ପୋଲସରା,୧୨/୦୭(ପିପିଟି): ଗଞ୍ଜାମ ଜିଲ୍ଲାର ପୋଲସରା ଅଞ୍ଚଳରେ ଆଜି ସନ୍ଧ୍ୟାରେ ଗୁଳିକାଣ୍ଡ ଘଟି ଜଣେ ମୃତ ଓ ଜଣେ ଆହତ। ମୃତ ବ୍ୟକ୍ତି ହେଲେ ବିଜୟ ବେହେରା (୬୨)। ଏହି ଗୁଳିମାଡ଼ର ଶିକାର ହୋଇଥିବା ଝିଅଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି। ମିଳିଥିବା ସୂଚନା ଅନୁସାରେ କୁମଣ୍ଡ ଗ୍ରାମର ବିଜୟଙ୍କ ଝିଅ ଗାୟିତ୍ରୀ ସୋଡ଼କ ଗ୍ରାମରେ ବାହା ହୋଇଛନ୍ତି। ଗାୟିତ୍ରୀଙ୍କ ଶ୍ବଶୁର ଘର ପୋଲସରା ବ୍ଲକ୍ ଛକରେ ଘରଭଡ଼ା ନେଇ ରହୁଛନ୍ତି। ବିଜୟ ଆଜି ଝିଅ ଘରକୁ ଆସିଥିଲେ। ସଂଧ୍ୟାରେ ଝିଅର ପରିବାର ଲୋକଙ୍କ ସହିତ କଥା ହେଉଥିଲେ। ପ୍ରାୟ ୬ଟା ୫୦ ମିନିଟ୍ରେ ହଠାତ୍ ଜଣେ ବ୍ୟକ୍ତି ଘରର ଝରକା ଗ୍ରିଲ୍ ଦେଇ ଗୁଳି ଫୁଟାଇଥିଲେ। ବିଜୟଙ୍କ ଛାତିରେ ଗୋଟିଏ ରାଉଣ୍ଡ୍ ଗୁଳି ବାଜିଥିଲା। ଘଟଣା ସ୍ଥଳରେ ବିଜୟ ଟଳି ପଡ଼ିଥିଲେ। ଏହା ଦେଖି ବାପାଙ୍କୁ ବଞ୍ଚାଇବାକୁ ଯାଇଥିବା ଝିଅ ମଧ୍ୟ ଗୁଳିମାଡ଼ର ଶିକାର ହୋଇଥିଲେ। ତାଙ୍କର ହାତରେ ମଧ୍ୟ ଗୁଳି ବାଜିଥିଲା। ଗୁଳିମାଡ଼ କରିଥିବା ବ୍ୟକ୍ତି ଜଣକ ସେଠାରୁ ଚମ୍ପଟ ମାରିଥିଲା। ସୂଚନା ପାଇ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଦେଇଛି। ଗୁଳିମାଡ଼ କରିଥିବା ଆସାମୀକୁ ପୁଲିସ ଚିହ୍ନଟ କରିଥିବା ସୂଚନା ମିଳିଛି।
(ରିପୋର୍ଟ- ସନ୍ତୋଷ କୁମାର ପଣ୍ଡା। )