ଭୁବନେଶ୍ବର,୨୧/୦୮(ପିପିଟି):ବରିଷ୍ଠ ଫଟୋ ସାମ୍ବାଦିକ ଅନୀଲ ପ୍ରସାଦ ମିଶ୍ରଙ୍କ ୬୩ ବର୍ଷ ବୟସରେ ପରଲୋକ ହୋଇଛି। ସେ ଅସୁସ୍ଥ ହୋଇ ଭୁବନେଶ୍ବର ସ୍ପର୍ଶ ହସ୍ପିଟାଲରେ ଚିକିତ୍ସାଧିନ ଥିଲେ। ମଙ୍ଗଳବାର ରାତ୍ର ୧୦:୫୬ ସମୟରେ ଦେହାନ୍ତ ହୋଇଛି। ଖବରକାଗଜରୁ ସାମ୍ବାଦିକତା ଓ ଫଟୋଗ୍ରାଫ ଆରମ୍ଭ କରି ୧୯୮୪ ମସିହାରେ ଇଷ୍ଟର୍ଣ୍ଣ ପ୍ରେସ୍ ଏଜେନ୍ସି ବା ଇପିଏ ପ୍ରତିଷ୍ଠା କରିଥିଲେ। ରାଜ୍ଯ, ଦେଶ ଓ ବିଦେଶର ମିଡିଆ ସଂସ୍ଥାକୁ ଫଟୋ, ନ୍ଯୁଜ୍ ଓ ଫିଚର ପଠାଉଥିଲେ। ପରବର୍ତ୍ତି ସମୟରେ ଇପିଏ ଉଇକ୍ଲି ଆରମ୍ଭ କରିଥିଲେ। ନିଜସ୍ବ ଉଦ୍ୟମରେ ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ଫଟୋ ଗ୍ଯାଲେରି ଖୋଲିଥିଲେ। ସ୍ବର୍ଗତ ମିଶ୍ରଙ୍କ ପତ୍ନୀ ଅଞ୍ଜଳି ମିଶ୍ର ଇପିଏ ଉଇକ୍ଲିର ସମ୍ପାଦକ ଅଛନ୍ତି। ତାଙ୍କର ଗୋଟିଏ ପୁଅ ଓ ଗୋଟିଏ ଝିଅ ଅଛନ୍ତି। ମୁଖ୍ୟମନ୍ତ୍ରୀଙ୍କ ସମେତ ବିଶିଷ୍ଟ ବ୍ଯକ୍ତି, ବିଭିନ୍ନ ସଂଗଠନ ଶୋକ ପ୍ରକାଶ କରିଛନ୍ତି। ବୁଧବାର ଦିନ ପୁରୀ ସ୍ବର୍ଗଦ୍ବାର ଠାରେ ଅନ୍ତିମ ସଂସ୍କାର କରାଯାଇଛି। ଅନ୍ତିମ ସଂସ୍କାର ସମୟରେ ବନ୍ଧୁ ବର୍ଗ, ସାମ୍ବାଦିକ ମାନେ ଉପସ୍ଥିତ ଥିଲେ।