ସୌରଚାଳିତ ପାନୀୟ ଜଳଯୋଗାଣ ପ୍ରକଳ୍ପ ଅଚଳ, ଗ୍ରାମବାସୀ ହଇରାଣ ।

ଉଲୁଣ୍ଡା,୨୩/୦୯(ପିପିଟି); ଦୀର୍ଘ ଛଅ ମାସ ହେବ ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବ୍ଲକ ଅନ୍ତର୍ଗତ କାଦୋଦର ଗ୍ରାମପଞ୍ଚାୟତର ଲିଟିପାଲି ଗ୍ରାମରେ ଥିବା ସୌର ଚାଳିତ ପାନୀୟ ଜଳ ଯୋଗାଣ ପ୍ରକଳ୍ପ ଅଚଳ ହୋଇପଡିଥିବାରୁ ପିଇବା ପାଣି ଟୋପାଏ ପାଇଁ ଗ୍ରାମବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଗ୍ରାମବାସୀଙ୍କ କହିବା ଅନୁସାରେ ଅଚଳ ହେଲା ପରେ ପରେ ବିଭାଗୀୟ ଅଧିକାରୀଙ୍କ ଠାରେ ଅଭିଯୋଗ କରିବା ଫଳରେ ଅଧିକାରୀ ମାନେ ଗାଁକୁ ଆସି ପ୍ରକଳ୍ପରେ ଲାଗିଥିବା ବ୍ୟାଟେରୀ ଓ କିଛି ଯନ୍ତ୍ରାଂଶକୁ ଖୋଲି ମରାମତି ପାଇଁ ନେଇଥିଲେ ।ଏ ହା ପରେ ସେମାନଙ୍କର ଆଉ ଦେଖା ଦର୍ଶନ ମିଳୁ ନ ଥିବା ଅଭିଯୋଗ କରଛନ୍ତି ଗ୍ରାମବାସୀ । ଗାଁରେ ଥିବା ପାଞ୍ଚଟି ନଳକୂପ ମଧ୍ୟରୁ ତିନୋଟି ଅଚଳ ହୋଇପଡିଥିବା ବେଳେ ଆଉ ଦୁଇଟି ନଳକୂପରୁ ବ୍ୟବହାର ଉପଯୋଗୀ ପାଣି ବାହାରୁ ନ ଥିବାରୁ ଗ୍ରାମବାସୀ ନାଳ ପାଣି ବ୍ୟବହାର କରିବାକୁ ବାଧ୍ୟ ହେଉଛନ୍ତି । ତେଣୁ ପିଇବା ପାଣି ପାଇଁ ଗ୍ରାମବାସୀ ବହୁ ଅସୁବିଧାର ସମ୍ମୁଖୀନ ହେଉଥିବାର ଅଭିଯୋଗ କରିଛନ୍ତି । ଜିଲ୍ଲା ପ୍ରଶାସନ ତଥା ଗ୍ରାମ୍ୟ ଜଳଯୋଗାଣ ବିଭାଗ ଏଥିପ୍ରତି ଦୃଷ୍ଟି ଦେଇ ଗ୍ରାମରେ ଥିବା ପ୍ରକଳ୍ପକୁ କାର୍ଯ୍ୟକ୍ଷମ କରିବା ଦିଗରେ ପଦକ୍ଷେପ ନେବାକୁ ଗ୍ରାମବାସୀ ଦାବି କରିଛନ୍ତି । (ରିପୋର୍ଟ – ଶାନ୍ତନୁ କୁମାର କର୍ଣ୍ଣ ।)