ଅମର୍ଦ୍ଦାରୋଡ଼,୦୭/୧୧: ବସ୍ତା ଥାନା ପୁଲିସ ଜଣେ ମୋବାଇଲ ଲୁଟିଆକୁ ଗିରଫ କରିବାକୁ ସକ୍ଷମ ହୋଇଥିବା ବେଳେ ଉକ୍ତ ଲୁଟିଆ ନିକଟରୁ ଚୋରି ଲାଗି ବ୍ୟବହୃତ ସ୍କୁଟି ସମେତ ୮ ମୋବାଇଲ ଜବତ କରାଯାଇଥିବା ଗୁରୁବାର ଏକ ପ୍ରେସ ବିବୃତିରେ ପୁଲିସ ଉପଖଣ୍ଡ ଅଧିକାରୀ ଅରୁଣ କୁମାର ସାହୁ ସୂଚନା ଦେଇଛନ୍ତି।ଘଟଣା ଅନୁସାରେ ଗତ ମାସ ୨୨ ତାରିଖରେ ବାଲେଶ୍ବର ଭାସ୍କରଗଞ୍ଜ ଅଞ୍ଚଳର ଜୈନିକା ମହିଳା ଏହି ଥାନା ଅଧୀନ ସଦାନନ୍ଦପୁରର ଜଣେ ସମ୍ପର୍କୀୟଙ୍କ ଘରକୁ ଯାଉଥିଲେ। ସେହି ସମୟରେ ଦୁଇଜଣ ଅଜ୍ଞାତ ବ୍ୟକ୍ତି ସ୍କୁଟି(ଓଆର ୦୧ଭି ୬୦୨୩)ରେ ଆସି ତାଙ୍କୁ ଅଟକାଇଥିଲେ।ପରେ ଗୋଟିଏ ଛୁରୀକୁ ମହିଳାଙ୍କ ବେକରେ ରଖି ସେମାନେ ତାଙ୍କର ମୋବାଇଲ ଫୋନଟିକୁ ନେଇ ଘଟଣା ସ୍ଥଳରୁ ଚମ୍ପଟ୍ ମାରିଥିଲେ। ଏନେଇ ମହିଳା ଜଣକ ବସ୍ତା ଥାନାରେ ଲିଖିତ ଅଭିଯୋଗ କରିଥିଲେ। ଏନେଇ ବସ୍ତା ଥାନାରେ ୨୩୧/୨୪ ରେ ମାମଲା ରୁଜୁ କରି ତଦନ୍ତ ଚଳାଇଥିବା ବେଳେ ଏଥିରେ ସଂପୃକ୍ତ ଥିବା ରଘୁନାଥ ଦାସ ନାମକ ଜଣେ ଯୁବକଙ୍କୁ ଗିରଫ କରି ତାଙ୍କ ନିକଟରୁ ଗୋଟିଏ ସ୍କୁଟି ଓ ଆଠଟି ମୋବାଇଲ ଫୋନ୍ ଜବତ କରିଛି ପୋଲିସ। ତେବେ ଏହି ମୋବାଇଲ ଚୋରି ଗ୍ୟାଙ୍ଗରେ ଏକାଧିକ ଯୁବକ ସଂପୃକ୍ତ ଥିବା ବେଳେ ସେମାନେ ଫେରାର ହୋଇଥିବା ଜଣାଯାଇଛି।