତାଙ୍କର ଅବସ୍ଥା ଗୁରୁତର ରହିଛି। ଟିଉସନ ରେ ହୋଇଥିବା କଳି ଯୋଗୁଁ ଆକ୍ରମଣ ହୋଇଥିବା କୁହାଯାଉଥିଲେ ବି ଜମିଜମାକୁ ନେଇ ଉଭୟ ପରିବାର ମଧ୍ୟରେ ଦୀର୍ଘ ଦିନ ଧରି ଶତୃତା ଥିଲା ଏଥିପାଇଁ ଏହି ଆକ୍ରମଣ ହୋଇଥିବା ପ୍ରାଥମିକ ତଦନ୍ତରୁ ଜଣାପଡିଛି। ଏ ସମ୍ପର୍କରେ ସୂଚନା ପାଇବା କ୍ଷଣି ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଅପର ପକ୍ଷରେ ଅଭିଯୁକ୍ତ ବସନ୍ତ ସାହୁ ପୋଲିସ ନିକଟରେ ଆତ୍ମସମର୍ପଣ କରିଥିବା ସୂଚନା ମିଳିଛି।
(ରିପୋର୍ଟ- ସନ୍ତୋଷ କୁମାର ପଣ୍ଡା। )