ଭଞ୍ଜନଗର, ୧୧/୦୬(ପିପିଟି ):ଗଞ୍ଜାମ ଜିଲା ଭଞ୍ଜନଗର ଥାନା ଅନ୍ତର୍ଗତ ଡୁମାକୁମ୍ପା ପଞ୍ଚାୟତ ଗୁଡିପଦର ଗ୍ରାମ ନିକଟ ଏକ କେନାଲ ପାଖରୁ ଏକ ନରକଙ୍କାଳ ଉଦ୍ଧାର ହୋଇଛି। ଖବର ପାଇ ଭଞ୍ଜନଗର ଏସ୍ଡିପିଓ ଡ.ଦୀପକ କୁମାର ମିଶ୍ର, ଥାନା ଅଧିକାରୀ ଜୀବନାନନ୍ଦ ଜେନା ପୋଲିସ ଟିମ ସହ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରିଛନ୍ତି। କଙ୍କାଳକୁ ସ୍ଥାନୀୟ ଲୋକଙ୍କ ଉପସ୍ଥିତିରେ ଉଦ୍ଧାର କରି ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ଏଫଏମ୍ଟିକୁ ପଠାଯିବା ସହ ଏନେଇ ଭଞ୍ଜନଗର ଥାନାରେ କେସ ନମ୍ବର ୧୫ରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଥିବା ଜଣାପଡିଛି। ତେବେ ଉଦ୍ଧାର ହୋଇଥିବା ନରକଙ୍କାଳଟି ସମ୍ପୃକ୍ତ ଅଞ୍ଚଳର ବୋଲି ଜଣାପଡିଛି ।
ସୂଚନାଯୋଗ୍ୟ ଯେ, ଗୁଡ଼ିପଦର ଗ୍ରାମର ଜଣେ ବୟସ୍କ ମହିଳା ସୁନ୍ଦରୀ ନାୟକ ଗତ ମାସରେ ଘରୁ ଫୁଲ ତୋଳିବାକୁ ଯାଇଥିଲେ। ଏହାପରେ ସେ ଘରକୁ ଫେରି ନ ଥିଲେ। ଏହାପରେ ଘର ଲୋକ ବହୁ ଖୋଜାଖୋଜି କରିବା ପରେ ତାଙ୍କର କୌଣସି ପତ୍ତା ମିଳି ନ ଥିଲା। ଗତକାଲି ସୁନ୍ଦରୀଙ୍କ ନରକଙ୍କାଳ ଗ୍ରାମ କେନାଲ ନିକଟରୁ ମିଳିଛି ବୋଲି ଥାନା ଅଧିକାରୀ ଜୀବନାନନ୍ଦ ଜେନା ଏଠାରେ ସୂଚନା ଦେଇଛନ୍ତି। କିନ୍ତୁ ମହିଳା ଜଣଙ୍କ ମୃତ୍ୟୁ ସମ୍ପର୍କରେ କୌଣସି ସଠିକ ସୂଚନା ଜଣା ପଡ଼ିନାହିଁ।
ଜେ.କେ ପଟ୍ଟନାୟକ…